الخميس، سبتمبر 29، 2011

30/9

انا مش عارف حنستمر نعد في ايام لغاية امتى , بس اللي اعرفه ان احنا مش ممكن نقف عن العد لغاية ما البلد دي ترجع لاهلها , يحكموا نفسهم بنفسهم لا بكاريزما القئد الركن المهيب ولا بعملاء الموساد بالوكالة  ,


متشغلش بالك باللي مش نازل -مش احتقار او اهانة - لا بس بفكرك انه هوه نفسه اللي منزلش يوم 25 .

بكره احلى بيك لو انت اختارت انه يكون احلى , ولو اختارت العكس متلمش الا نفسك .


عيش -حرية -عدالة اجتماعية (بالمناسبة لا كان في الطلبات دولة علمانية ولا دولة خلافة  ) بس بنأكد ان محدش نزل علشان قانون الطوارىء يعاد تفعيله ببنود كان لغاها المخلوع بذات سخصيته بكل ديكتاتوريته , ولا علشان نبدل حسني بحسين ولا علشان عسكر مش راضيين يقولوا لغاية دلوقتي امتى حيحلوا عن سمانا (بالماسبة برده قبل ما حد يقول فيه انتخابات حتخلص بعد ست شهور من دلوقت ؟؟؟!!! الانتخابات دي حتجيب مجلس تشريعي مش حكومة لان نظام مصر لازال رئاسي حتى تاريخه مش برطماني (مش غلطة ) , وده معناه ان اقصى حاجة حيعملها المجلس المنتخب اللي مخدناش وعد بغيره لغاية دلوقتي  انه حيعترض على وزير او يسحب الثقفة ومش عارفين في الوقت ده المجلس الاعلى للفلول  وقائد الثورة المضادة حيكون ركب سماعة يسمع بيها ولا لسه ؟ 


انا فعلا مش عارف بكره فيه ايه بس لازم نقول لا علشان نبرأ ذمتنا من التعذيب والطوارىء وسرقة تضحيات اللي ضحوا , علشان منرجعش تاني امن الدولة علشان ميبقاش فيه سيد بلال تاني , علشان ميبقاش فيه باشا بيعذب من غير ميتحاسب , علشان ميبقاش فيه بناء على توجيهات السيد ارئيس تاني , علشان منرجعش نتفرج على قنابل الفسفور فوق غزة في التلفزيون ومصر العظيمة مشاركة في الحصار ونرجع نقول هيه الناس بتكرهنا ليه (اكيد مش علشان احنا احسن منهم لان ده وهم ) , علشان منتفرجش على الغاز بيصدر بنص تمنه والمستشفيات مفيهاش خيوط جراحة ولا ابرة مغص , علشان محدش يدخل مسرطنات من غير ميتصلب في ميدان عام , علشان تمشي في الشارع بامان من وزارة الداخلية قبل البلطجية . 




بكره احسن لو انت اختارت كده , واسوأ لو انت اختارت برده كده . خد فرصته لتسليم السلطة 8 شهور ولسه بيماطل ولغاية دلوقتي مقالش امتى حيسلمها , متنتظرش مني اني اتفرج لغاية ميسلمنا احنا لملك الموت او السجّان وصدقني الموت ارحم من سجن مصر العسكري -اقصد السجن الكبير -


رجاء اللي ميعرفش يعني ايه قانون طوارىء وحكم عسكري  ميعلقش 



هناك 16 تعليقًا:

فاتيما يقول...

زى ما قولت ف أول التدوينة يا اسلام

هنفضل نعد
لحد ما نجيب بكرة
بتاعنا

مش بتاعهم

خير

ان شاء الله خير


انا متفائلة
رغم كل المحبطين حواليا

ماجد القاضي يقول...

السلام عليكم

معاك يا إسلام... الانحراف بيبدأ صغير جدا بين ضلعي الزاوية عند رُكنها.. لكن المسافة بين الضلعين بتكبر مع الأيام لغاية ما نلاقيها (بعد30سنة) أصبحت كبعد المشرق عن المغرب!!!!!!
دلوقتي قانون الطوارئ مخدوع فيه ناس كتير (موافقين عليه علشان البلطجية بتوع السفارات والداخلية والذي منه!!!) لكن مع الأيام بتزداد صلاحياته لغاية ما يبقى النفس اللي بنتنفسه محسوب علينا بالقانون..... قانون الطوارئ....

