الخميس، أبريل 07، 2011

سلفي زومبي

أكيد طبعا سمعنا عن السلفي الخارق اللي كان بيعمل كل حاجه في مصر في الفترة السابقة وتكونت صورة ذهنية سيئة عند ناس كتير والغريب انها تمت بناء على اخبار جرائد بدون شهود أو متهمين أو تحقيقات بس مجرد أخبار وانبرى كثيرون للهجوم على اعتبار انه محدش يرضيه اللي بيحصل ونسي الكل ان المتهم  بريء حتى تثبت ادانته , بس عادي طول عمرهم متشددين , احنا كلنا شفنا التشدد بتاعهم في افلام عادل امام ! وطالما عادل امام ( التقي الثقة ) قال عليهم كده يبقى اكيد الاخبار كلها صح ويبقى السلفيين همه اللي بيعملوا كل  حاجة وبدل محد يدخل على اي موقع من مواقعهم يشوف هما قالوا ايه , هل هما راضيين ولا دعوا لكده فعلا , مفيش ! عايزين الشيوخ ييجوا لغاية عندهم في البيت علشان يبرأوا نفسهم قدام اصحاب الفضيلة اللي مبيغلطوش ابدا , حتى اصحاب الفضيلة من الرسميين والذين تعودنا منهم كتمان ما انزل الله ومش اخر فتوى هي جواز جدار غزة العازل , ولا جواز اسقاط الجمعة في الجمعة الاخيرة , مش وقت حساب على كل حال , الغريب ان اصحاب الفضيلة لم ينتظروا للتثبت كما امرهم الله قبل الهجوم العنيف الذي وصل بالمفتي لتكفير من يهدم الاضرحة ؟؟؟
ودي بعض ادلة البراءة نفي رئيس لجنة المصالحة علاقة السلفيين بحادث قطع الاذن   , اهالي مدينة السادات ينفون علاقة السلفيين بواقعة هدم بيت الدعارة ,التحريات تبرىء السلفيين من هدم الاضرحة , اتهام النيابة لعضو حزب وطني بحرق خمارة , قيل عنها ان السلفيين السبب اعتقد دي امثلة تكفي للي عايز يشوف بشاعة الجريمة المنظمة اللي ارتكبتها جرائد لا تلتزم بالمهنية ولا المضوعية بنشر اكاذيب دون التاكد منها وهي لا تضر السلفيين فقط بل تضر امن مصر واستقرارها حتى ان اشاعة حرق المتبرجات بماء النار انتشرت ثم مر اليوم بلا شىء , فليبحث اذا الناس عن مصدر هذه الشائعات وليروا من هو صاحب المصلحة في ترويع الناس وتشتيت انتباهم ولماذا تشارك الجرائد المستقلة في هذه الحملة الترويعية .؟؟!!




** للمرة المليون انا مش سلفي , وده مش عار ولا عيب ان شخص يقتنع ان السلفية  حق , وانه يدافع عنها ويدعو اليها بالحكمة والموعظة الحسنة . أما اللي بيقولو عنهم عملاء لأمن الدولة فردي الوحيد انهم فعلا كانوا عملاء بدليل منع بعض شيوخهم من السفر خارج نطاق المحافظة المقيمين فيها وسجن بعضهم واعتقال افرادهم بصفة دورية تحت مسمى الفحص , وما حادث مقتل سيد بلال السلفي تحت التعذيب ببعيد , لكن للاسف فيه ناس دماغها بتشتغل في اتجاه واحد واللي مقراش كتاب فضل الغني الحميد في شرح كتاب التوحيد وقال ايه عن ولي الامر اللي هوه كان مبارك يبقى ياريت يرحمنا ويسكت لغاية ميعرف الفرق بين السلفية العلمية  في الاسكندرية , والسلفية في القاهرة اللي كانت بتقول على حسني مبارك كافر علني على المنبر ( بغض النظر عن رأيي ورأيك في صحة الاتهام )  والسلفية بتاعة اسامة القوصي ( اللي كل القنوات محتفلة بيه حاليا ) اسامة اللي كان بيعتبر الاخوان خوارج ومشايخ السلفية من اهل الضلال لمجرد اعتراضهم على بعض سياسات مبارك , اسامة  اللي كان بيشكر في دروسه في بطرس غالي وبيقول على الظلمه حفظهم الله وان شباب التحرير مغرر بيهم وان فتنتهم زي مخرجت من الفيس بوك حنحاربها على الفيس بوك , وفجأة بقى رمز السلفية العقلية لمجرد ان اراؤه جت على هوى الناس  .انا برد على الناس اللي كانت بتقول همه كانوا فين لا واللي يغيظ لما شيخ بعمة من مجمع البحوث بتاع جدار غزة حلال حلال ويجوز وخايف يقول ان المسيحيين كفار لحد يقول عليه متشدد !! بيقول هما كانوا فين ؟؟؟ وانت والازهر ومجمع البحوث الاسلامية وكل المصريين كانوا فين والناس بتتعذب تحت الارض ؟ اللي كان بيتكلم لله اهو اتكلم وبرأ نفسه قدام ربنا واللي سكت ودي الاغلبية العظمى , خلاص مش حنعلقلهم المشانق و والا فحضر 68 مليون مشنقة ( للي منزلوش ميادين مصر ) وياريت تتخن مشانق اللي كانوا بيأيدوا عملية التوريث ( واتحداك اذا كنت تقدر تجيب سيرتهم بالسوء ليقطعهالك  الاعلام الموجه )., 


