بداية من غير فذلكة انا مش من اللي بيعرفوا الليبرالية على انها امك ايوه امك انت متلبسش حجاب علشان مفيش واحد او واحدة يلبسلي وش عم الفهيم بتاع بلدهم
الليبرالية هي التحرر من القيود السلطوية الثلاث الاقتصادية والسياسية والثقافية , ومعناها الحرفي الحرية , فيه شوية عيال بيقيفوها على مقاسهم علشان محدش يهب في وشهم خلاص مفيش مشكلة ممكن نتفاهم ونشوف القصة دي وفيه في مدونتي مقال اسمه البربراريون للي عايز يقراه ويفنده براحته .
انما تعليقي على جملة شفتها كتيير اوي على لسان كل اللي بيقولوا لا تقريبا انهم شايفيين انهم نخبة وان غيرهم من اللي قالوا نعم يا مضحوك عليهم ياماشيين ورا ناس بتضحك عليهم نسمع الفيديون ده ونشوف بقى معنى المدنية والليبرالية اللي عايزها البهوات يمكن نعرف مين لفينا اللي مضحوك عليه
الدكتور وفعلا هوه دكتور في مجاله ومن المؤمنين حقيقة بالحوار ودي شهادتي الشخصية ليه ومش هعمل زي معشر الليبراليين واليساريين والمتنوريين اللي ميعرفوش يبدأو كلامهم من غير شتيمة
بينادي بزواج مدني وجواز زواج المسيحي من مسلمة , بس علشان هو محترم وديمقراطي بيطالب بيه بس للي عايزه .......مدنية يعني ايه يا ولاد............
فيه كلمة واقفة في زوري بس للاسف مش من اخلاقي الشتيمة د. عمرو حمزاوي
اللي ميعرفش حكم اللي بيقوله الدكتور ايه شرعا ولا ايه معنى الكلام ممكن يستفسر وهوه يعرف .
والى لقاء اخر في غزوة صناديق اخرى طالما انتو مصرين على انها غزوة وان الراجل مكنش بيهزر ولا نشوة الفرحة خدتوا لبعيد
حبايبي الحلوين دي نتيجة الهجوم على الشيخ طيلة عدة شهور , استقبال حاشد من طلبة جامعة الازهر للشيخ يعقوب
بنبوس رجليكم علشان نتفاهم ونوصل لحل وسط وانتو مصممين ان انتو نخبة ورسالتكم المقدسة هي التنوير , طيب احنا دفعنا تمن ايماننا بمبادئنا سجن وتشريد ومنع وتعذيب واعتقال ونحتسبه جميعا عند الله لانريد منكم جزاء ولا شكورا , دفعناه من عمرنا وراحتنا وفي الثورة كتيير مننا شارك ومع ذلك اصريتوا ان انتو الثورة والحاصلين على توكيلها الر سمي ومع كل ده مفيش مشكلة بنؤمن ان لو حلمنا متحققش بأيدينا حنورثه لولادنا علشان يحققوه , مش زي ناس خايفيين لو متحققش النهاردة بقوة الصوت العالي والاستنجاد بالقوات المسلحة ومفيش مانع من امريكا كمان لو لزم الامر .
عفوا اذا وجدت كلامي يمسك فأنا اقصدك وان وجدته لا يعنيك فالرسالة وصلت بالخطأ , فأنا لا أقصد كل من قال لا ممن يؤمن بأنه خلاف في الرأي كان رأيي انا من البداية انه لا يعني شيئا لانه في كل الحالات صدر اعلان دستوري لم يصوت عليه الشعب فالكل مضحزك عليه في النهاية .
