الخميس، أكتوبر 13، 2011

لا يجوز تأخير البيان عن وقت الحاجة

اتفهم تماما ان نقوم بتعزية شركاء الوطن من الاقباط الارثوذوكس في ضحايا مجزرة ماسبيرو ومواساتهم في هذا المصاب ,والوقوف الى جوارهم حتى ينتهي تحقيق عادل ومحايد لاثبات الجريمة وادانة الفاعل ومنع تعرضهم للظلم مرة ثانية بل والموت دون حقوقهم الشرعية لكن ما لا افهمه ولا اتفهمه ولا اسامح فيه لا صديق ولا بعيد (بعد توضيح رؤيتي تماما له ) ان نتنازل عن ثوابت عقائدية تفصل بين ديننا الذي جاء به النبي محمد صلى الله عليه وسلم وبين غيره من الاديان التي تكفر به وتكذبه من اجل ارضاء اي احد او مواساته فمن اسخط الله في رضا الناس سخط الله عليه واسخط عليه من ارضاه في سخطه واقسم بالله ان الصليب من سخط الله وان ادعاء ان ابن الله يسوع المخلص صلب على الصليب هو كذب على الله فما لله ابن ولا له ند اقنومي ينشطر فيه الرب الى اقانيم ثلاثة( الاب والابن وروح القدس) , ان يرفع المسيحي صليبه فهو شأنه ودينه وأما المسلم الذي فقد الغيرة على دينه وضلت بوصلته الايمانيه حتى اضحى التوحيد مثل التثليث ورفع المسيح الى السماء كصلبه .
اخواني واخواتي رجاء لا تجعلوا شدة المصاب وحالة الارتباك والسيولة الفكرية ان تنسينا ما نؤمن به , يجب ان نفرق بين المعاملة الطيبة والتعايش المشترك الواجبين لكن ابدا لا يكون ذلك على حساب ما نؤمن به وفي الايات والاحاديث التاليه ما يفيد من اراد الاستفادة .
قال الله -تعالى-: (وَمَا قَتَلُوهُ وَمَا صَلَبُوهُ وَلَكِنْ شُبِّهَ لَهُمْ) (النساء:157)
عن عَائِشَةَ رَضِيَ اللَّهُ عَنْهَا قالت : " إِنَّ النَّبِيَّ صَلَّى اللَّهُ عَلَيْهِ وَسَلَّمَ لَمْ يَكُنْ يَتْرُكُ فِي بَيْتِهِ شَيْئًا فِيهِ تَصَالِيبُ إِلا نَقَضَهُ " . رواه البخاري (5952) 


قَالَ رَسُولُ اللَّهِ - صلى الله عليه وسلم - « وَالَّذِى نَفْسِى بِيَدِهِ لَيُوشِكَنَّ أَنْ يَنْزِلَ فِيكُمُ ابْنُ مَرْيَمَ حَكَمًا مُقْسِطًا فَيَكْسِرَ الصَّلِيبَ ، وَيَقْتُلَ الْخِنْزِيرَ ، وَيَضَعَ الْجِزْيَةَ » ، رواه البخاري ومسلم وأبو داوود


وفي حديث عدي بن حاتم -رضي الله عنه- أنه دخل على رسول الله -صلى الله عليه وسلم- وعليه صليب من ذهب، فقال له النبي -صلى الله عليه وسلم-: (اطْرَحْ عَنْكَ هَذَا الْوَثَنَ) (رواه الترمذي، وحسنه الألباني)




** فيه ناس حتقول مسمعناش الكلام ده قبل كده , ده على اعتبار ان انت سمعت كل حاجة في الدين وحافظ القران كاملا ومعاه كتب الحديث السته ؟


**فيه ناس حتقول المهم اللي في القلب , ايوه يا افندم عندك حق لان لو في قلبك اعتقاد صحة صلب المسيح  متبقاش مسلم اصلا اما رفعه بدون اعتقاد فده اللي احنا بنتكلم فيه انه مش شرعي , ده وثن معبود من دون الله يتوجه الناس اليه في صلاتهم (هما احرار انت لا انت على ديانة تانية ) , في تعريف الايمان عند اهل السنة انه ما وقر في القلب وصدقه العمل , اما تصديق القلب فقط فهو تعريف الايمان عند المرجئة .