وبرضه اللي ما انضرش بقانون الطوارئ ولا ببلطجية أمن الدولة ما يعلقش!!!!

تحياتي وحيرتي مما يأتي به الغد.. القريب والبعيد....!!!!
................
ملحوظة أطول من التعليق:
مش كل اللي مش هينزل بكره مانزلش يوم 25 .... لكن هي دي طبيعة المعركة... ناس ثورية ليس لها حسابات ولا حد تخاف عليه... وناس مسيسة لها كيانات ومؤسسات بتحسبها بدقة وبتوازن مصالح وخسائر الوطن من وجهة نظرها... المهم ماحدش يخون التاني!!!

يوم أحد الشباب الثائر الذي يؤمن فقط بحسابات اللحظة أراد الخروج.. والكبار والحكماء (ومنهم النبي) كانت لهم حسابات أعمق... لكن الأغلبية حكمت.. بينما ليس عندنا قدرة على معرفة يقينية من الأغلبية.. (اللي نازل) ولا (اللي مش نازل).. مع أني أزعم أن الإسلاميين اللي مش نازلين هم الأغلبية...!!

لورنس العرب يقول...

لو كان مجلس الشعب "المنتخب" موجود لم يكن هناك أي داعي للنزول غدا- لكن، هل تضمن لي عدم نزول الناس بعد انتخابات مجلس الشعب؟
لفت نظري جميه خطيره كتبتها انت في اول فقره
"متشغلش بالك باللي مش نازل -مش احتقار او اهانة - لا بس بفكرك انه هوه نفسه اللي منزلش يوم 25"
وبالتحديد "مش احتقار ولا إهانه" ... يمكن انت ترى هذا، لكن من اتعامل معهم على النت يوميا أو بمعنى أدق الميدين للنزول لا يرون هذا أبدا
انا قلتها مسبقا- قلت لو مبارك تنحي الناس مش هاتمشي- ولو تم وضعه في القفص الناس مش هاتمشي- وإلى الأبد الناس مش هاتمشي، لأن القصه لم تعد مطالب بقدر ما هي لعبه اعتراض
انتظر مجلس الشعب وإن اردت إلغاء الطواريء فتحدث مع نائبك- وإن اردت فعل اي شيء فعندك النائب تحدث معه كما تشاء
انا لم انزل يوم 25 يناير- ولكني اكتب ضد مبارك والحكومه من 10 سنين كامله وكان لي تأثير -كغيري- على مختلف المنتديات وساهمت في عمل شيء للوصول إلى الوضع الحالي وخلع مبارك
لكن مع الاسف في النهايه اكتشفت انه يتم النظر إلى الناس فقط الموجودين في الميدان- ومن لم ينزل يبقى فلول وحزب الكنبه- فالآن اكتفيت بالفرجه- ولا اتمنى الفشل لأحد لأن المركب عندما تغرق ساغرق مع الباقين
لا اريد ان ينظر لي أحد من باب الشهره- ولكن تم إلغاء وجهات النظر الأخرى تماما
لن أقول لك ولغيرك -لا تنزل- فلم يعد هناك قيمه للكلام
كنت زمان عندما ارسل ما أكتبه للناس عبر الميل فإن كلامي يصل لآلاف الناس في ظرف أيام- كل واحد يمرر الميل لصديقه- أما الآن فلأني معترض على بعض الامور أصبحت "لا أطاق" لأني اطالبهم بعدم النزول- وتحولت إلى حزب الكنبه
انا اعرف ما هو قانون الطواري-واعرف الحكم العسكري جيدا- واعرف ما هو امن الدوله لأني نزلت عليهم ضيفا - ولكن أيضا أعرف أن البلد تغرق واشاهد هذا بنفسي يوميا من خلال العمل

ربك يصلح الأحوال

واحد من الناس يقول...

فاتيما

الحياة أمل لو راح راحت معاه الحياة ونورها

ان شاء الله بكره حيجي احلى غظب عنهم

واحد من الناس يقول...

ماجد وعليكم السلام

اعتقد ان بوستي اللي فات يغني عن الملحوظة :)
بالمناسبة انت سمعت عن تهديد الدكتور البلتاجي بان المجلس لو مستجابش للطلبات يوم الاحد حتقوم ثورة الجمعة الجاية مش مليونية


خد دي حتعجبك هدية مني :)
http://www.almasryalyoum.com/node/305776
26-1-2011

واحد من الناس يقول...

