الخميس، سبتمبر 29، 2011

30/9

انا مش عارف حنستمر نعد في ايام لغاية امتى , بس اللي اعرفه ان احنا مش ممكن نقف عن العد لغاية ما البلد دي ترجع لاهلها , يحكموا نفسهم بنفسهم لا بكاريزما القئد الركن المهيب ولا بعملاء الموساد بالوكالة  ,


متشغلش بالك باللي مش نازل -مش احتقار او اهانة - لا بس بفكرك انه هوه نفسه اللي منزلش يوم 25 .

بكره احلى بيك لو انت اختارت انه يكون احلى , ولو اختارت العكس متلمش الا نفسك .


عيش -حرية -عدالة اجتماعية (بالمناسبة لا كان في الطلبات دولة علمانية ولا دولة خلافة  ) بس بنأكد ان محدش نزل علشان قانون الطوارىء يعاد تفعيله ببنود كان لغاها المخلوع بذات سخصيته بكل ديكتاتوريته , ولا علشان نبدل حسني بحسين ولا علشان عسكر مش راضيين يقولوا لغاية دلوقتي امتى حيحلوا عن سمانا (بالماسبة برده قبل ما حد يقول فيه انتخابات حتخلص بعد ست شهور من دلوقت ؟؟؟!!! الانتخابات دي حتجيب مجلس تشريعي مش حكومة لان نظام مصر لازال رئاسي حتى تاريخه مش برطماني (مش غلطة ) , وده معناه ان اقصى حاجة حيعملها المجلس المنتخب اللي مخدناش وعد بغيره لغاية دلوقتي  انه حيعترض على وزير او يسحب الثقفة ومش عارفين في الوقت ده المجلس الاعلى للفلول  وقائد الثورة المضادة حيكون ركب سماعة يسمع بيها ولا لسه ؟ 


انا فعلا مش عارف بكره فيه ايه بس لازم نقول لا علشان نبرأ ذمتنا من التعذيب والطوارىء وسرقة تضحيات اللي ضحوا , علشان منرجعش تاني امن الدولة علشان ميبقاش فيه سيد بلال تاني , علشان ميبقاش فيه باشا بيعذب من غير ميتحاسب , علشان ميبقاش فيه بناء على توجيهات السيد ارئيس تاني , علشان منرجعش نتفرج على قنابل الفسفور فوق غزة في التلفزيون ومصر العظيمة مشاركة في الحصار ونرجع نقول هيه الناس بتكرهنا ليه (اكيد مش علشان احنا احسن منهم لان ده وهم ) , علشان منتفرجش على الغاز بيصدر بنص تمنه والمستشفيات مفيهاش خيوط جراحة ولا ابرة مغص , علشان محدش يدخل مسرطنات من غير ميتصلب في ميدان عام , علشان تمشي في الشارع بامان من وزارة الداخلية قبل البلطجية . 




بكره احسن لو انت اختارت كده , واسوأ لو انت اختارت برده كده . خد فرصته لتسليم السلطة 8 شهور ولسه بيماطل ولغاية دلوقتي مقالش امتى حيسلمها , متنتظرش مني اني اتفرج لغاية ميسلمنا احنا لملك الموت او السجّان وصدقني الموت ارحم من سجن مصر العسكري -اقصد السجن الكبير -


رجاء اللي ميعرفش يعني ايه قانون طوارىء وحكم عسكري  ميعلقش 



الخميس، سبتمبر 22، 2011

زهق غير ثوري

** كان يقف امام مقدم الشرطة بأمن الدولة يسأله الاخير عن اسماء الاخوان المسلمين بالكلية فيرد الاول وهو يستجمع شتات شجاعة ويتمثل الثبات في هذا الموقف الذي لم يتخيل يوما ان يقف فيه (آنا اسف ) لم ينكر معرفته بهم لأنه كان يستحي من الكذب ولم يش بهم لانه يستحي من الله فاعتذر عن الاجابة , ثم بعد سنين طويلة وجد من يقول ان الاخوان كانوا على علاقة بأمن الدولة , هل يجب ان يصدق ان امن الدولة قضى على مستقبل الالاف من المتدينين ثمنا لهذه العلاقة . لا عزاء للعميان . 




