الخميس، سبتمبر 22، 2011

زهق غير ثوري

** كان يقف امام مقدم الشرطة بأمن الدولة يسأله الاخير عن اسماء الاخوان المسلمين بالكلية فيرد الاول وهو يستجمع شتات شجاعة ويتمثل الثبات في هذا الموقف الذي لم يتخيل يوما ان يقف فيه (آنا اسف ) لم ينكر معرفته بهم لأنه كان يستحي من الكذب ولم يش بهم لانه يستحي من الله فاعتذر عن الاجابة , ثم بعد سنين طويلة وجد من يقول ان الاخوان كانوا على علاقة بأمن الدولة , هل يجب ان يصدق ان امن الدولة قضى على مستقبل الالاف من المتدينين ثمنا لهذه العلاقة . لا عزاء للعميان . 




** احتجزه امن الدولة مرة فوجد ما يزيد عن ال20 فردا لا تهمة لهم الا انهم ملتحون كانوا يستمعون الى خطبة الجمعة بمسجد سلفي لا ترضى عنه اجهزة الامن , ومرة اخرى اعتقلوه في امن الدولة فوجد 4 افراد من السلفيين يقسم احدهم انه لا يعرف النوم ليلا الا عندما يأتي لامن الدولة لانه يعمل صيادا (كم هي وظيفة تؤثر على امن المخلوع لعنه الله ومن والاه وكل من دافع عنه وعن نظامه ) فلا يجد وقتا للنوم , ثم يسمع من يتهم السلفيين بأنهم عملاء لأمن الدولة , فاذا ما ضيقت عليه الخناق قال بعضهم فقط !!,
 صديقي وبعض المصريين ايضا كان عميلا لامن الدولة -هل هذا يكفي لرمي جميع المصريين بالعمالة او الصاقها بجنسهم - وبعضهم اساتذة جامعات.


** بعض المصريين كان مبارك وصفوت وسرور وزكريا عزمي والعادلي وحسن عبدالرحمن وظباط امن الدولة  , واستاذ الجامعة المريض نفسيا بوهم انه عالم او ربما عالمة  , ومن سجن المسلمات في اديرة وبيوت تكريس ومن سلمهن اليه ومن سكت عنهم , ومن حرق كنيسة امبابة ومن فجر كنيسة القديسين ومن اغلق التحقيق فيها , ومن يترك عمله من الساعة ال12 ظهرا ومن يعامل الناس بكل وقاحة ومن يأخذ الرشوة صلى بعدها الظهر او لم يصله , ومن قام بثورة ابهرت العالم ثم جلس يشاهدها في التلفزيون ومن ظن ان الثورية هي شتيمة كل الناس وان محدش غيره بيفهم , وان المصريين كلهم مبارك -الا هو طبعا-   هذه تذكره لمن يعتقدون ان المصري هو من بدأ التاريخ وهو من سينهييه فقط لانه مصري فهلوي . 




