الأربعاء، فبراير 08، 2012

مع (أبو دومة ) ذاك افضل

السلام عليكم ازيك يا ابو دومة عامل ايه 
2- الحمد لله اتفضل انت اكيد صاحب الباشمهندس سيد 
1- بابتسامة خفيفة : ايوه بالظبط يا ابو دومة , فين الباشمهندس دلوقت ؟ 
2-الباشمهندس من يوم الناس ما ماتت في بورسعيد ومعدش بيجي الظاهر شافله شوفه تانيه 
1- هههه ماشي يا ابو دومة انا جاي اقعد معاك شوية نفسي انسى الدنيا واللي فيها 


2-تشرف وتآنس يا استاذ انا حقوم اظبط الجوزة علشان القعدة تحلو وحتنسى الدنيا كلها 


1- ظبط يا سيدي محدش واخد منها حاجة , هما مش بيقولوا كده برده ؟ اظن فيه حاجات كتيير حناخدها معانا (يكلم نفسه ) ..... اييييييه هوه مفيش فايدة من الفذلكة دي هي مطبوعة على جيناتك (يكلم نفسه ايضا ) عندها جاء ابو دومة ووضع الجوزة في منتصف الغرفة 


2- منورنا والله يا استاذ , انما قلي بما انك صاحب الباشمهندس , انت زعلان زيه كده ؟


1- ومين مش زعلان يا ابو دومة كل الناس زعلانة , المهم اللي زعلان ده حيعمل في زعله ايه , وبعدين يا ابو دومة انا جاي علشان انسى مش علشان احكي في اللي تعبني 


2- يا بيه الباشمهندس بيقول ان انت راجل متثقف , ومينفعش المتثقفين يسكتوا , لازم يتكلموا ويعلموا اللي مش متثقفين , علشان معدش حد فاهم حاجة وكل الناس بتفتي وبتحكي في المحكي مش كده برده يا بيييييييييييه 


1- يسحب البييييييييييه نفسا عميقا من الجوزة اللي ابو دومة قال انها متظبطة تمام , ثم ينظر الى السقف وينفث دخانه , محدش فاهم حاجة يبقى اشمعنى انا اللي حفهم , احنا نسيب الكبارات هما اللي يتفاهموا ويفهمونا ويعملوا لجان تتقصى الحقائق تلاقي الحقيقة مرة فمترضاش تقولنا عل اللي بيحصل  , خلينا احنا هنا
                                             ففففففففففففففف-ككرررررر
2-طيب هما شهدا ولا ومش شهدا ؟


1- الظاهر مفيش فايده , بس يا ابو دومة , انك تقول فلان شهيد يعني بتقول فلان دخل الجنة فبتقول نحسبه ولا نزكي على الله احدا , ودي ناس اتقتلت غدر نتمنى من ربنا يرحمهم ويتجاوز عن سيئاتهم , الاهم من بحث مصيرهم في الاخرة يا ابو دومة ودي لا يعني حد في حاجة , ان احنا قصدي هما -الكبارات يعني - يشوفوا الاسباب ويعالجوها ويشوفوا مين المسئول ويحاسبوه يقوم المجرم يفكر مليون مرة قبل ما يفكر يعمل اي شيء شبه كده لانه طول مهو حاسس بالامان حيعمل كده تاني وتالت وطول ما الاغلبية واقفة معاه طبيعي انه ييجي على الاقلية علشان معندهوش اخلاق تمنعه .


2 -مممممم يهز ابو دومة راسه كأنه فاهم الكلام على مين اصلا , الا قلي يا استاذ انت شكلك بتصلي , امال بتشرب حشيش ليه ؟


1- وكأن الاستاذ شعر بوخزة ضميرية, ولكنه اكمل , بص يا ابو دومة , انت مش واخد بالك اني لسه فايق تماما ؟


2- اه فعلا


1- ده ليه بقى يا ابو دومة , ده لان ده مش حشيش , ده وهم انت وانا واللي زينا بيعيشوا نفسهم فيه علشان يهربوا من الحقيقة زي ما ما الكبارات بيعيشونا في الوهم علشان عارفين ان احنا منستحملش الحقيقة , ويمكن كمان علشان شايفين ان الحقيقة حرام , فرت دمعه من عينه ثم............ كرررررررررررررررر ففففففففففففوووو(صوت الشيشة)




