احنا الشعب

* من زماااااااااان ييجي من 25 يوم كده فيه ناس قالت يلا بينا نحصل تونس على طريق الحرية وناس قالت ده عشم ابليس في الجنة ( اختلاف عادي ومبرر ) , شوية والموضوع قلب جد والناس التانيين حسوا انهم ممكن يعملوا حاجة فعلا فقالوا يلا بينا نساعد بعض قامت ناس تانية قالت كفاية كده انتو بتخربوا مصر ( على اعتبار انها كانت عمرانة وخيرها لاهلها ) الشباب سدوا ودانهم عن حملات التثبيط وكملوا قام الرئيس المخلوع عمل حكومة جديدة وعين نائب رئيس , قاموا الناس التانيين قالوا كفاية كده ! كملوا الاولانيين قام الرئيس قال اخر مرة اعملها واترشح  ,قالوا كفاية كده ! قاموا الشباب كملوا الرئيس ركن على جنب وقال مش لاعب , قام الناس التانيين برده قالوا كفاية كده !, قاموا الشباب كملوا قام عز والعادلي اتسجنوا , قالوا كفاية كده قاموا الشباب كملوا قاموا حاجزين على فلوس  رئيس العصابة قالوا كفاية كده قام الشباب كملوا  طالبوا بازالة رئيس مباحث امن الدولة  قام الجيش استجاب  ( مصدر عسكري في الشروق وان كان الخبر محتاج تاكيد ) قالوا كفاية كده قام الشباب كملوا قام الجيش عمل حكومة شبه جديدة ( احتفظ الحزب الوطني بالوزارات السيادية بنفس الوجوه ) على كل الشباب ناويين يكملوا وده طبيعي لاي انسان حر لقي ان الجيش بيتفهم موقفه يعني احنا الشعب بيطلب والجيش باعتباره امين على الثورة  :) بينفذ طلباتها لانه شايفها مشروعة انتوا مين بقى انا نفسي افهم  يعني ادي الجيش وادي الشعب انتوا مين ؟؟وسؤال تاني هوه انتو مزهقتوش من قولة كفاية بقى علشان خاطري ولا بلاش خاطري انا شوفوا خاطر اي حد يعز عليكم انتوا اللي كفاية بقى واتفرجوا وكلوا ثمرة كفاح المكافحين هنيئا مريئا واوعدكم مش حابصلكم فيها  واذا حصلهم حاجة مفيش مشكلة هما اللي حصلهم مش انتوا .


* ما شاء الله بقى في زيارات للمدونة بتوصل لحوالي 70 زيارة في اليوم ( ممكن يكون من كترة ما انا بفتح المدونة واقفلها ) , ومع كترة  عدد الزيارات ممكن يكون فيه تعليق او اتنين او خمسة في المتوسط انا فعلا مش عارف هل هوه اعتراض على المضمون , طيب لو معترض ليه تبخل بالنصيحة مش ممكن اكون غلطان ومش عارف او مش شايف اللي انت شايفه ونصيحة ليك اذا مكنتش مقتنع انا بكرر الافكار في اكتر من تدوينة متتالية لو مش عاجباك المدونة نصيحة متقراش لان الافكار حتترسب في اللاوعي لديك خصوصا بسبب طريق ترتيبها وتسلسلها المنطقي يعني ممكن تلاقي نفسك بعد كام مرة بتسمع التدوينة لنفسك في الحمام , طبعا الكلام للي بيدخل يقرا ويلاقي الكلام مش عاجبه فبدل ما يرد يمشي لكن المدونين اصدقائنا المؤيدين لحكمنا قصدي يعني سكان الولاية الطيبين اللي معانا ومش من الاعداء ( بهزر محدش ياخد الكلام بجد , ممكن تعتبروني في مرحلة الافاقة والتفاؤل المشوب بالحذر الشديد ) , على كل انا شعاري اما ممات يسر الصديق واما حياة تغيظ العدا بالاضافة اني فيه حاجات كنت بكتبها وانا علي يقين ان ربنا حيوصلها للمستفيد منها والحمد لله كتير من الاحلام بقت واقع .( واذن في الناس بالحج يأتوك رجالا و على كل ضامر يأتين من كل فج عميق ) الاماكن البعيدة مسمعوش الاذان لكن ربنا وصله ليهم .