** احتجزه امن الدولة مرة فوجد ما يزيد عن ال20 فردا لا تهمة لهم الا انهم ملتحون كانوا يستمعون الى خطبة الجمعة بمسجد سلفي لا ترضى عنه اجهزة الامن , ومرة اخرى اعتقلوه في امن الدولة فوجد 4 افراد من السلفيين يقسم احدهم انه لا يعرف النوم ليلا الا عندما يأتي لامن الدولة لانه يعمل صيادا (كم هي وظيفة تؤثر على امن المخلوع لعنه الله ومن والاه وكل من دافع عنه وعن نظامه ) فلا يجد وقتا للنوم , ثم يسمع من يتهم السلفيين بأنهم عملاء لأمن الدولة , فاذا ما ضيقت عليه الخناق قال بعضهم فقط !!,
 صديقي وبعض المصريين ايضا كان عميلا لامن الدولة -هل هذا يكفي لرمي جميع المصريين بالعمالة او الصاقها بجنسهم - وبعضهم اساتذة جامعات.


** بعض المصريين كان مبارك وصفوت وسرور وزكريا عزمي والعادلي وحسن عبدالرحمن وظباط امن الدولة  , واستاذ الجامعة المريض نفسيا بوهم انه عالم او ربما عالمة  , ومن سجن المسلمات في اديرة وبيوت تكريس ومن سلمهن اليه ومن سكت عنهم , ومن حرق كنيسة امبابة ومن فجر كنيسة القديسين ومن اغلق التحقيق فيها , ومن يترك عمله من الساعة ال12 ظهرا ومن يعامل الناس بكل وقاحة ومن يأخذ الرشوة صلى بعدها الظهر او لم يصله , ومن قام بثورة ابهرت العالم ثم جلس يشاهدها في التلفزيون ومن ظن ان الثورية هي شتيمة كل الناس وان محدش غيره بيفهم , وان المصريين كلهم مبارك -الا هو طبعا-   هذه تذكره لمن يعتقدون ان المصري هو من بدأ التاريخ وهو من سينهييه فقط لانه مصري فهلوي . 




** مسلم أمريكي في جيش امريكا الوطني للهجوم على مصر او احتلال مكة المكرمة  ,هل هو مذنب شرعا ؟؟
ان قلت نعم فخيانة الوطن احيانا  اذا تكون واجبة , وقد كفرت بمبدأ الوطنية والمواطنة فلماذا تلومونا اذا قلنا ان الانتساب للدين مقدم على الانتساب للوطن , واذا قلت لا فقد تجاهلت انت قول الله (لا تتخذوا عدوي وعدوكم اولياء تلقون اليهم بالمودة وقد كفروا بما جاءكم من الحق ) وقوله (قل ان كان اباءكم واخوانكم وأزواجكم وعشيرتكم وأموال اقترفتموها وتجارة تخشون كسادها ومساكن ترضونها أحب اليكم من الله ورسوله وجهاد في سبيله فتربصوا ...) التوبة , ياترى اول مرة تقرا الاية دي ولا قريتها وطنشت ان مفيش حاجة بتتقدم على الولاء لله , ولا الشيخ عكروت ابو ظعبوط قالك حلال حلال ويجوز وانت استفتيت مولانا العلامة الفهم الفهامة الشيخ قلبك النقي التقي من الشبهات والشهوات العالم ببواطن الامور ومعاني مابين السطور فدلك على طريق الوطن اولا وقبل اي شيء حتى الدين , فيه واحد  حيقول مفيش تعارض  , طيب بص للمثال اوله كده ولا لحقت تنسى ؟ بس دي امريكا مش مصر , مصر اسلامية !
 الحمد لله يبقى مصر اسلامية مش مدنية ولا هندية ؟
 انت بتلعب بالالفاظ وبتغسل دماغنا باستغلال الفهم الخاطىء للدين .
طيب مع السلامة انها لا تعمى البصار ولكن تعمى القلوب التي في الصدور 
انت بتكفرني ؟ 
يا عم انت حد كلمك انت بتتسلط على اي حاجة تعمل نفسك فيها ضحية علشان تعيش الوهم بين اقرانك انك ضحية الفهم الخاطىء للدين  ....... صوت آذان ...مش حتقوم تصلي ؟