فيه ناس حتقول وايه المشكلة لما نواسيهم ونعتبرها دعوة للاسلام , ببساطة انك ممكن تواسيهم بمليون وسيلة تانية  لافيها مخالفة ولا شبهه شرعية , ولو مت وانت بتجيبلهم حقهم من ظالمهم بأذن الله تكون شهيد بس انت بتستسهل , اما موضوع دعوة للاسلام ده فالدعوة مبتجيش بمخالفة الاسلام نفسه في اصل من اصوله ولا حتى شبهة مخالفة اذا كنت لسه مش مقتنع فاتق الشبهات واستبرىء لدينك مما يشوشه ويزيل حدوده الفاصلة . قد تبين الرشد من الغي فمن يكفر بالطاغوت ويؤمن بالله فقد استمسك بالعروة الوثقى وقل الحق من ربكم فمن شاء فليؤمن ومن شاء فليكفر , وما على الرسول الا البلاغ , انت ملكش دعوة انت تبلغ الرسالة بالحسنى بس متزودش فيها حاجة ولا تنقص منها حاجة اللي عايز يقبلها فنعمالثواب لك وله واللي يرفضها فحسابه على الله انما تتنازل عن شيء من الدين علشان خاطر يشوفك حلو ومودرن وسبور فانت بتدعيه لهواك مش لدينك  .


اللي متخيل ان ازالة الحدود الفاصلة بين الديانات وعدم الدعوة للدين مصلحة يبقى واهم , انت لو بتحب صديقك المسيحي بجد وبتحب ليه الخير كنت دليته على طريق الايمان الصحيح بالله مش زينتله ضلالات المجامع المقدسة .


** الدين حجة على العباد وليس  فعل احد من العباد حجة على الدين لذا فقد جئت باحاديث صريحة في النهي ولم اذكر حديث من تشبه بقوم فهو منهم نظرا لعدم تيقني من صحة الحديث من ناحيه بالاضافة ان ظاهر النص موهم لاشياء انا مقصدهاش .


** نصيحة اخيرة بخصوص الهرتلة اللي كتبها بلال فضل على تويتر ومقالين متتاليين في جريدة التحرير في الترحم على موتى الكفار , هوه نقل من كتاب القران والسلطان لفهمي هويدي من فصل (الله ليس منحازا لاحد ) اللي يعرفه او يعرف يوصله يقله في نفس الكتاب ونفس الفصل اللي انت كنت بتنقي فيه كلام يثبت وجهة نظرك وبس (ودي طبعا حيادية معهودة من كتابنا الكبار ) يقول الكاتب 
(ويضيف الاستاذ الامام (المقصود الشيخ محمد عبده رحمه الله ) ان حسنات الكافرين لا تنجيهم من عذاب الكفر , وان خففت عنهم بعض العذاب الذي كان يرتقبهم على بقية السيئات الاخرى ) انتهى صفحة 195طبعة دار الشروق الرابعة 1999, انا فعلا معرفش هوه مقراش الجملة دي ولا قراها وطنشها بس في الاخر ده جزاء اللي يقرا الدين من مقالات سيناريست صايع بحر وحاحا وتفاحه .ومش بقولك صدقني وكذبه , انت ربنا خلقلك عقل للتمييز والقراءة والاطلاع وسؤال اهل العلم لذين تثق في ورعهم وعلمهم , نعم لورع والعلم معا فالعالم بلا ورع لا يتورع عن افتائك بما لايرضي الله والورع بلا علم يفتيك بالمهالك فما بالك بمن لا ورع ولا علم .


يارب اقبضني اليك غير مفتون ولا ضال مؤمنا بك مقصرا في حقك واشهد ان لا اله الا الله وان محمدا عبدالله ورسوله وان المسيح عبدالله ورسوله وكلمته القاها الى مريم وروح منه وان الانبياء حق والجنة حق والنار حق والملائكة حق وكتب الله حق ما علمنا منها وما لم نعلم والقدر خيره وشره مكتوب عندك لا يصير الا ما قضيت ولا يكون الا ما شئت وحدك .

هناك 14 تعليقًا:

ويكا يقول...