* كل المؤشرات بتقول ان الجيش والشعب ايد واحدة فعلا وان الجيش بينفذ معظم طلبات الشعب ممكن ببطء شوية لكنه بينفذها في النهاية  بس ده ميمنعش من تساؤلات مشروعة لا تنتقص من المجلس العسكري في شىء لكنها بعض من حقوقنا في المعرفة 
     - لماذا لا يضم المجلس العسكري افراد مدنيين الي المجلس الرئاسي اذا كان يرفض ان يتكون مجلس رئاسي مدني به فرد عسكري , حيث ان طريقة الاستعانة بخبراء والجلوس معهم والاستماع اليهم ثم شكرهم ولير الجيش ما يراه لا تختلف كثيرا عن طريقة اتكلموا براحتكم والحكومة تعمل اللي هيه عايزاه ( واضح في الردود على طلب اقالة شفيق وابوالغيط ووزير الداخلية اللي كان موجود يوم معركة الجمل )
    - عدم الغاء قانون الطوارىء والاصرار على انه من اجل الارهاب والمخدرات رغم انه لا وجود لتعريف محدد للارهاب لا في الدستور ولا في القانون ؟؟ وهي نفس طريقة الرئيس السابق .
    - حل امن الدولة ( العمود الرئيسي لدولة الفساد واثارة الاضطرابات )
    - صفوت الشريف ., زكريا عزمي , فتحي شرور , عمر سليمان بتاع الصوابع والاجندات . انتو فين ومش بتتحاكموا ليه على تزوير ارادة الامة ولا دي مش جريمة ؟ 
   - حكومة انتقالية اخرى ستشرف على الانتخابات فلماذا ليس الان ؟ وما المشكلة ان يصعد يحي الجمل وهو شخصية مقبولة من المعارضة واكيد من الجيش طالما اختاره لماذا لا يصعد من منصب نائب رئيس الوزراء الى رئيس الوزراء وينتهي الامر 
  - لماذا الاصرار على الاحتفاظ بنفس الوجوه القديمة في الوزارات السيادية ( الدفاع - الخارجية - الداخلية - الغاء الاعلام ) وما هو موقف المشير وزير دفاع في حكومة يرأسها شفيق ام رئيس المجلس العسكري ؟؟!! الذي يرأس شفيق 
  - لماذا يختار الجيش الوزراء  ولا يفاوض ممثلي الثوار او القوى السياسية ؟  
- هل الجيش ينفذ ما اجتمعت عليه مطالبات القوى السياسية والثوار ام ما  يراه هو صالحا ؟ 
  - وزير الداخلية في اليوم الساقع بينفي ان الشرطة ضربت نار على المتظاهرين ؟؟؟؟؟؟؟؟؟؟؟؟؟؟؟؟؟؟!!!!!!!!
http://www.youm7.com/News.asp?NewsID=356756 طيب ده نسميه ايه ؟ 
  - يعني ايه الجيش يطلب من رؤساء تحرير الصحف القومية انهم يستقيلوا ( في العاشرة مساء في مكالمة تليفونية ) ولا يقوم باقالتهم بعد الادوار المشبوهه اللي بيقوموا بيها ( كتير بيدّعوا انهم مع الثورة وانهم كانوا من اول يوم والكلام الفاضي ده وفي النهاية يطرح اشياء هدفها الوحيد هو تقسيم صف الثوار )
  - ليه الرئيس في شرم ومش بيتحاكم على اطلاق النار على المتظاهرين وليه العادلي اتحول للجنايات بتهم مالية مش بتهم التعذيب والقتل واختفاء مواطنين ؟
 - يعني ايه الافراج عن معتقليين جنائيين بالرغم من ان المطالبات بالافراج عن معتقلي الرأي ؟ 