انا مبصليش روح انت خلي ربنا بتاعكم ينفعكم (لا تنصدم رجاء فقد قيلت لي من زميل اسمه محمد كان بيقول على نفسه علماني وانه ضد الاخوان والسلفيين ولما قعدنا سوا قالها صريحة , لا تتعجب انها حقيقة كثيرين ممن يلبسون دور المنقي للدين من تخاريف السلفيين , يمكنك ان تعرفه من غيره من المنتقدين للاسلاميين من المسلمين المحترمين المختلفين في الرأي مع الاسلاميين (المحترمين مش الردّاحين والردّاحات ) من موقفه من تحكيم الشريعة بالرجوع الى فهم الازاهرة والمجمعات الفقهية الاسلامية العالمية والمحلية ).


** مره واحد سلفي ميعرفنيش قال عني اني علماني علشان كنت بدافع عن اسماء محفوظ ومرة تانية واحد سلفي (بعد تعذيب 20 يوم ) كان سبب في اعتقالي , ومرة سلفي تالت قال عني اني تكفير وهجرة , ومع ذلك مدونتي تشهد على عدد المرات اللي دافعت عنهم فيها , تقدر انت كمان تفهم انهم بني ادمين محترمين متدينيين حتى ولو كان في وسطهم اغبيا , وحتى لو كانت السلفية نفسها محل تساؤل عن مدى تطابقها مع فرعيات الشريعة وترتيب اولوياتها بل واحيانا مكان وضع الاحكام الشرعية ( بين باب العقائد والفقه ) .
--لأ طبعا الشتيمة اسهل وحتخليك من اصحاب العقول (اي والله واحده كانت بتقول على نفسها كده  انها من اصحاب العقول اللي الاخوان خسروهم بمواقفهم هههههههه) شفى الله مرضانا  .


** اكيد ليك تعليقات كتيير على تصرفات الاخوان وطريقة ادارتهم لمواقفهم للثورة , وانا كمان ليا تعليقات كتيير وضيق احيانا وتبرير احيانا ورفض كلي احيان اخرى , بس في الزحمة انت نسيت انها مواقفهم هما مش مواقفك انت - معلومة بسيطة ومن كتر بساطتها لسه مفهمتهاش انت - فيه نقطة تانية ان انا او انت اتصرفنا بشكل معين والاخوان اتصرفوا عكسه , انهم مش شياطين ولا اعداء لان برده في الزحمة ومين ثوري اكتر بننسى احيانا ان فيه احتمال ان احنا ممكن نكون غلط , ايه صعبة ؟؟ ههههه مش قلتلك ربنا يشفيك من مرض أنا .