** مسلم أمريكي في جيش امريكا الوطني للهجوم على مصر او احتلال مكة المكرمة  ,هل هو مذنب شرعا ؟؟
ان قلت نعم فخيانة الوطن احيانا  اذا تكون واجبة , وقد كفرت بمبدأ الوطنية والمواطنة فلماذا تلومونا اذا قلنا ان الانتساب للدين مقدم على الانتساب للوطن , واذا قلت لا فقد تجاهلت انت قول الله (لا تتخذوا عدوي وعدوكم اولياء تلقون اليهم بالمودة وقد كفروا بما جاءكم من الحق ) وقوله (قل ان كان اباءكم واخوانكم وأزواجكم وعشيرتكم وأموال اقترفتموها وتجارة تخشون كسادها ومساكن ترضونها أحب اليكم من الله ورسوله وجهاد في سبيله فتربصوا ...) التوبة , ياترى اول مرة تقرا الاية دي ولا قريتها وطنشت ان مفيش حاجة بتتقدم على الولاء لله , ولا الشيخ عكروت ابو ظعبوط قالك حلال حلال ويجوز وانت استفتيت مولانا العلامة الفهم الفهامة الشيخ قلبك النقي التقي من الشبهات والشهوات العالم ببواطن الامور ومعاني مابين السطور فدلك على طريق الوطن اولا وقبل اي شيء حتى الدين , فيه واحد  حيقول مفيش تعارض  , طيب بص للمثال اوله كده ولا لحقت تنسى ؟ بس دي امريكا مش مصر , مصر اسلامية !
 الحمد لله يبقى مصر اسلامية مش مدنية ولا هندية ؟
 انت بتلعب بالالفاظ وبتغسل دماغنا باستغلال الفهم الخاطىء للدين .
طيب مع السلامة انها لا تعمى البصار ولكن تعمى القلوب التي في الصدور 
انت بتكفرني ؟ 
يا عم انت حد كلمك انت بتتسلط على اي حاجة تعمل نفسك فيها ضحية علشان تعيش الوهم بين اقرانك انك ضحية الفهم الخاطىء للدين  ....... صوت آذان ...مش حتقوم تصلي ؟


انا مبصليش روح انت خلي ربنا بتاعكم ينفعكم (لا تنصدم رجاء فقد قيلت لي من زميل اسمه محمد كان بيقول على نفسه علماني وانه ضد الاخوان والسلفيين ولما قعدنا سوا قالها صريحة , لا تتعجب انها حقيقة كثيرين ممن يلبسون دور المنقي للدين من تخاريف السلفيين , يمكنك ان تعرفه من غيره من المنتقدين للاسلاميين من المسلمين المحترمين المختلفين في الرأي مع الاسلاميين (المحترمين مش الردّاحين والردّاحات ) من موقفه من تحكيم الشريعة بالرجوع الى فهم الازاهرة والمجمعات الفقهية الاسلامية العالمية والمحلية ).


** مره واحد سلفي ميعرفنيش قال عني اني علماني علشان كنت بدافع عن اسماء محفوظ ومرة تانية واحد سلفي (بعد تعذيب 20 يوم ) كان سبب في اعتقالي , ومرة سلفي تالت قال عني اني تكفير وهجرة , ومع ذلك مدونتي تشهد على عدد المرات اللي دافعت عنهم فيها , تقدر انت كمان تفهم انهم بني ادمين محترمين متدينيين حتى ولو كان في وسطهم اغبيا , وحتى لو كانت السلفية نفسها محل تساؤل عن مدى تطابقها مع فرعيات الشريعة وترتيب اولوياتها بل واحيانا مكان وضع الاحكام الشرعية ( بين باب العقائد والفقه ) .
--لأ طبعا الشتيمة اسهل وحتخليك من اصحاب العقول (اي والله واحده كانت بتقول على نفسها كده  انها من اصحاب العقول اللي الاخوان خسروهم بمواقفهم هههههههه) شفى الله مرضانا  .


** اكيد ليك تعليقات كتيير على تصرفات الاخوان وطريقة ادارتهم لمواقفهم للثورة , وانا كمان ليا تعليقات كتيير وضيق احيانا وتبرير احيانا ورفض كلي احيان اخرى , بس في الزحمة انت نسيت انها مواقفهم هما مش مواقفك انت - معلومة بسيطة ومن كتر بساطتها لسه مفهمتهاش انت - فيه نقطة تانية ان انا او انت اتصرفنا بشكل معين والاخوان اتصرفوا عكسه , انهم مش شياطين ولا اعداء لان برده في الزحمة ومين ثوري اكتر بننسى احيانا ان فيه احتمال ان احنا ممكن نكون غلط , ايه صعبة ؟؟ ههههه مش قلتلك ربنا يشفيك من مرض أنا .