السلام عليكم ورحمة الله وبركاته
بص

انت بوستاتك طويله اوى وما انتش راضى تسمع الكلام وتقصرها شويه علشان الناس تعرف تقراها

بس بالوقت هتعرف تظبط الحكايه دى ان شاء الله انا واثق

ويمكن اغلب المرات على ما بخلص البوست بلاقينى مافياش حيل اعلق

اما المره دى
فالبوست هو اجدر بوست يرتبط بعنوان المدونه عندك
فيه ملخص كافى وافى للاشكال ما شاء الله وان كنت لاحظت انك كنت متوخى الحذر شويه من الجماعه اللى بيتلككوا دول وبيحدفوا اتهامات ويقلبوا المواضيع مما جعلك تقل فى الاذهاب فى الادله الشرعيه وخطورة الامر وما قد يؤول اليه

بس ماشى لانك برده تعتبر وفيت الحمد لله



كلامك واستشهادك رائعين


عامل مجهود فى البوست وتعبت ودورت على باق الكلام اللى استشهد بيه بلال فضل

وده شئ طيب جدا جدا ( احترافى )


فى الاخر عايز اقولك

انا كاتب التعليق بالشكل ده وكأنى سبت الفكره الرئيسيه ومشغول بتقييم العمل

بس الحقيقه مش كده خاااااالص


انا بس مبسوط من البوست وتوقيته


وعلى فكره انا بعد ما اضغط على زرار ارسال ان شاء الله

هروح اخد البوست كوبى وبيست فى المدونه عندى مش حتى اللنك بس

لا الكلام كله

من غير استأذان طبعاً يعنى

وياريت تيجى تعلق عليه وتقولى رأيك ههههههههههههههههههههههه




بجد تسلم

الميكروباص يقول...

أنا من مؤيدي العدل ومحاسبة المخطيء مهما كان
ومن مؤيدي تطبيق القانون على الجميع
فإن اخطأ المسلم تتم محاسبته- وغن أخطأ غيره أيضا تتم محاسبته
لكن
ماذا تفعل إن شاهدت احد المسلمات تهتف "بالروح والدم نفديك يا سيدنا" وهذا للبابا شنوده؟
البعض يتصور انه بهذه الطريقه يدافع عن الحق ويظهر امام الناس في مظهر البطل
دافع عن الحق بأي طريقه- لكن ليس لدرجه ان تفدي "سيدنا" بالدم والروح!

Unknown يقول...

السلام عليكم ...

طبعا مؤيد لكل ما حرف ذكرته.. بل أشكر لك أسلوبك المحترم في العرض..
وصدقني الحالة العامة للمسلمين هو الاشمئزاز من هذا الفعل الذي يقع فيه بعض جهال المسلمين (كالصورة الشهيرة للفتاة المحجبة التي تقبل الصليب، والشاب الملتحي الذي يرفع صليبا أكبر منه!!)...

بالمناسبة كان نفسي تشوف تعليق 6 إبريل على الصورة التانية (وهي اللي منزلاها): عمالة تمدح في الشاب على إنه سلفي!!! ههههههه... باختصار هو ده السلفي اللي يرضوا عنه.. مش هيرضوا عن السلف حتى يرفع الصليب!!! طبعا (جتهم خيبة) أتحدى أن يكون هذا الشاب عرف السلف اصلا يوما... هو كل من لبس جلبية وساب دقنه يبقى سلفي؟!!!!!

على فكرة الرابط رائع في الرد على بلال فضل بالرد العلمي:

http://www.almesryoon.com/news.aspx?id=81848

مصطفى سيف الدين يقول...