جعل الله للمجتهد المصيب اجرين وللمجتهد المخطىء اجر , هذا في شأن الشريعة التي هي اعظم الامور وعليها تقوم الحياة فما بالنا بموقف سياسي يحتمل كل شيء من الخطأ الى الصواب وما بينهما من خير الخيرين وشر الشرين 
 اه معلش بما اني من المرضى , مؤيدي مبارك بره الحسابات دي لأن زي ما الاجتهاد فيه شروط للمجتهد وشروط للمسألة محل الاجتهاد (زي اي علم يعني مش علشان هوه دين يبقى سبهللة لاي واحد مبيعرفش اركان الصلاة من واجبتها انه يفتي )فيه  شروط مش منها انك تكون متعرفش لغاية دلوقتي ان وظيفة مبارك الوحيدة في مصر طول ال30 سنة هي افسادها من الداخل علشان تبقى صعبة عل اي حد ييجي بعده انه يصلحها (زي محصل في ثورة مكنتش في حسابات اللي شغلوه , او ثورة تانية بعدها مش ممولة زي ما فيه ناس تانية متخيلة عن الاولى  ) لا تنمية في سينا ولا اهتمام بانفصال الجنوب السوداني (اللي بالصدفة مسيحي اعلن عن ان سفارته في اسرائيل حتكون في القدس مش في تل ابيب ) , ولا اهتمام بامتداد مصر الجنوبي في دول المنبع , وانشاء منظومة افساد ورعايتها , وسرطنة الاغذية , وزيادة الدين العام , وتجهييل التعليم -اي والله تجهييل التعليم , وتدمير صحة المصريين بشكل ممنهج , مش حنعيد احنا بس بنفكر اللي زعلان على العميل عبدالامريكان  اللي بيتحاكم علي 18 يوم من 30 سنة .


اسف على الاستطراد , نرجع تاني  انت شايف ان المليونيات هيه وسيلة الضغط الوحيدة على المجلس في الوقت اللي انت تحدده .
اقرا الجملة تاني و تاني وانت تعرف الغلط فين .


** اعتراف :  الدستور اولا هوه الصح , ده مكنش نقطة الخلاف اصلا .......... نقطة الخلاف كانت على مين يحط الدستور , ناس كتيير كانت فاهمة بس كانت بتستعبط , لان في حالة الدستور اولا مكنش معروف اصلا مين حيحط بنوده هل لجنة معينة ولا لجنة منتخبة ولو منتخبة يبقى فرقت ايه عن مجلس شعب طالما كده كده الاسلاميين مسيطرين على الشارع , ولو مكنتش منتخبة كان حيبقى فيه استفتاء عليه ولا لا ولو فيه ايه اللي كان حيمنعنا من اننا نضحك على الشعب المغفل زي مكنتو بتقولوا , ويا ترى لو عملتوه انت ومعملتوش عليه استفتاء حنعترف بشرعيته اصلا وهل ياترى عارفين يعني ايه , عدة ملايين من المواطنيين ميعترفوش بشرعية دستور بلدهم ده معناه ايه . مش مهم تفهموا ولا تتناقشوا , المهم تقعدوا على تويتر وتشتموا اللي مش على طريقتكم , وتحلوا مشاكل مصر التويترية.


** سؤال اخير لاني تعبت وتعبتكم معايا ,اذا مكنش هدف الثورة الاساسي هو انتخابات (كوسيلة وليست غاية يداس من اجلها مبادىء ليس اقلها السكوت الطويل عن اتخاذ موقف واضح من قتل عدة مدنيين في مظاهرات ما بعد الثورة حتى لو كنت مختلف مع اسبابها والمشتركين فيها , لان  الحفظ على حياة الانسان وصيانتها هي من الابجديات والاوليات التي تأتي قبل اي مكسب اخر ) اذا مكناش بنسعى لتسليم السلطة لمدنيين مختارين من الشعب علشان نحاسبهم بعد كده ونسقطهم لما ميعملوش اللي احنا عايزينه , امال كنت بتثوروا ليه ؟؟ عجبتكم حكاية انت من الثوار يا علي ؟ ولا فيه ناس كانت بتثور علشان تيجي مكان مبارك بالعافية والشرعية الثورية , وفيه ناس كانت بتعوض شعورها بالنقص من انها منزلتش لغاية 11 فبراير فقالت ننزل لما تكون الاعداد كبيرة في الاوقات اللي مفيهاش ضرب :)  


** الشهادة مصطلح نبيل وجزاء الشهيد معروف للكل , بس جديدة حكاية شهيد المدنية  اللاسلامية , ان شاء الله لما تموت ويختلفوا على تصنيفك بلطجي ولا شهيد  حعملك مقام في ميدان التحرير وحخللي غاندي تويتر(المناضل من وراء جدار اللي كان بره مصر اصلا لما قامت الثورة ومع ذلك فرقة حسب الله افتكرت بس ان الاخوان منزلوش يوم 25 ) يدعو مريديه علشان يعملولك مولد سنوي  .