** اتعودنا نطالب والجيش بيفتكر !!! الحاجات اللي بنطالبه بيها  وغالبا بيعملها , انا راضي واخويا راضي مالك انت ومالنا يا قاضي ؟


** باختصار كل اللي تم تم تحت ضغط المظاهرات المليونية مش منحة من حد  , الا ربنا وحده , وحقنا نفهم ونطمئن على مستقبل البلد اللي اندفع فيه دم مش مية .


** الاخوان عفريت الزمان وبعبع الشجعان نعمل فيهم ايه علشان الناس تنام وترتاح وتسمع شهرزاد حتى الصباح  , مصريين والله العظيم مصريين يعني ليهم حق يترشحوا في انتخابات الرئاسة والبرطمان والمحليات زي باقي المصريين ومع ذلك قالوا مش مترشحين للرئاسة ومش حنسعى لاغلبية برطمانية , والقرضاوي اللي قالوا خميني ساب البلد ورجع قطر وقال مفيش مشايخ ولا ملالي حيحكموا  , انا عندي قناعة ان اعداء الاخوان والسلفيين مش شرط انهم يكونوا اعداء الدين ممكن يكون اتعرض لمواقف شخصية سابت اثر سلبي  عليه وممكن يكون مش مقتنع بان الاراء المطروحة اسلامية فعلا وان فيه خيارات تانية اسلامية برده ممكن تبنيها  وممكن يكون خوف من مجهول ميعرفهوش لكن فعلا فيه ناس يتهاجم الاسلام عن طريق مهاجمة الاسلاميين لانهم ميقدروش يهاجموا الاسلام نفسه في مجتمع مسلم ودول احب اقولهم شايفك وعارفك وحاجيبك وحنفضحك كمان بس مش وقتك علشان احنا مش فاضيين .
في النهاية شكرا لكل اللي بيقرالي المختلف قبل المتفق ورحم الله رجلا اهدى اليّ عيوبي . 


الثقة لا تمنع من الحذر , مظاهرات يوم الجمعة مش حتوقف مصالح ولا حتعطل تك تك الانتاج ولا حتمنع الصعود الاقتصادي الصاروخي لمصر , دي مجرد رسالة ان فيه حد لسه بيحمي الثورة وصاحي لباقي مطالبها ومنصحش باي مظاهرات في ايام العمل وحتى اصحاب المطالب الاجتماعية مع احسان الظن  ,بامكانهم يقوموا بوقفاتهم الاحتجاجية بعد ساعات العمل الرسمية .

** معدتش بسمع عن حملات انا اسف ياريس وحقك علي ياعادلي وابوس راسك يا عز , ده معناه ان التحذير بيجيب نتيجة , محدش يسكت اللي فاهم يفهم اللي مش فاهم واللي مش فاهم يسأل واللي كل وظيفته في الدنيا انه يقول يا لهوي يا لهوي ممكن تعمله بلوك علشان متحتاجش لاسبرين للصداع , انا بقول الكلام ده وانا مطمن ان المدونات مش بيتعملها بلوك :)  يعني محدش حيعمل لمدونتي بلوك .
* زمان كنت بتكلم بانفعال ممكن ييجي اليوم اللي اشرح فيه السبب لكن خلاص الدنيا اتغيرت ودلوقتي ممكن نتكلم عن الرأي و الرأي الاخر علشان فيه وقت للكلام , خلال الشهر اللي فات مكنش فيه وقت غير للفعل واظهار الحجة واللي عايز ييجي ييجي واللي مش عايز يخليه في البيت لكن دلوقتي ممكن نتناقش براحتنا .

ادعوا لاخوانكم في ليبيا محتاجين دعاكم , ممكن يكون دي بداية حاجة اكبر.