جعل الله للمجتهد المصيب اجرين وللمجتهد المخطىء اجر , هذا في شأن الشريعة التي هي اعظم الامور وعليها تقوم الحياة فما بالنا بموقف سياسي يحتمل كل شيء من الخطأ الى الصواب وما بينهما من خير الخيرين وشر الشرين 
 اه معلش بما اني من المرضى , مؤيدي مبارك بره الحسابات دي لأن زي ما الاجتهاد فيه شروط للمجتهد وشروط للمسألة محل الاجتهاد (زي اي علم يعني مش علشان هوه دين يبقى سبهللة لاي واحد مبيعرفش اركان الصلاة من واجبتها انه يفتي )فيه  شروط مش منها انك تكون متعرفش لغاية دلوقتي ان وظيفة مبارك الوحيدة في مصر طول ال30 سنة هي افسادها من الداخل علشان تبقى صعبة عل اي حد ييجي بعده انه يصلحها (زي محصل في ثورة مكنتش في حسابات اللي شغلوه , او ثورة تانية بعدها مش ممولة زي ما فيه ناس تانية متخيلة عن الاولى  ) لا تنمية في سينا ولا اهتمام بانفصال الجنوب السوداني (اللي بالصدفة مسيحي اعلن عن ان سفارته في اسرائيل حتكون في القدس مش في تل ابيب ) , ولا اهتمام بامتداد مصر الجنوبي في دول المنبع , وانشاء منظومة افساد ورعايتها , وسرطنة الاغذية , وزيادة الدين العام , وتجهييل التعليم -اي والله تجهييل التعليم , وتدمير صحة المصريين بشكل ممنهج , مش حنعيد احنا بس بنفكر اللي زعلان على العميل عبدالامريكان  اللي بيتحاكم علي 18 يوم من 30 سنة .


اسف على الاستطراد , نرجع تاني  انت شايف ان المليونيات هيه وسيلة الضغط الوحيدة على المجلس في الوقت اللي انت تحدده .
اقرا الجملة تاني و تاني وانت تعرف الغلط فين .


** اعتراف :  الدستور اولا هوه الصح , ده مكنش نقطة الخلاف اصلا .......... نقطة الخلاف كانت على مين يحط الدستور , ناس كتيير كانت فاهمة بس كانت بتستعبط , لان في حالة الدستور اولا مكنش معروف اصلا مين حيحط بنوده هل لجنة معينة ولا لجنة منتخبة ولو منتخبة يبقى فرقت ايه عن مجلس شعب طالما كده كده الاسلاميين مسيطرين على الشارع , ولو مكنتش منتخبة كان حيبقى فيه استفتاء عليه ولا لا ولو فيه ايه اللي كان حيمنعنا من اننا نضحك على الشعب المغفل زي مكنتو بتقولوا , ويا ترى لو عملتوه انت ومعملتوش عليه استفتاء حنعترف بشرعيته اصلا وهل ياترى عارفين يعني ايه , عدة ملايين من المواطنيين ميعترفوش بشرعية دستور بلدهم ده معناه ايه . مش مهم تفهموا ولا تتناقشوا , المهم تقعدوا على تويتر وتشتموا اللي مش على طريقتكم , وتحلوا مشاكل مصر التويترية.


** سؤال اخير لاني تعبت وتعبتكم معايا ,اذا مكنش هدف الثورة الاساسي هو انتخابات (كوسيلة وليست غاية يداس من اجلها مبادىء ليس اقلها السكوت الطويل عن اتخاذ موقف واضح من قتل عدة مدنيين في مظاهرات ما بعد الثورة حتى لو كنت مختلف مع اسبابها والمشتركين فيها , لان  الحفظ على حياة الانسان وصيانتها هي من الابجديات والاوليات التي تأتي قبل اي مكسب اخر ) اذا مكناش بنسعى لتسليم السلطة لمدنيين مختارين من الشعب علشان نحاسبهم بعد كده ونسقطهم لما ميعملوش اللي احنا عايزينه , امال كنت بتثوروا ليه ؟؟ عجبتكم حكاية انت من الثوار يا علي ؟ ولا فيه ناس كانت بتثور علشان تيجي مكان مبارك بالعافية والشرعية الثورية , وفيه ناس كانت بتعوض شعورها بالنقص من انها منزلتش لغاية 11 فبراير فقالت ننزل لما تكون الاعداد كبيرة في الاوقات اللي مفيهاش ضرب :)  


