نصيحة واجبة

ياريت يا جماعة اي حد بينصجنا نسكت او نروح يتكرم ويقول للريس كفاية الشعب بقى بيكره بعضه واقتصاد مصر خرب وبيخرب بسببك , احنا شوية عيال صغيرة مبنفهمش في تخاريف الزهايمر بتاعة الكبار , فياريت الكبار ميعملوش عقلهم بعقل الصغيرين ويتنازلوا علشان الامور تمشي والحياة تعود لطبيعتها المستقرة اللي مش فوضى اللي مكنش فيها بلطجية وكان العيش رخيص ومتوفر لكل الناس والمواصلات فاضية ومش لاقية حد يركبها وكان كل الناس بتروح شغلها تأديه بضمير صاحي وابتسامة على وجوههم وظباط الشرطة حماة الوطن كانوا بيستقبلوا الناس بالورد وهما داخلين الاقسام لرجة ان المواطنين كانوا بيحبوا يقضوا الويك اند في اقرب قسم شرطة من كتر الحفاوة والاكرام اللي ولا الفور سيزون ولا البورصة اللي كانت فلوسها بتتوزع على الشعب كله لدرجة ان الناس مبقتشي عارفة تودي الفلوس فين فكانوا بيخبوها عند اصحاب جريدة الجارديان ولما ثاروا علشان بعضهم مش لاقي ياكل الجارديان فضحتهم وقالت فلوسكم عندي يا مصريين 70 مليار دولار اضرب في 5.90 قرش الان علشان تعرف انك غني يا مصري  ,محتاجين فعلا نرجع زي زمان مستقرين اكلين شاربين نايمين منتخبين مجلس شعبنا بارادتنا الحرة ومعانا موتانا لما الحكومة كانت عارفة احنا كنا عايزين مين فكانت بتكتب اسمنا بدالنا وكانت بتجيب وطنيين مخلصين بسنج ومطاوي على اللجان علشان يحمونا من القلة المندسة ولسة بيحمونا من عملاء حزب الله الاسرائيليين الامريكيين .
يارب رحمتك وعفوك ورضاك , ربنا لا تؤاخذنا بما فعل السفهاء منا , انا اليك لمنقلبون سواء في بيوتنا او تحت سنابك خيل النظام او عرباته المدرعة وانا قد اخترنا الشهادة فلا نامت اعين الجبناء .