اما اللي عايز يفهم ايه العلاقة  بينهم وبين امن الدولة , اللي عايز يفهم بس مش صاحب الرؤية المسبقة تامة الاركان , العلاقة كانت علاقة التقاء مصلحة من امن الدولة لان اصل المنهج بيدعو الى الدعوة بالحكمة والموعظة الحسنة بدون استخدام اليد ( زي الجماعات المسلحة ) , وايمان عدد كبير منهم بحرمة الخروج على ولي الامر , وعدم منازعته , من منطلق ديني مش من منطلق التعاون مع امن الدولة , وايمان فريق اخر ان منازعة اولي الامر حيؤدي لفتنة ( هوه بيفكر كده , حقه ومبني على ادلة شرعية ) , واللي بيقولوا مكانوش بيشتركوا في السياسة عايز اسئله سؤال واحد , مين في مصر كان بيمارس سياسة , وايه معنى السياسة اصلا اللي انت بتتكلم عنها وانت كنت بتمارس سياسة ودخلت المعتقل كام مرة واتعذبت كام مرة وخسرت شغلك كام مرة ومصلحتك وقفت كام مرة لمجرد انك بلحية , واتحرمت من دخول الامتحان كام مرة علشان لابسة نقاب برغم ان معاك جكم قضائي . 
يعني مصلحة امن الدولة في انهاء النزاع المسلح مع الجماعات الجهادية التقت مع الدعوة السلفىية ( متهيألي دي رغبة معظم المصريين , يبقى كده كان فيه علاقة بين امن الدولة والمصريين كلهم ) , والمصلحة التانية انهم مكنوش بيعتقدوا في العمل السياسي وان التغيير مش ممكن يتم عن طريق المجالس النيابية فمكنوش بشتركوا فيها ( فالبتالي حيقللوا من شعبية الاخوان ) العدو التقليدي للنظام المخلوع ايام المحظورة .


وفي النهاية ده مينفيش استغلال ظباط امن الدولة لبعض المشايخ ممن ينتسبون للسلفية وتوجيه افعالهم , اما سحب موقف من شخص على فئة من مئات الالاف ده اسمه ظلم وملوش اسم تاني , الغريب ان السلفيين اخذا عن الاخوان بيقولوا  انهم دعاة وليسوا قضاة , مش عارف ليه الناس متتبطلش تعمل قضاة ويصدروا احكام حتى قبل سماع دفاع المتهم .




** اللي عايز ينتقد السلفية حيلاقي حاجات كتييييييييييييييييييييير فكرية غير هرتلة العمالة والسوبر سلفي زومبي طرزان قاهر الزمان ! 