** الشهادة مصطلح نبيل وجزاء الشهيد معروف للكل , بس جديدة حكاية شهيد المدنية  اللاسلامية , ان شاء الله لما تموت ويختلفوا على تصنيفك بلطجي ولا شهيد  حعملك مقام في ميدان التحرير وحخللي غاندي تويتر(المناضل من وراء جدار اللي كان بره مصر اصلا لما قامت الثورة ومع ذلك فرقة حسب الله افتكرت بس ان الاخوان منزلوش يوم 25 ) يدعو مريديه علشان يعملولك مولد سنوي  .


سامحوني كلكم .

هناك 18 تعليقًا:

mhsnelmhmdy يقول...

السلام عليكم

الحمد لله ان عشت ورأيته مخلوعا
المشكلة ان مبارك ونظامه
لم يتركونا صالحين للاستخدام
نحن بحاجة لطوفان نوح
على الاقل لنغتسل به مما علق بنا طيلة 30 سنة
اعذرني قرأت رسالتك بالكامل
وكانت طويلة لدرجة انني عندما وصلت لاخرها نسيت اولها
تحياتي لك

ويكا يقول...

أحسنت

الميكروباص يقول...

ولله انت كتبت كلام من اللي كنت عاوز اقوله ن فتره واحسنت التعبير
بس يؤسفني اني أقولك اني انا شخصيا -وهذا رأيي كشخص- اكتشفت اننا شعب صعب جدا جدا جدا وديكتاتوري جدا وغلباوي جدا واننا غير قابلين للنقاش

Haytham Kilany يقول...

اولا : أحييك على المقال الرائع
ثانيا : هو انت تبع مين بالظبط " تكفير وهجرة ولا اخوان ولا سلفيو اسكندريه؟

Unknown يقول...

شخص ما
وعليكم السلام

صدقني ابدأ بنفسك سترى ان الدنيا لسه بخير لان انت موجود فيها


كان نفسنا نشوف تعليقك على المقال لكن شكرا لمرورك

Unknown يقول...

ويكا

ياعم افتح الكيس وقول كلمتين ايه البخا ده

Unknown يقول...

لورانس


الحمد لله اني كتبت حاجة نالت اعجابك :)

ايوه كتييلا مننا كده لكن من قال هلك الناس فهو اهلكهم (بفتح الكاف وتسكينها ) افتكر د كويس حتلاقي حاجات كتيير اتغيرت

Unknown يقول...

هيثم كيلاني

جزاك الله خير

مسلم ده كفاية , وبحب اي حد وهب حياته لله وللدعوة دين الله حتى لو اختلفت معاه وشفته انه غلطان علشان انا اللي ممكن اكون غلطان

بس والله منا تكفير وهجرة :))

ويكا يقول...

ههههههههههههههههه

متأكد انك مش تكفير وهجره ؟؟!!!


هههههههههههههه

عموما المقال ده فيه حاجه انت كاتبه عن السلفيين خليك فاكر ابقى اسألك عليها



احبك فى الله

الميكروباص يقول...

ولله اللي بشوفه هو اللي دفعني اني اقول كده
لم ارى غير ناس غير قابلين للنقاش

الميكروباص يقول...

لو كنت شفت حاجه تانيه كنت قلتها واعترفت بها- لكن لم ارى غير الصعوبه من اغلب الناس

Unknown يقول...

السلام عليكم

حبيبي إسلام... استمتعت جدا بالمقال.. معاك فيه بنسبة 90%... سيب عشرة نتخانق فيهم!!! :)

لكن تهت شوية في الفقرة التانية..!