لورانس
لازم تعرف ان احنا 80 مليون باغلبية امية , والمتعلم مش قدوة اخلاقية الا فيما ندر , انت كمان متشغلش بالك انت ليك وجهة نظر ممكن في النهاية تثبت الايام انها الصح بس حقيقي لما تلاقي الاغلبية العظمى من اللي حواليك مش موافقة او عنيفة معاك في الرد مش شرط تكون انت غلط بس الامر يحتاج مراجعة نفس

سأتحدث مع النائب ويتحدث النائب مع المجلس اللي هيعمل ودن من طين وودن من عجين , الخوف كله من 60 سنة تانيين , اكيد عارف ان البند السادس من بنود ثورة يوليو هي حياة ديمقراطية سليمة وبعد 60 سنة لما يحدث فالتمس لمن لا يثق في العسكر العذر
تحياتي

ويكا يقول...

المشكله انها اتفركشت

العلمانيين عايزين يعملوا ثوره جديده بالكامل علشان يعملوا مجلس ثورى جديد بحجة ان العسكر ما نفعشى وبعد كده انت فاهم الباقى .........

والاسلاميين ذو القوه الحقيقيه فى ارض الواقع متخوفين جدا جدا من العلمانيين بحكم استغلال العلمانيين للاعلام وسيطرتهم عليه وتخويفهم للشعب من الاسلاميين مما وضعهم فى جبهه عدائيه لم يكونوا يريدوها من الاول

والبعض نادى مره بثوره ثانيه من فتره لو تفتكر وقالوا علشان سرعة المحاكمات والكلام ده ولما الناس نزلت طلعت من تحت الارض لافتات تانيه خالص ضد الاستفتاء ورغبة الشعب مكتوب عليها الدستور اولا ومجلس رئاسى والكلام ده برده

طول ما كل واحد خايف على اللى له وم راضى يسترجل مع التانى هتفضل كده

وعلى فكره مفيش حاجه هتحصل بكره وهتشوف

من غير اسلاميين مفيش مصر
لان بكل بساطه مصر بلد اسلاميين ( لا اقصد سلفيين ولا اخوان ) لكن اقصد الشعب
الشعب لن يقبل فكر العلمانيين مهما ضلله لانه شعب بفطرته يعشق اعتناق الديانات ليسلم لها نفسه وحياته

ويكا يقول...

بس انت ما قلتش برده انت مع النزول بكره برده ولا لاء ؟؟؟

واحد من الناس يقول...

انا مع النزول والاعتصام لغاية ما العسكر يتنازلوا تماما عن السلطة ويرجعوا ثكاناتهم ولو امكن يتحاكم طنطاي وعنان على عدم حماية الشعب اثناء الثورة من الشرطة والبلطجية

لازم ننزل اذا كنا خايفين على مصر من العلمانين علشان نمنعهم من السيطرة والتحدث باسم الثورة فرض انتخابات حرة نزيهه محدش حيقدر يجادل فيه

ممكن المصريين يكونوا في اغلبهم مجب للدين زي ما ناس كتير بتقول , لكن المحب غير اللي مستعد يضحي والنقطة الاهم ان الاكثرية تطيع من غلب

ماجد القاضي يقول...

السلام عليكم

جزاك الله خيرا إسلام.... بجد هدية حلوة :)

لورنس العرب يقول...

شفت اللي حصل اليوم؟؟؟

لورنس العرب يقول...

الدنيا بقت عامله زي طبق الكشري

واحد من الناس يقول...

لورانس

كنت عايز استعبط واتقولك ايه اللي حصل

مفيش طبيق كشري ولا حاجة حتى طبيق الكشري معروف مكوناته وبما اننا نعرف مكوناته فيمكن التعامل معاه .

ببساطة راحوا ناحية وزارة الدفاع لقوا عددهم قليل رجعوا بس خلصت :)

مصطفى سيف الدين يقول...

شكرا استاذ اسلام
المقال اتنشر بالخطأ مني وتم حذفه بعد نشره بدقيقة فالقصة لم تنتهي وكنت احتفظ بها في المسودة لكنها نشرت خطأ اشكك للتنبيه

واحد من الناس يقول...

د.مصطفي

لا شكر ولا حاجة انا بس كان نفسي اقراها لاني حسيت انها حلوة

الموضة والازياء يقول...

اظن انها خطوة ايجابية وقف العهمل بقانون الطوارىء