2-ياااااااااااه حتى تجار الحشيش بقى معندهمش امانه , فعلا الامانه بقت عمله صعبه . اغير لك الحجر يا بيه ؟




1- ابتسامه حزين , زي بعضه ,




2-انما قلي يا بيه هوه الشيوخ اللي في المجلس الشعبي حيمنعوا الحشيش ؟




1- الله يخرب بيت اللي شار عليا بشورتك يا ابو دومة , يا عم عايز اركز , عايز اعيش اللحظة , انت بوظتها خالص 
بص يا ابو دومة يا صديقي العزيز يا حبيب قلبي , الحشيش اصلا ممنوع  , الحكومات الطاهرة اللي فاتت كانت منعاه , بس يمكن لو المجلس العسكري حب يتاجر فيه , شيوخ مجلس الشعب يطلعوله فتوى انه حلال علشان مصلحة البلد 




2- ابو دومة وكأنه خد الكلام بجد , بس المفتي وشيخ الازهر طبعا مش حيسكتوا 


1- متعصب من ان اكلام بقى كله بجد , لا دول يا ابو دومة فعلا مش حيسكتوا لانهم علشان يثبتوا انهم رموز الاعتدال وانهم الجهه الرسمية في البلد اللي واخدة مقاولة الفتوى حيقولوا ان تجارة الحشيش واجب شرعي واشتري قرشا حشيشا تنقذ اسرة فقيرة و وضرايب بقى ودخل قومي وحاجات كده يعني , ظبط نفسك يا ابودومة وابقى عضو في المجلس العسكري وانت البلد كلها تبقى بتاعتك واول حاجة فيها هيا الازهر وشيوخ القبة , نفسسك تقتل حتقتل , نفسك تسحل حتسحل , نفسك تغتصب حتغتصب وكله بالقانون , اهم حاجة في البلد دي اللايحة والقانون


2- لايحة ايه دي يا بيه , انت كلامك حلو والله , بصراحة انا مش فاهمه بس هوه باين عليه حلو 




1- ههههههههههههه اففففففففففففففففف -دخان متصاعد كما قطار الفحم من فمه - عارف يا ابو دومة الكلمتين اللي انت قلتهم دول بيوصفوا حال ناس كتيييييييير م اللي بيقولوا على نفسهم ثوار , يعني هما مثلا شايفين ان كلام البرادعي صح , وممكن يكون صح فعلا , بس المشكلة انه بالرغم انه مش فاهم بيدافع عنه باستماته كانه عقيده , عارف ليه لانه شايف انه باين عليه حلو , وحط المثل ده على ناس كتيييييير من اللي بيحبوا الشيوخ , اما اللايحة دي عاملة شبه الارادة الشعبية كده لبانة لما السكر اللي فيها يروح تترمي , مش ضروري تفهم . اللي فهموا منابهمش غير العذاب 




2- لا يا بيه انا فاهم كل حاجة , مش انتو بس اللي فاهمين , مصر فوق الجميع واهم حاجة مصلحة البلد ومصلحة البلد مع السكركرار, واللي عاييزين طنطاوي يمشي دول عايزين يهدوا البلد ويضيعوها وعلشان كده لازم ينضربوا بالنار والشعب مع ضربهم بالنار بس المشيير هوه اللي راجل طيب وسايبهم .




1-صح يا ابو دومة انت فاهم كل حاجة !!!  بس على فكرة مصر تحت الجميع مش فوقهم لانها ولا حاجة من غير بني ادمين  ................غير حجر الشيشة يا ابودومة .



هناك 13 تعليقًا:

ENG./ELSAYED,PMP يقول...

هههههههههههههه
الله يخرب بيتك يا ابو دومه ... بوظت الدكتور اسلام ...!
بص انا مش مبطل ضحك ...!
بس فاتتنى قعدت الحظ دى ... وفعلا فيه حاجات كتير ف الدنيا متاخده بمنطق ... اصله شكله بيفهم ... اصله شكله حلو ...!