** في السياسة بيتعلم الناس ان فيه مصالح لا يلام الفصيل السياسي على البحث عنها ( دي غير سياسة النقاء الثوري الاخلاقي المستحيلة اللي بيحلم بيها الثوار ) , لكن اللي مكنتش اتخيله ابدا هوه طريقة اكتساب اعداء من العدم اللي بيتميز بيها بعض المتعلمين , زي احنا قدرنا نعمل مظاهرة من غير الاخوان يبقى احنا نقدر نعمل كل حاجة واذا قلنا بحسبة بسيطة ان اللي بيقولوا على نفسهم مخلصين (وماشيين ورا ناس مش عارفين هما رايحين بيهم فين ولا عايزين منهم ايه) نفس اتهامهم للبسطاء اللي ماشيين ورا الشيوخ وقيادات الجماعات سواء بسواء ( على الاقل الجماعات عارفه هيه عايزه ايه وتحط رجليها فين وامتى , اه نسيت ده بقى عيب مش ميزة !!) , كانوا 400 الف وده الحد الاقصى في الجمعة اللي فاتت  حيعملوا ايه لو نزلت قصادهم مظاهرة من 3 مليون (مستقرّ) بتنظيم  من المحظورة اللي كل الناس هاجمتها في جمعة النصر لما حشدت اتباعها وقالوا بتركب الثورة ولما مجتش قالوا باعت الثورة ؟!! ايه ساعتها المنظر حيبقى حلو وثوري ؟؟؟ مصريين قصاد مصريين هوه ده اللي ذكائكم جابه ليكم بدل ما المسئول عن الائتلاف ينسق مع الاخوان ؟؟!! بدل الحوار للم الشمل وتفهم المواقف ؟ وعلى كل هما نازلين بكره , ياترى بقى الكلام حيبقى ايه , الشعب كان حينتصر من غيرهم فرجعوا في كلامهم وسابوا صفقة الجيش !!




** موقفي من تصرفات المجلس العسكري معروف من اول يوم نزلوا فيه , واللي مش متابع مدونتي حيلاقي كلامي مكتوب في تدوينة اللهم بلغت , الدور والباقي على اللي مشفش التصرفات الغريبة الغير مفهومة الا بعد متصادمت رغبته  وتطلعاته  مع مسار الجيش في تسيير الفترة الحالية , اللي خد على خاطره لما لقى البوصلة رايحة ناحية تانية قال مكنش شايف الحقيقة من البداية ؟!!.
 ده غير الذكاء المعتاد في رغبة البعض في التصادم مع الجيش بشكل مباشر علشان ميبقاش فيه بلد اصلا نزعل عليها  !!! .




** ايوه انا كتبت التدوينة دي وانا زهقان وقرفان من كتر الشتيمة الاتهامات لناس عاشرتهم وقريت كتبهم وعرفتهم عن قرب , من كل نخبوي مزعوم شايف نفسه انه اعلم الخلق بالحق وبيشتم ( بيشتم بيشتم بيشتم ) كل من اختلف معاه , اذا كان ده مفهومكم للحرية فبعدا  لحريتكم , واذا كان ده اعتدالكم وفهمكم للدين الوسطي المعتدل فالحمد لله ان نجانا من اعتدالكم واوقعنا فيما ترونه تشددا وتطرفا وتجارة بالدين .


تحمل شهرين من السب يديني الحق في لحظة تنفيس مشتمتش فيها حد .

هناك 19 تعليقًا:

محب روفائيل يقول...

بص يا دكتور المختصر المفيد لكلامى ، أنه لو لقيت اسلامى مرشح نفسه للأنتخابات هنتخبه بشرط أنه يكون حقانى ، يعنى زى حضرتك كده ، وده بصراحة أنا مضمنوش ، حضرتك عارف أن الدين مش بيفرق معايا .

بخصوص المسيحيين بقى وكفرة والكلام ده فعادى ، الكلام ده أنا بسمعه من ساعة ما أتولدت ، فمش هزعل لو حد قالها ، بس مش يغنيها بقى :) لأنه كده هيبقى استفزاز وجر شكل :)))))))))

تحياتى لحضرتك .

Unknown يقول...

ههههههه
اولا شكرا يا محب على حسن ظنك بيا


ثانيا لما انا او غير يبيقول كافر , فدي حقيقة اعتقاد , تماما زي قناعة اي صاحب ديانة سماوية او ارضية ان الاخر غير مؤمن , وقطعا ده ملوش دعوة بالحقوق الدنيوية والعلاقات المتبادلة لان ده خاضع لقانون تاني قايم على التعايش المشترك ( زي انا مذكرت في بوستي السابق ), وذكري للمسألة دي غيظا ليس الا من تمثيليات ملهاش معنى بتخلط الامور ببعضها بين الحقوق الواجبة وبين الثوابت العقدية , يعني نفسه اللي عمال بيتكلم عن الاقباط وحسن المعاملة مسمعتلهوش صوت في مقتل الاقباط في اكتر من حادث ضد اللي قتلهم ( ومش اخرهم موضوع منطقة الزرايب اللي محدش فاهم يعني ايه لغاية دلوقتي 13 قتيل بدون تحقيق ) وكانوا معروفين لكن بيمشي بالريموت مع الاتجاه العام علشان يظهر بصورة المستنير ,


وبعدين اعمل ليك ايه يعني لما مجتش في بوستي اللي كنت بدافع فيه عن مايكل نبيل وجاي في البوستات اللي تزعلك :)
انت اللي جي تجر شكل :) ههههههههه

ENG./ELSAYED,PMP يقول...