شوف يا اسلام متفق معاك في كل اللي كتبته بس نقطة واحدة بعد اذنك انت بتتكلم عن حالة فردية ولا عادة اجتماعية
يعني شخص واحد رفع الصليب علشان سبب معين في وقت معين كانت حالته النفسية معينة ولا هو دايما وغيره و غيره بيرفعه عمال على بطال
احنا بنتكلم عن شخص واحد بس وفي وقت معين في حالة نفسية معينة اخدته حماسة معينة يبقى هو آثم على الله حسابه انما اللي شايفه ان الكل بيقول ان ده هدم للعقيدة والعقيدة مقرها القلب فهل اطلعتم على قلبه ولا انما الاعمال بالنيات فما كانت نيته هل كانت نيته كفر ام رياء ام محاولة منه للتقرب الى الله في كل نية من هذه النيات لها حكمها ولها حسابها عند الله
صدقني يا استاذ اسلام الحالة كانت واحدة وستمر مرور الكرام لكن كثرة الحديث عن هذا الموضوع ستجعل
اولا هذا الشخص الذي صورته تملأ كل الشبكة العنكبوتية يشار له بالنبان ويصفونه بانه كافر فهل ستتحمل نتيجة تلك الفتوي ؟ وربما يضيق صدره بالاسلام والمسلمين حينما يرونه ينبذونه فهو اعلم بنفسه واعلم بما فعل فرفقا
ثانيا ستجعل هذه الفتوى بعض العلمانين يقولون ان ما فعله هذا الشخص قد ضايق الاسلاميين فلنفعل مثلهم كي نضايقهم لا اكثر وتتعدد وتتعمم وتصبح المشكلة اكبر بدلا من صورة مرت وانتهت
ثالثا كان اجدر بنا بعد ان ينسى الناس تلك الصورة بالذات تنبيههم وتوعيتهم وليس الآن فالحديث الآن قد يزيد الضغينة بين الطرفين
رابعا بالامس القريب قد حدثتني انني عندما اكتب شهيد وانا مسلم فانا اقصد المعنى الاسلامي لها اذا عندما يرفع شخص ما الصليب فهو يراه بالمعنى الاسلامي مجرد قطعة خشب لا تضر ولا تنفع اعلم ان ذلك مناف للسنة لذلك قلت انه اثم ويجب عليه التوبة
تحياتي واتمنى ان اجد لديك صدرا رحبا كما تعودت منك لتعليقي ولا تتهمني لرايي كما اتهمني آخرين بالافتتان في ديني فوالله ما قصدت من تعليقي الا ان اصل به الى كلمة حق فكلانا يريد الخير للاسلام

تحياتي

Unknown يقول...

العزيز مصطفى سيف الدين

انها ليست حالة فردية بل موقف متكرر عقب كل حادث عنيف يصيب الاقباط (فعلا احنا محتاجين لوقفة علشان ميحصلهمش اللي بيحصل , بس حقيقي ده شيء مش بايدينا اذا كان اشد الاجداث عنفا بتتهم فيها السلطة نفسها ) ده غير كتيير من الاخوة المدونيين اللي بيخلوا الصليب علامة على مدوناتهم مع الهلال (رمز الحزب الوطني لانه ملوش اي دلالة دينية )

** اعتقد في كلامك عن الاطلاع عن القلب كأنه كلام لحد تاني :)) لاني قلت بالظبط (فيه ناس حتقول المهم اللي في القلب , ايوه يا افندم عندك حق لان لو في قلبك اعتقاد صحة صلب المسيح متبقاش مسلم اصلا اما رفعه بدون اعتقاد فده اللي احنا بنتكلم فيه انه مش شرعي) وواضح جدا اين فرقت بين الاعتقاد القلبي وبين الفعل بدون اعتقاد


**برضه صدقني مش حالة واحدة دي بقت امر متتكرر ولو مش مصدقني ادخل على تويتر وشوف التعليقات على موضوع متصل لبلال فضل وباسم يوسف

** نتكلم عن مشكلة عامة ولو لقينا الفتى وجها لوجه لكان الكلام مختلفاتماما في اسلوبه وطريقته .

** العلمانيون لا يتوانون ولا ينتظرون شيئا لمضايقتنا بل قل لاستئصالنا من المحيط السياسي وهم لا يتوانون عن استخدام المشكلة القبطية اسوا استغلال سواء تكلمنا ام صمتنا

** ايعدك مرة اخرى لما كتبته انا في الفارق بين الاعتقاد القلبي وهو ما لا اطلاع لنا عليه وبين الفعل وهو ما نعرفه ونراه في الظاهر وهو ما قلنا انه غير شرعي لم ازد عن ذلك .

بل صدري رحب لك وصفحتي تشرف بتعليقك , بس ليا رجاء قلتهولك قبل كده بس انت نسيت , انا طبيب بشري (مقيم قلب وعناية ) لو مصر تناديني بلقب , اما انا فافضل تماما انك تناديني بدون القاب
لك تحياتي ومودتي وخالص تقديري لشخصكم الكريم

مصطفى سيف الدين يقول...