الله يخرب بيتك يا ابو دومه

شوف يا دكتور انا عارف قعدته ... مع ابو دومه مش هتقدر تفتح عنيك ...!

مصطفى سيف الدين يقول...

البوست جميل اوي
تسلم ايدك يا دكتور متفق معاك على كل حاجة فيه الا جزئية الازهر و المفتي فيها تحامل اكبر من الواقع ماسمعتش ان الازهر قال اللي عايز يقتل يقتل و اللي يسحل يسحل بالعكس انا شفت علماء الازهر وقفوا مع الشباب في محمد محمود و جابوا منصور العيسوي و استجوبوه بعكس ناس تانية كانت في قنواتها بتشتم البنت اللي اتسحلت و بتشتم اللي في محمد محمود
يا ريت حضرتك تبقى حقاني و تعطي كل ذي حق حقه
مش عارف حضرتك بتتحامل ليه على الازهر
انا مش مع قانون الازهر الجديد و مش حكاية الطيب او غيره بس مع وسطية الازهر و لما يكون بدا يهتم بقضايا البلد نقف جنبه

Unknown يقول...

مهندسنا الغالي
ربنا يجعل حياتك بسمة كبيرة

كنت حقلك تتعوض و بس افتكرت ان ساعة الحظ متتعوضش :)
ربنا يستر مش عارف حيقعد معايا اد ايه , انا عايز اتوب مش عاييز الص\مة توقعني في بير ابو دومة :)))))))

تحياتي

Unknown يقول...

كاتبنا المحترم , ودكتورنا الغالي مطصفى سيف الدين

ربنا يسلمك من كل سوء

طبعا عارف موقفك من شيخ الازهر (بودي والله اشوف حاجة تطمني , وفاكر كلمتك ليا زمان- يا هذا لا تلبس علينا امرا :)) )

طبعا محدش قال كده , والشيوخ اللي راحوا محمد محمود وحاولوا يعملوا اكثر من هدنة اكيد مشكورين وربنا ينتقم من اللي اعتدى عليه , لكن قطعا مقصدش الناس دي , للاسف وجهة نظري في الموضع ده مش ممكن تعجبك ,ممكن ييجي يوم واشرحها , باختصار حاليا شيخ الازهر ميختلفش نهائي عن شيوخ الشلفية اللي حرموا الثورة وطلع في التلفزيون يدعو الناس للعودة للبيت , لو عايز تبقة حقاني فعلا افتكرها زي ما انا اتكلمت عليه هو وشيوخ القبة لكن نفتكر شيوخ القبة وننساه يبقى مش عدل , المفتي العظيم بعد حادثة سحل الفتاة ذكر قصة سيدنا علي بتاعة المرأة اللي كان معاها خطاب من واحد من المسلمين لمشركي مكة بيحذرهم من هجوم جيش المسلمين على مكة ولحقها سيدنا على في الطريق بناء على اخبار النبي ليه , وقال لها سيدنا علي بعدما انكرت حمل اي خطابات ( لتعطينا الكتاب او لنعرين الثياب ) اسال المفتى ايه اللي فكره بالقصة دي دلوقت , اسأل مجمع البحوث الاسلامية عن سبب اصدار فتوى جواز بناء السور العازل على الحدود مع غزة في وقت كانت اسرائيل بتحاصرها من ناحية وعميلهم مبارك محاصرها من الناحية التانية , اسال شيخ الازهر اللي شادد حيله على بشار والقذافي وكان المجلس العسكري مش نازل قتل في المصريين وتشويه اعراضهم ,

عن دور الازهر الحالي ووثايقه المتتاليه , لو قلتلي سبب وجيه يخلي اكثر ناس راضية عن وثايق الازهر هما الفئة اللي رافضة تدخل الدين في اي نشاط اجتماعي واطلب منك طلب بسيط , مين شارك في صياغة الوثيقة ؟ بالاسماء