روق يا دكتور ... الموضوع بقى يجيب المرض ... و الغموض والفتن فيه بقت اكتر من حتى اشباه الحقائق ... عارف ... انا عايز اقولك على حكاية ... اللى حاصل ان ولفترة كبيرة جداً تم تحويل انتماء الغالبية العظمى من المسلمين المصريين من انتمائهم الاول لدينهم ... الى انتمائهم لبقعة الارض محددة الابعاد المسماه مصر ... ثم تضيق الانتماء الى المحافظة والقبيلة والعشيرة ... وحدثت ضغائن بسبب التهكم ...دمياطى بخيل ... شرقاوى عبيط ... منوفى ياكل لحم الكتوفى ولا يلوف ... بورسعيدى مهياص ... وميت نورى ولا دمنهورى ... الخ علشان منطولش ... ثم ولإشعال الفتن اكثر بقى فيه عندك قتال من اجل النادى المصرى البورسعيدى او الاهلى والزمالك القاهرى او الاسماعيلى .... الخ
ثم ولإذكاء نار الفتن اكثر اصبح عندك الانتماء للشركة او للعمل حتى اصبح هناك عبدة شركاتهم واعمالهم اكثر من ربهم .

الحكاية دى علشان عايز اقول ... عندما تم اقصاء الانتماء للإسلام على حساب الانتماء لمصر ... اصبح اى احد عندما يتكلم فهو من وجهة نظر نفسه مدافعاً عن مصر من وجهة نظره وبطريقته ... فعندما يهاجم السلف ... فده علشان مصر ... وعندما يهاجم الاخوان ... فده علشان مصر ... وعندما حتى يحدث العكس ... اخذ الاخوان او السلف او اليساريين او الاشتراكيين او الليبراليين او العلمانيين او ...الخ عندما يؤخذ اى منهم بالحضن ... فده علشان مصر ... فستجد نفس الصحيفة التى سبت اى فصيل بالامس تمتدحه اليوم علشان مصر... وكذلك اى اعلامى او اى جهاز او اى هيئة ... لذا فسوف ننام ثم نصحو يومياً على فتن ... علشان مصر

عارف
لو كانت الراية المرفوعة راية الاسلام ( طبعاً انا بتمنى ، ولكنها ليست مرفوعة فى قلوب كل المسلمين المصريين كما اسلفت ، ورفع بدلاً منها علم مصر او المحافظة او النادى او الشركة )
اقول لو كانت الراية المرفوعة راية الاسلام ... والاسلام فقط - لا اخوان ولا سلف ولا صوفية ولا ديمقراطية ولا ليبرالية ولا قومية عربية ولا ... الخ - لما وجدت كل هذه الفتن ... ان بداية الفتنة كما تعلم بسبب ولى الدم الذى طالب بدم ابن عمومته ، ،،،

فتش عن القبلية فتش عن الراية فتش عن التحزب فتش عن الفصيل ... ستجد ان كل الفتن تبدأ وتنتهى من تحت هذه الراية .

اتركوها فأنها ملعونة

عارف

راية الاسلام ووحدها راية الاسلام ستجعلك تتأخر اذا تقدم اخوك المسلم فلا تزاحمه ... لانه حريص عليك قبل حرصه على نفسه .

أمر بحالة شديدة من الصداع ... استدعت ان اتصل ببعض معارفى للإطمئنان على صباحاً ... لأنى ليس معى احد من بنى البشر ف شقتى ... أقول ذلك لأنى كنت عايز اكتب كلام كتير ... متبادلاً معك اطراف الحوار وليس طارحاً او ناقداً او مقللاً او رافعاً - أو ناصباً ههههه - لأى من أرائك ... ولكن التمس لى هذا العذر المرضى برفع الميم والراء وتسكين الضاد .

تحياتى يا دكتور

وخف عليه شوية ... انا مش سلفى ... ويا ليتنى... وكنت اتمنى ان اكون من الدعاه وليس القضاه ... ههههههه

ENG./ELSAYED,PMP يقول...

