السبت، فبراير 05، 2011

ربنا لا ملجأ لنا الا انت

يارب انا مش خاين وانت العالم , يارب انا تظلمت من حسني مبارك وعشت 10 سنين من عمري بدون أمان ولا قانون يحميني ومرحمنيش ولا خرجني من ظلمهم الا انت يارب , يارب انا مخدش فلوس من الامريكان وانت العالم وحدك , يارب الناس خرجت من بيوتها علشان اتظلمت مش علشان امريكا ولا خامنئي , يارب الناس اتقتلت بالسنج والمولوتوف وقالوا عليهم ضد الوطن , يارب مكنش معاهم سلاح وانضربوا بالرصاص الحي ولسه بيقولوا عليهم خونة , يارب ملناش غيرك ولا جيش ولا شرطة ولا شعب ,بيؤمن بعض ّ قلبي وكرامتي وديانتي وبلدي ولا تعض رغيفي ,يارب أنا عمري مشفت اسرائيلي الا في التلفزيون ومع حسني مبارك مش مع حد تاني ولسه بيقولوا ان انا خاين , يارب انا عمري مكنت شيعي ومش ذنبي ان واحد غبي شمتان في نظام معادي ليه فجاب سيرتي ,يارب انا مش مع اوباما ولا عايزه يجي مصر تاني , امريكا اللي كانت بتبعت الماجين بتوعها يتعذبوا ف مصر علشان ميتمش ملاحقتهم قضائيا في دول مفيهاش لفابف بانجوبتشوه الجوه   يارب القنابل اللي كننا بننضرب بيها في مصر كانت صنع في امريكا ومش احنا اللي كنا بنضرب بيها اخواتنا اللي كانوا بينضربوا بيها ومبارك هوه اللي جابها وضرب بيها الناس مش احنا يارب ومع ذلكك برده بيقولوا علينا ان احنا مع اوباما , يارب مش ذنبي ان الامريكان بيفكروا في مصلحتهم لقوا ان الاضطرابات في مصر بتكلفهم اقتصاديا وبترفع سعر البترول ومش ذنبي انهم بيفهموا ان غلق كل وسائل التعبير السلمي بيخلق شرعنة العنف والتعاطف معاه وانهم اكتر ناس مصالحهم حتنضر من العنف في المكان ده بالذات فدوروا على حل لوقف الاضطرابات ورموا كارتهم المحروق ودوروا على كارت جديد يهدىء الوضع ويحطوا قواعد اللعبة الجديدة , يارب الناس نسيت من اسبوع وهيلاري بتقول النظام في مصر مستقر ولما عرفت انه مش مستقر بدأت تقف في النص ولما ملقيتش فايدة بدأت تضغط عليه لانه متعلمش من درس الشاه علشات هوه غبي , ومع ذلك بيقولوا ان هوه الوطني واحنا الخونة , يارب مش ذنبي ان مصلحتي ومصلحة الناس في عيشة كريمة ومستقبل افضل اتوافقت مع رغبة الامريكان  في اللحظة دي لانهم مدخلوش علشانا  احنا هما داخلين علشان مصالحهم اقوم اسيب حقي ومصلحتي علشان خاطر دخولهم ومدافعش عن حقي ليه للنهاية واخده منهم ومن كلابهم الوفية اللي كان جزائهم زي جزاء سنمار وخيل الحكومة , يارب انت عالم حيعمل ايه في الناس لو تمكن من الامور تاني يارب ده قبل مايتمكن اعتقل 9 من شباب مصر اللي مش اخوان وشفيق هدد البرادعي بان امن الدولة وراه يارب لما يهدد البرادعي ولسه اموره مستقرتش حيعمل ايه في الغلابة اللي ملوهمش غيرك يارب , ومع ذلك لسه الناس شايفه انه صادق وصدقت ان ربيع الاول من الاشهر الحرم وان الاخوان همه اللي في الشارع حتى لما شافوا قساوسة ومسيحيين بيصلوا في الشارع في وسط مليون مسلم محدش بيتعرض لهم بسوء بردك قالوا اخوان , بيقولوا بيصلوا يارب هيه الصلاة دي بقت بتاعة الاخوان هيه مش كانت بتاعة المسلمين كلهم  , يارب هوه الدقون والاخوان اللي كانوا في المظاهرة مقتلوش المسيحيين ليه وهما واقفين جنبهم بيصلوا خافوا من مين غيرك وهما مبيخافوش من الموت يارب يبقى مين اللي كان بيخوف المسيحيين ويفجر كنايسهم اذا كان الناس كلها واقفة جنبهم وهما بيعملوا قداس في الشارع  مش في كنيسة محمية بالامن وجدار خراساني ,
يارب احنا مش خونة ولا كلاب شوارع علشان نتسحل تحت عجل العربيات بتاعة الامن المركزي  وبعدين يقولولنا خلاص المسامح كريم  يلا روحوا بقى الريس ريس برده ومن حقه يقتلله يجي مليون كده من المعيز دي, يارب اللي من حقه يسامح ويعفو هوه صاحب الدم بس وهما مدوش لحد توكيل يتنازل عن دمهم ولا انا اديت لحد توكيل علشان يتنازل عن حقي في دولة قانون مش دولة مخبرين وبلطجية .يارب اذا انا مت او اختفيت انا مش مسامح حد من اللي قال عليا خاين ولا اللي قال عليا ممسوح مخي ولا من وقف يتفرج عليا وانا بموت , انا حاخد حقي منهم كامل زي محاخد حقي من مبارك وكلاب السكك المسعورة اللي طلقها على شعب بالكامل ينهشوا في لحمهم واعراضهم واجسادهم بالايد في التحرير وباللسان في ماسبيرو , حاخد حقي منهم قدام محكمة عدل السماء لأن محاكم العدل في الارض شهودها عميان مش بيفرقوا بين الضارب والمضروب والقاتل والمقتول والظالم والمظلوم , عماهم الخوف والجهل ورؤية مصالحهم الخاصة زي الرغيف ومرتب اخر الشهر اللي لو كفّاهم الرغيف مبيكفيش العلاج ويسيبوا فلوسهم  لمبارك وعز ورجال اعمال بيشتروا متر الارض بنص جنيه  الارض اللي اتحررت بالدم بتتباع بالمتر لمجموعة محددة ومعروفه بالاسم والباقيين ليهم يتفرجوا على مدنهم الجديدة في التلفزيون.
يارب اذا اتمكن ومكناش عايشين او في السجون متعذبين يارب وعفوك احب الينا  افتكروا مظاهرة حتطلع في شهر يونية تطالب الرئيس بالا يتنحى وانه يستمر من اجل مصر واستقرار مصر الازلي  ومش حتلاقوا نوارة نجم ولا اسراء عبدالفتاح ولا شادي الغزالي ولا أدمن خالد سعيد ولا حتى الاخوان اللي كانوا مخوفنكم بيهم علشان يدعوا لثورة جديدة مش حتلاقوهم لانهم حيحصلوا ادمن خالد سعيد ويختفوا وانتوا بتتفرجوا عليهم في التلفزيون  ويقول بعضكم يستاهلوا.
اللهم بلغت اللهم فاشهد 
(حَتَّى إِذَا اسْتَيْئَسَ الرُّسُلُ وَظَنُّوا أَنَّهُمْ قَدْ كُذِبُوا جَاءَهُمْ نَصْرُنَا فَنُجِّيَ مَنْ نَشَاءُ وَلا يُرَدُّ بَأْسُنَا عَنِ الْقَوْمِ
الْمُجْرِمِينَ) يوسف 110
http://www.almasry-alyoum.com/article2.aspx?ArticleID=286325&IssueID=2031

هناك تعليقان (2):

الدرويش المرووش يقول...

ربنا يكرمك و ييسر لك الخير

و يسترها مع مصر و المصريين

و يرحمنا من النكد و القرف و النفاق

الحــب الجميـــل يقول...

ربنا ينتقم منهم وتعدى الأيام دى بالأفضل ان شاء الله
الناس صحيت خلاص وعارفه هى عايزة ايه
ونفسها طويل ان شاء الله

ربنا موجود