تاريخ الازهر يحمل الكثير مما يجب احترامه , واعادة دوره ليكون الممثل الوحيد لنشر الدعوة الاسلامية رغبة شخصية ليا وامنية نفسي اشوفها قبل ما اموت , لكن حتى هذا الحين انا غير راضي عن الدور السياسي المحسوب للازهر بداية من انقلاب 52 وبعض الاحداث قبلها , نهاية بتدخله السياسي في الوضع الحالي في محاولة اثبات وجود او محاولة تقليص نفوذ تيارات الاسلام السياسي وكأن مفيش حد بيتعلم من غلطاته فالازهر الذي فشل فشلا ذريعا في وقف المد الاخواني السلفي طيلة 40 عاما لن ينجح في ذلك اذا استمر في استعمال نفس الطريقة فطريقة وقف هذا التيار ونجاح الازهر وعودته الى تسيد الساحة الدينية محددة المعالم وواضحة اولها وقوف الازهر في وجه الظالم واعانة المظلوم وليس اخرها العمل الاجتماعي الذي برعت فيها الجهات ايت يحاول وقف نفوذها ,

اعذرني صديقي العزيز , انت ترى ان هناك من كان في هيئة السياسيات من كان محترما وهذا حقك اما انا فأرى ان كل من اعان مبارك ولو بصمته فهو شريكه سواء كان شيخ الازهر او مشايخ السلفية الذين البسوا حكمه شرعية ليست له , وان الحوة المفاجئة للازهر ليست بريئة والدليل هو قانون الازهر الذي تم تمريره قبل انعقاد مجلس العشب المنتخب (مع كل ضيقي منه ) بايام معدودة وادعاء بعض مستشاري شيخ الازهر ان هذا شأن داخلي بالازهر (تعريضا بعدم تدخل الاخوان ) ولو قلنا مثلهم فمن حق اي جهة في مصر ان تسن لنفسها القوانين وليذهب مجلس العشب الى بيتهم ليسن سكاكين بيتهم بدلا من سن القوانين , ان هذا التعجيل ليشي بان شيئا لم يتغير كما يشي باشياء اخرى لمن القى السمع وهو شهيد .

تحياتي اخي العزيز , ومن اجلك خصيصا يوما ما سأكتب عن الازهر(كمؤسسة مؤثرة في الحياة السياسية وليس كمؤسسة دينية اعتز بانها موجودة على ارض ولدت عليها ) وان كنت اتمنى الا اكتب شيئا ذو قيمة بعد اليوم .

Unknown يقول...

مصطفى
ده المفتي ايام الثورة
http://www.youtube.com/watch?v=HiCG2Ra_b4Y

مصطفى سيف الدين يقول...

على فكرة انا مش بدافع عن شيخ الازهر و المفتي انا بدافع عن الازهر ككل و عن مجمع البحوث الاسلامية اللي رئيسه فعلا شيخ الازهر بس فيه خيرة العلماء و نصر فريد واصل واحد منهم و يا ريت تراجع حضرتك دورهم كذا مرة من مبادرات تحمي المتظاهرين و تفض الاشتباك
انا مش عارف قصدك بشيوخ القبة بالظبط بس لو تقصد النواب بس يبقى برضه حضرتك متجني لأن في قنوات شغلها الشاغل فرض هيمنة المجلس العسكري و نهز راسنا و خلاص و لما ييجي حد يطلع منهم اسمه خالد عبد الله يقول للالتراس و الناس اللي ماتت هتقابل ربنا باي وش
ده يبقى معناته ايه؟
انا مش اعتراضي على كلامك بقدر ما هو استنكار انك تحط الازهر في الاتهام و سايب شيوخ قناة الناس مثلا ده فيه تجني
الشيوخ في مصر في كل البلد سواء ازهر و اعلاميين و نواب كله في دايرة تقبيل يد الحاكم و ان كان الاوضح هو خالد عبد الله و امثاله
انا عارف المفتي قال ايه ايام الثورة و عارف محمد حسان قال ايه و غيرهم قال ايه مفيش داعي حضرتك تجيب الفيديو بس مادام ارتضينا ان مشايخ السلفية يقودونا بالرغم من موقفهم يبقى منعترضش على وجود المفتي
اما عن قانون الازهر انا برضه معترض عليه جدا و معترض على طريقة عرضه و تمريره بس دي لعبة المجلس العسكري اكتر من كونها لعبة الازهر اعتقد الازهر بيعمل القانون و قدمه للمجلس العسكري ليه بقى المجلس وافق عليه المتهم يا سيدي في قضية قانون الازهر هو المجلس العسكري اولا و بعدين ثانيا من صاغوه
وضحت وجهة نظري؟

Unknown يقول...