سورى لما قريت التعليق بصحح حاجة بس

اتركوها فانها منتنة

سلامى

Unknown يقول...

طبعا متفقين يا بشمهندس

انا نفسي الناس كلها تعرف حكاية دعوها فانها منتنة


الف الف سلامة عليك , ان شاء الله خير , ده طبيعي مع كتر التفكير والارهاق



والله مقصدك ولا جيت في بالي وانا بكتب المقال ده , ربنا يتوب علينا كلنا من كل سوء ويجعلنا اخوانا على سرر متقابلين في جنة النعيم

مجداوية يقول...



السلام عليكم

عرفت الآن معنى تعليقك عندي و حضرتك مخنوق ومين في مصر مش مخنوق !!!

أنا بيتقال عني سلفية لمجرد إني منتقبة وأنا بالفعل سلفية لأني أتبع السلف الصالح وسنية لأني أتبع سنة النبي محمد صلى الله عليه وسلم واخوانية لأن كل المسلمين إخواني وارهابية لأن هذه نظرة الغرب لينا!!!
لكن فلنكن منصفين
في كل جماعة بعض الشواذ عن القاعدة وفي كل جماعة هناك مندسين من أصحاب المصالح التي ضد الإسلام فلا تنكر وجود من يسىء بافعاله لهذه الجماعات ومن يوقع الفتن ومن يعمل لصالح أمن الدولة
ومن أكبر أخطاء السلفيين سواء بتوع الأسكندرية أو غيرهم هو عدم الوقوف أمام جبروت وظلم الحاكم وصحيح أن لهم وجهة نظر لكنها غير مقبولة مع كل هذا التجبر والظلم

إن شاء الله أنا متفائلة لأن كلما زاد الهجوم زاد تعاطف الناس وبحثهم وزيادة معرفتهم بالسلفية وال×وان وهذا يجعلهم يقرأون وعندما يقرأون سيفهمون وعندما سيفهمون سيتغيرون وعندما سيتغيرون ستكون مصر أفضل إن شاء الله
أبشر

Unknown يقول...

مجداوية
وعليكم السلام

انا لم انكر وجود من يسىء اليهم بافعاله , وهذا واضح في البوست بالمطالبة بعدم سحب موقف فردي على الجميع

اما عدم وقوفهم امام جبروت وظلم الحاكم فحتى دي فيه ناس فيهم وقفوا وقفة حقيقية منهم الشيخ محمد عبدالمقصود على سبيل المثال .

لا انا ملاك ولا هم معصومون وفي النهاية يقاس كل انسان بمجموع افعاله الخيرة والشريرة فما زاد فيهما محى اثار الاخر والكامل من عدت معايبه , زمان قبل الثورة كنت بلومهم بس خلاص دلوقتي انتهى الامر فيه صغحة جديدة لازم تتفتح مع الجميع وللجميع بلا استثناء ولا اقصاء ولا استدعاء مواقف ( الا الحزب الوطني :)) , وحتى مواقفهم السابقة لا تبرر هذا الهجوم العنيف من كل اصحاب الاقلام , ولم يثبت على احد تهمة بعينها وفي النهاية من اخطأ يعاقب ايا كان انتماؤه

البشرى قدر مقدور وان كره الكفار والمنافقون

شكرا

غير معرف يقول...

كلام متزن .. ومنصف ورغم انفعال من يمسك بالقلم لكن القلم ذاته لم يخرج ن الحيادية
أحسنت أحسن الله إليك
اسأل الله أن يجعلك من الذين يدفعون ويدافعون عن الذين آمنوا وإيانا
أخى الكريم قرأت مقالك المميز وكنت اود ان اقدم تعلقا وافياً لكن اكتفيت بالاشارة وأن اشد على يدك ولى عودة ان شاء الله
اعمق تحياتى لك
اخوك
نورالدين محمود

Unknown يقول...

نور الدين

جزاكم الله خيرا
اخ كريم ويشرفني ثناؤك

اخوك
اسلام طه

Dr Ibrahim يقول...

جزاكم الله كل خير ...

Unknown يقول...

السلام عليكم

لا فض فوك... وبالبلدي (يسلم فّمّك).. كالعادة تحدثت بمنطقية أعجز عنها ولكنها قالت دواخلي بمنتهى الدقة...