سامحوني كلكم .

الجمعة، سبتمبر 16، 2011

لا لليأس

وظيفتنا في الحياة اننا نحلم , نرسم مستقبلنا , نخطط ليه , نتجه لهدفنا , نخلص النية لله , نسعى في الطريق للخير بعد ما نجتهد علشان نتأكد انه خير (ونسأل الله المغفرة ان اخطأنا ) , مش وظيفتنا النتيجة , ربنا سبحانه وتعالى حيسألنا عملنا ايه علشان ننصر دينه وعلشان نقّوّم الظلم ونحيي سنة العدل في الكون مش بس في المجتمع (يؤمن المتطرفون من امثالي بالوحدة الاممية اكثر من ايماني بالفرقة المبنية على الانتماء الشعوبي للارض التي قدر لنا رغما عنا في الميلاد عليها ) , ربنا مش حيسألنا موصولتوش ليه الا اذا قصرنا , حيسألنا انت مشتغلتوش ليه لما كانت لديكم القد رة على العمل .


الحياة في سبيل الله اصعب مليون مرة من الموت في سبيله  سبحانه وتعالي (الذي خلق الموت والحياة ليبلوكم ايكم احسن عملا ) 


في طريق الله ليس مهما ان تصل الى نهاية الطريق , الأهم على الاطلاق ان تموت على الطريق ,لا أن تفرق بك الطرق عن طريقه .


تحياتي لاخي الكريم نور الدين محمود 





***********************************




لأخينا معتز صاحب الميكروباص 
             يمكن متفق معاك ان حكاية الفلول دي عاملة زي واحد كل ما يغلط يشتم الكمبيوتر علشان مبيعرفش يكتب , كل ما في الأمر ان القوات اللي كانت واقفة قدام السفارة كانت تقدر تمنع المهاجمين وعملت نفسها مش واخدة بالها وان الورق اللي اترمى مكنش فيه اي معلومة ذات قيمة .
اعذرني في اي حاجة تانية لاني مؤمن تماما ان الجيش لما نزل يوم 28 منزلش علشان يحمي الثورة , نزل علشان يلم الدور بورقة مش ممكن تتحرق , وان اللي حصل هو انقلاب عسكري بنكهة الثورة الشعبية , وحتى يسلم الجيش السلطة  لمدنيين انتخبهم الشعب في انتخابات نزيهه حتى لو كان اللي حينجح هوه غاندي تويتر لكن مجرد ان الشعب يحكم نفسه ويحاسب حكومته معناه ان احنا بدأنا نحط رجلينا على سلم التقدم ,وحتى يحين هذا الوقت فسأغرد دوما- يسقط يسقط حكم العسكر- لأنه  سبب كل البلاوي اللي احنا عايشينها حاليا بما فيها مسخ الانسان وروحه وتحويله البشر المصريين الا قلة تثبت القاعدة ولا تنفيها , تحويلهم الى مسوخ بشرية لا تؤمن بقيمة الاخلاق , او الكرامة لان الاستبداد دوما يغير من طبائع البشر , فالمسألة تتعدى تماما الحاجات الاساسية الطبيعية من مأكل ومشرب وملبس .




*****************************


ويبقى الامل ما بقيت الحياة واعظم الامل ما جاء به الموت نفسه .