والعبارة اللي مطلوب قراءتها تاني وتاني مش عاوز أقلك وصلت فيها لإيه!!!! :)

بجد الأفضل ليك تعمل مدونة صوتية أو مشاهدة (فيديو)... ده أنسب لطريقتك الممتعة في النقاش مع الآخر... عرض الفكرة ودحضها من قلبها!!!

تحياتي وآسف على تأخر الرد عن القراءة كالعادة...

على فكرة... واحشني بجد.

Unknown يقول...

ويكا

دي الحاجة الوحيدة اللي انا متأكد منها هههههه

طيب انزل انا مصر ةواسأل براحتك .احبك الله الذي احببتني فيه

Unknown يقول...

لورانس

كتيير من الناس كده , دي حقيقة لكن صدقني اؤكد لييك ان اوقات كتيير لما يكون معظم اللي حوالينا شايفيين اننا غلط , لازم نعيد التفكير ياما في الفكرة يا اما في طريقة عرضها

تحياتي

Unknown يقول...

ماجد
وعليكم السلام اخي الااكبر

متفقين قبل كده ان ال10 % دول ممكن انا نفسي لو اعدت كتابة المقال استهجنهم :)

شكلي مش حلو اوي , يعني محدش حسيتمتع ههههههه , اعتقد الكتابة هيه الحاجة اللي انا بعرف اعملها

جزاك الله خير

فشكووول يقول...

السلام عليكم
طبعا مع طول الموضوع الا انى صبرت عليه بس فى السكه قريت ان الدنيا بدأت بالمصرى وحـ تنتهى بالمصرى .. شوف يا آخى غرور المصريين .. يا عم لا كدا صح ولا كدا صح .. بس صحيح الصح .. ان المصريين شعب فهلوى جدا ويكان ان يكون نصاب وعشان كدا تلاقى مثال زى .. احنا اللى ضربنا الهوا دوكوا .. برضه احنا اللى عبينا الشمس فى قزايز .. وبرضه احنا احنا ولا حد زينا .. لو عديت لك الامثال الكارثيه حتلاقيها كتيره قوى .. بس برضه على قد ما اختلف معاك حوالين النقطه دى الاان المصرى فعلا يجمع بين المتناقضين يجمع بين اقصى اليمين واقصى اليسار .. يعنى ساعات تلاقى واحد عربجى وبلطجى وعمال يبلطج على الناس وفى لحظه واحده ينقلب الى انسان شريف جدا وملتزم جدا بل ويضحى من اجل الغير حالة ما اذا رأى حادث عارض بجانبه او رأى شخص يغرق فى المياه .. تلاقيه ينقلب الى اخير الناس .. وقس على ذلك فى اشياء كثير ..
نحن يا سيدى نحمع بين المتناقضات
تحياتى

Unknown يقول...

أ . فشكول
وعليكم السلام

نشكرك في البداية على صبرك على قراية المقال

بش مفهمتش يعني ايه لا كدا صح ولا كده صح

هي رسالة واضحة وبسيطة , المصري انسان عادي ليس خارقا او مهما او كان قبل ان تكون الحضارة فقد اشرقت الشمس على حضارات ليست اقل شيئا من الحضارة المصرية القديمة التي برعت في تقديس الموت متناسين حضارات مثل الفينيقية والاشورية وسبأ القديمة , وحضارة الصين واهرام بيرو والمكسيك وتاريخ الهند الطويل

انها ليست دعوة لاحتقار المصري او التقليل من \دور مصر التاريخي , انها فقط دعوة لوضع كل شيء في وضعه الطبيعي , وساتغاضى عن التهكم في جملة (شوف يا اخي غرور المصريين ) ان هذه التناقضات ناتجة عن تغيير الفطرة الانسانية نتيجة طول امد تعرضهم للاستبداد , شاكرا لك تعليقك وصبرك على قراءة البوست

تحياتي واحترامي ومودتي

فساتين زفاف وسهرة يقول...

طرح رائع للموضوع