وأؤكد على قول غير المعرف: "كلام متزن .. ومنصف ورغم انفعال من يمسك بالقلم لكن القلم ذاته لم يخرج ن الحيادية"..

من أهم مشاكل التعامل مع تصريحات (وحتى أفعال) السلفية صعوبة التمييز (لدى البعض، أقصد: المنصفين) بين تيارات السلفية المتباينة في الفهم والتطبيق (إلى درجة التانقض أحيانا!) وذلك لعدم وجود تنظيم واحد محدد المعالم والقيادة، لذا يصبح لديهم جميع السلفية سواء وتصريحات أحد مشاهيرهم ينسحب على الكل، وطبعا الإعلام (المنصف!!) ينتقي منها ما وافق هواه (أو هوى القائمين عليه)..

أما غير المنصفين من العوام والمثقفين فلا شيء ينفع معهم...!!

................
ملحوظة مهمة (لا أعرف هل أخالفك بها الرأي أم أنها تتحدث عن مجال بعيد جغرافيا عن مجال حديثك): بعض التيارات السلفية في الخليج (السعودية بشكل أدق) مخترقة بالفعل أمنيا، ومعلومتي مؤكدة دون تفصيل.
................

أعجبني إجادتك في عرض رأيك بالحجة وبالأدب.. لأنه يسوؤني للغاية تعبير البعض (ممن أحترمهم من المدونين) بالسباب وبالألفاظ غير المقبولة لمخالفيهم.. حتى قيل (طـــظ) في الإخوان لمجرد عدم مشاركتهم في الجمعة السابقة (رغم أن عدم المشاركة تعني الرسمية؛ لأنه لا يمكن أن تجد جمعة ليست ملغمة بالإخوان!!!)..

تحياتي أخي الحبيب.. وربنا يكتب حرقتك في الحق وفي الدفاع عن أهل الحق في ميزان حسناتك يوم القيامة.. آمين.

Unknown يقول...

دكتور ابراهيم
وجزاكم الله خيرا

Unknown يقول...

ماجد

وعليكم السلام

تعجز عنها ايه يا عم الحج ده احنا بنتعلم منك :)


انا مش عارف امال لو عرفوا ان فيه حاجة اسمها سلفية جهادية حيعملوا فيهم ايه .


حقيقة لا اعرف تفاصيل عن الخليج لكن ما اعرفه ان كلمة السلفية غير متداولة اصلا في السعودية وبيختص بيها ناس بعينهم شبيهين في مصر بالقوصي وبتاع فتوى قتل البرادعي



انا احترم هذا البعض للغاية , وتوقفت عن التعليق بسبب تجاهله الرد مرات كثيرة ,
الا اني قمت بالتعليق ردا على هذا التعبير ,


امين

بنجاواتى يقول...

السلام عليكم

لتفضل الرابط بتاع التدوينة

http://bangawaty.blogspot.com/2011/04/1.html

مش عارف ده كان قصدك ولا ايه

انا قريت بوست سلفى زومبى وكنت عايز اكتبلك نظر مع الشكر زى ما كان الاستاذ زمان بيكتب لنا فى الكراسة .... ده طبعا علشان ما تحسش انى كل شوية بجاملك وكده بس قلت لتفكر ان نظر مع الشكر دى كلمة قبيحة ولا حاجة :)))))

سلام

مسلمة حرة يقول...

أخى الفاضل
لاأدرى ما المشكلة
علقت من قبل أكثر من مرة ولا يظهر التعليق؟؟؟؟

Unknown يقول...

السلام عليكم ورحمة الله وبركاته
لابد من وجود فزاعة ...
فزاعة الإخوان بطل مفعولها وكان لابد من وجود فزاعة جديدة فكان السلفيون هم الفزاعة....
ويمكرون ويمكر الله ، والله خير الماكرين

Unknown يقول...

بنجاواتي
ممممممممم مفيش مشكلة ممكن كمان تسيب الدرجة من 10 ,:)
لا طبعا مش قصدي كده على الرابط منا اعرف اعمله كوبي , انا اقصد انشاء رابط
:)

Unknown يقول...

انا حرة


ده اول تعليق يوصلني من حضرتك من اكتر من شهر ونصف


انا بعتذر بالنيابة عن البلوجر بس دي الحقيقة بجد

Unknown يقول...

أ. محمد الجرايحي


وعليكم السلام ورحمة الله وبركاته


صدقت
فسينفقونها ثم تكون عليهم حسرات