وضحت دكتورنا العزيز , شيوخ القبة هما شيوخ قناة الناس الا من رحم ربي ممن لم يرض ولم يحضر ,
انا لم ولن اكون ممن يرتضي قيادة مشايخ السلفية للبلد , فاعتقد ان فيه غلطة في العنوان :)

بما انك قلت ان كل في دايرة تقبيل يد الحاكم فلا لوم علي في ادانة الجميع وعدم الرضا عنهم :))))))))))))

بيت المدونين يقول...

السلام عليكم ورحمة وبركاته

الزميل / الزميله المدون
يدعوك بيت المدونين

للمشاركه فى مبادرة " المعونه المصريه "
من خلال مدونتك الكريمه
المبادره ابتدأها بعض المشايخ المحترمين للرد على تهديد امريكا بقطع المعونه عن مصر
مع العلم ان هذه المعونه لا تغنى ولا تسمن من جوع فهى دائماً مشروطه ويتم انفاقها على الخبراء الامريكان الذين يتم اشتراط تواجدهم فى المشاريع التى توجه لها المعونه ، بالاضافه الى المحاصيل التى يتم الاشتراط على مصر فيها شراءها من امريكا وأشياء اخرى كثيره لا مجال لحصرها
فبالتالى كانت هذه المعونه وبالاً على مصر . اقتصادياً وسياسياً وعزة وكرامه

وقد آن الاوان لوقفها واثبات اننا رجالا لا نمد الايادى لغيرنا

نريد ان :
نحيا كراماً

رابط المبادره على بيت المدونين :

http://bloggers-house.blogspot.com/2012/02/blog-post_12.html

رابط المبادره على الفيس هو :


http://www.facebook.com/events/307332485983060/


حساب البنك سيتم نشره قريبا
ان شاء الله

غير معرف يقول...

الأخ الفاضل دكتور إسلام
هيه فوقت ولا لسة علشان اكتب تعليق و تقراه؟ :))
أسئلتك مشروعة في حاجات و حاجات زودت السلخ على الناس فيها ، بس للأسف أبو دومة و اللي بيكلمه مثال بسيط لحال الناس و نوع النقاش اللي بيدور بينهم اليومين دول، تحياتي

Unknown يقول...

العزيز
أ محمد محمود عمارة
لا انا الحاجات دي مبتأثرش فيا :)
كنت اتمنى اعرف الحاجات اللي زودت السلخ فيها علشان اراجع نفسي

مختلف معاك ان الحوار بيني :) وبين ابو دومة هوه الحوار اللي بيدور بين الناس حاليا لان الاتنين متخانقوش ولا خاصموا بعض ولا اتهموا بعض بالجهل و لا كابروا ومعترفوش بمسئوليتهم في الحالة اللي وصلنا ليها كلنا
طبعا انت من المؤيدين لرأيي والا فانت من الناس التانيين :)))))))))))))

غير معرف يقول...

لا حضرتك خالص أنا لا من المؤيدين لك و لا من الناس التانيين ، أنا الطرف الثالث :))
طبعاً أؤيدك فيما وصل إليه الناس من اتهامات متبادلة لمجرد اختلافهم في وجهات النظر ، الغريب انهم أحياناً يلقون باتهامات لا يعرفون معناها.
تقبل تحياتي يا دكتور

just freedom freedom يقول...

رغي كثيرررر على قل فايده

بصراحه عجزت اكمل قرأه

راسي واجعني من خرابيطك

لو تختصر مره ثانيه يكون احسن

Unknown يقول...

crazy

شكرا لمرورك