معلش بقى يا دكترة اصل كان عندي شحنة زايدة قلت افرغها عندك
يعني افرغها فين لو مش في العناية :)
بصراحة انا ماشفتش غير الراجل ده علشان كده كلامي كان عن حالة فردية ونفس الشخص مبيكررهاش فعلا كان في صورة ايام الثورة واحد مسلم رافع مصحف وجنبه مسيحي رافع صليب بس مش فاكر غيرهم
عن تويتر بقولك متتابعهوش وريح دماغك اصلا اللي هناك ناس بتقول اي كلام وبس من كل الاطراف الاساس ان لسانك يكون طويل علشان تكتب في تويتر طبعا الا من ندر
اللي اتفقنا عليه عدم شرعية الفعل واثمه اما الكفر وهدم العقيدة فدي ربنا اعلم بيها و ده اللي بقوله من الصبح
وعلى فكرة حتة ان لو الراجل قدامك هتتغير طريقة كلامك انت ماشي بس مش هتتغير طريقة حد قرا كلامك ده واقتنع بيه وواجهه بيه بطريقة غير لائقة وبعدين ما يدريك ربما كان نفس الرجل يقرا كلامك طبعا انا مقصدش كلامك بالتحديد انا قصدي كلام اي حد بيندد ويشجب بعصبية تصل للتكفير علشان كده بقولك رفقا
اشكرك يا صديقي وربنا يعلم انا باحترم رايك قد ايه

غير معرف يقول...

الأخ الأستاذ الفاضل إسلام
لا يعني بأي حال من الأحوال أو أي شكل من الأشكال تعاطفي معك على المستوى الإنساني إيماني بعقيدتك أو إيمانك بعقيدتي ، فالأمر كله لا يعدو حالة إنسانية ، ففي أوقات المصائب و الأحزان يحتاج المرء ليد حانية تربت على كتفه و تواسيه بغض النظر عن عقيدة صاحب اليد. أنا مع المواساة على المستوى اللفظي و العاطفي و ضد أن تتجاوز المواساة حدود العقائد ، كما أنني ضد ما حدث من المصريين الأقباط عند ماسبيرو و في نفس الوقت أشعر بجلل مصاب أهل كل فقيد ، و أطالب بمحاسبة كل من أجج في نفوسهم المشاعر الطائفية التي أدت إلى هذا المشهد الكارثي

Unknown يقول...

ويكا
الحمد لله على كل حال , الردود على بلال فضل كتيييييييييييييرة القصة كلها في الخيانة العلمية اللي مارسها اعتقد اني دي تهد صورته من الاساس عند الناس اللي لسه بتشوف بعنيها مش بهواها
ربنا يهدينا بجد ويهدي الجميع



لورانس

متفقان تماما



ماجد

سلفي اه سلفي , سلفي ؟!انا حاسس اني عايز اشد في شعري , ده لو ليه شيخ كان قتله قبل ما يستتيبه

قريت ردود كتييرة بجد بس مستني راي رسمي من الازهر او دار الافتاء , لنقطة التنية انه في اي بحث علمي موضوعي حيتم اثبات الخيانة العلمية اللي قام بيها بن فضل

Unknown يقول...

مصطفي

براحتك والله يسعدنا تواجدك ويشرفنا تعليقك

فه في الثورة اكتر من صورة كان عليها الصليب فوق المصحف , وفيه صورة تانية لبنت محجبة وهيا بتبوس المصحف بجد ربنا يهدينا , انا مستنى تعليق الازهر بفارغ الصبر لان مش حيسكت بلال فضل غير كلام الازهر اذا كان فعلا بيدور على الحقيقة مش بيزلزل عقائد الناس

Unknown يقول...

محمد محمود عمارة

متفق تمااااااااااااااااااااااما

فشكووول يقول...

آنا لى رأى اخر تماما
ان ما يحدث من الاقباط فى مصر ليس بدين ولكنها لعبة السياسه
الاقباط كانوا منزويين عن ممارسة السياسه ولما جم يمارسوها من عدم الخبره مارسوها غلط .. شويه شويه لما يتعودوا على ممارسة السياسه حنلاقى الكلام دا كله مش موجود ويعرفوا ان السياسه لها مكانها وان الدين له مكانه وان رجالات الدين لديهم ليسوا سياسيين بل رجال دين ويجب سماع كلامهم فى الدين اما فى السياسه فلا
تحياتى

Unknown يقول...

السلام عليكم..
أولا: أحييك على المقال الرائع وما ورد فيه من احترافية كبيرة في الاستشهاد والعودة للمصادر للرد على بلال فضل، بخلاف الأسلوب الراقي في الطرح.
ثانيا: أعجبني محتوى مدونتك بعد أن تعرفت عليها صدفة اليوم فقررت أن أتابعها باستمرار..
تقبل تحياتي..

الحمل والامومة يقول...

شكرا على الموضوع

العناية بالجسم والبشرة يقول...

تسلم ايدك , نرجو المزيد