الاثنين، سبتمبر 12، 2011

لا لحكم العسكر

                                لاللمحاكمات العسكريةللمدنيين

 لا لحكم العسكر

لا لقانون الطوارىء 
                 (لم تفعلوه عندما كانت البلطجة في كل حارة والان فعلتوه من اجل السفارة )

نعم للثورة من جديد اذا اقتضى الامر , ثورة هدفها واضح هو نقل السلطة للشعب


اول من يتحمل خطأ ما حدث ليلة التاسع من سبتمبر هو المجلس العسكري بقراراته التي تتعمد استفزاز الجميع وتفرق اكثر مما تجمع 



بعض من اشعل النار في قلوب المواطنين يرفع يده الان ويتحدث عن الغوغاء والعامة وهذا جزاء كل من وثق فيمن لا يستحق الثقة .


للذين ينوحون على انتهاك سيادة السفارة ( لم اكن من المؤيدين للنزول يوم 9 سبتمبر نفسه لتفويت الفرصة على العسكر لا ستغلال الاضطراب لتأجيل حلم المصريين بسلطة منتخبة ) تذكروا شهداء الحدود ببعض من دموع عيونكم الوقحه .


قد نتمنى ان نعرف من اشعل النار في مصر ليل التاسع من سبتمبر ولكن قد يبدو ذلك صعبا , لكن يمكننا ان نعرف من المستفيد الاول من هذه الاحداث التي تهيء لتمديد سلطة العسكر , دائما لا يجب ان نبحث في الماضي قدر ما يجب ان ننظر للمستقبل حتى لا يتكرر ما حدث في الماضي وايضا حتى لا يستغل احد ما يحدث لتسيير الاحداث الى شاطئه .


لا مكان للاحباط , امام العسكر فرصة تاريخية لدخول التاريخ اذا تنازلوا عن السلطة للشعب , ولا يجب ان يحلموا بعودة عقارب الساعة الى الوراء .

الان سوف يظهر حماة الثورة  الحقيقيون من بين ملايين لبست اقنعتها وتربعت على شاشات الحديث عن امجادها , واخرين ثاروا من اجل الثورة ورفضوا لمجرد الرفض , الان يجب ان نسائل هولاء الذين ملأوا الدنيا صياحا من اجل دماء الشهداء التي زعموا انها ماتت من اجل دستور جديد ,  الا يجب ان نسمع اصواتكم من اجل قتلى برصاص حي في الرأس .


من يراهن على الاغلبية الصامتة فخاسر لانها لم تتكلم عندما احتل الانجليز انفسهم مصر وهم يؤمنون ايمانا مطلقا بأن الطاعة لمن غلب , المتحدثين الان عما يشق الصف الوطني هم اول اعداء هذه الثورة , لا يتكلم احد الا بما يقرب االصفوف ويؤلف بين الافئدة والا فالموت للثوار والبراءة للفجار .

لم اكن اتمنى ان اقول ذلك  وحاولت ان اتجنبه كثيرا انتظر لحظه يخيب العسكر رجائي ويرحلوا  ,لكنه بدا بعيدا  الثورة مستمرة عيش حرية عدالة اجتماعية





الأحد، سبتمبر 04، 2011

هوه ايه الحوار ؟

الصراع بين اصحاب المبادىء الحاكمة والداعين اليها من ناحية وبين التيارات الاسلامية المختلفة هو صراع على تطبيق الشريعة في العاجل والاجل , وما محاولة تهاني الجبالي والشلة العلمانية المحيطة بها الا لتجريم العمل السياسي على اساس اسلامي (نعم تجريمه وليس فقط رفضه بحيث يكون فعلا مخالفا للدستور والقانون ان تدعو الى تطبيق الشريعة بالنص على لادينية الدولة , واعتبارمبادىء الشريعة الاسلامية بعد تفسيرها بالحرية والعدل والمساواة بعيدا عن احكام الشريعة نفسهما -ارجو ملاحظة الفارق اللغوي والقانوني بين مبادىء الشريعة وأحكام الشريعة -وعند النص على مدنية الدولة بمعناها اللاديني تصبح الدعوة الى تنفيذ احكام الشريعة  ضد ما هو فوق دستوري غير قابل للتغيير . 




** قد تتهمني بكل ما تريده واني خصم غير مأمون الشهادة في حق خصومي السياسيين اي ان شهادتي مجروحة , حسنا اليك هذه الشهادة الغير مجروحة في حق العلمانيين والليبراليين من عمرو اديب 
هنا








**  يرى الان كل من بلال فضل وعلاء الاسواني والمستشار الخضيري وهم قطعا ليسوا محسوبين على التيارات الدينية التي يصر بعض المرضى بنظرية الصفقات (هكذا الغانيات تود لو ان النساء كلهن ......) يصرون على ان دعوة الاخوان الى انتخابات ما هي الا مجرد محاولة للسيطرة رغم انهم اقسموا بأغلظ الايمان انهم لن يترشحوا على اكثر من 50% تصل بهم في النهاية الى النسبة التي يطمعون اليها وهي الثلث تطينا للجميع من انهم يرغبون في المشاركة لا المغالبة , حتى بعدما فصلوا احد مؤسسي البناء الثاني للاخوان من الجماعة لرفضه قرارها التطميني بعدم خوض انتخاباات الرئاسة , ظل المرعوبون دوما يردون بأنها خدعة وهكذا دواليك فلا شيء اخر يريدونه الا الاختفاء التام للاخوان حتى لو كان ذلك باعادة امن الدولة او بأحداث صدام قوي بين المؤسسة العسكرية والااخوان كما حدث من قبل  في عام 1954لاستئصالهم ثم بداية حياة سياسية جديدة بدونهم (شهادة نوارة نجم على البسطويسي ) , المهم يرى بلال فضل وعلاء الاسواني والمستشار الخضيري بل وايمن نور الان وجوب عمل انتخابات لنقل السلطة الى مدنيين وبداية حياة سياسية سليمة حتى لو ادت الى فوز خصومهم (على حد وصف علاء الاسواني ) , ورغم قناعتي التامة بعدم قدرة اي فصيل سياسي مصري على اكتساح الانتخابات المقبلة تحديدا , الا ان هذه الشهادة تعني اننا امام اشخاص يسعون الى مصلحة حقيقية في مصر وفتح الباب امامها نحو مستقبل  سعيد حتى لو خالف ذلك امالهم الشخصية , و نشكرهم على ذلك ونقدر لهم خروجهم عن خط  من يلعبون سياسة بمنطق (فيها لا اخفيها ) , كما اسجل شكري الخاص لعمرو حمزاوي الذي اثبت انه فعلا مؤمن بما يقول ويدعو اليه حتى لو اختلفنا معه اشد الاختلاف هدانا الله جميعا للعمل لدينه عندما اصر على رفض المبادىء الفوق دستورية دون العرض على الشعب في استفتاء عام وليس بطرقة فوقية تنم عن ديكتاتورية متأصلة في نفوس من يزعمون انتمائهم الى مذهب يقوم اول ما يقوم على الايمان بالتعددية والتسليم بالحرية كمحور مطلق في العلاقات الانسانية والمبادىء القانونية .اقصد من يزعمون الايمان بالليبرالية والديموقراطية والدعوة اليها , حتى لو خالفت شريعة من له الامر والخلق .




* اللهم ارنا الحق حقا وارزقنا اتباعه وارنا الباطل باطلا وارزقنا اجتنابه واجعلنا من جندك الساعين في الزود عن حياض دينك واعلاء كلماتك وتقديس كتابك بلا هوى ولا حظ نفس , اللهم انا نعلن برائتنا من السفهاء منا الساعين في طمس معالم دينك واعلاء رايات غير رايتك وكراهية كل ما يمت لدينك الا ما صادف اهوائهم او حقا لهم .




(واذا ذكر الله وحده اشمأزت قلوب الذين لا يؤمنون بالاخرة واذا ذكر الذين من دونه اذا هم يستبشرون )