يحدث ان مبارك لن يعود الى حكم مصر كما بشرنا المتفائلون والمحللون , ان مبارك يحكم الان من شرم الشيخ .
* وزير الداخلية ينفي اي علاقة للداخلية باطلاق النار على المتظاهرين هنا .
* وزير العدل مزور الانتخابات السابقة لا يزال في الحكم .
* شفيق بتاع البونبوني وعدنا بالحوار بالجمال والبغال ووفى بوعده واحنا لسه منتظرين منه خير وبنقول نعطيه فرصه , من الساعة 2 ظهرا حتى صبيحة اليوم الثاني في يوم الاربعاء الدامي بس يبدو ان قناة الجزيرة كانت مقطوع ارسالها في مجلس الوزراء .
* ابو الغيط ............كفاية اسمك وتاريخك وتهديدك بالانقلاب .
* وزير البترول الجديد عضو مجلس ادارة توريد شركة توريد الغاز لاسرائيل ( لازم نديله فرصة فعلا لان اسرائيل بتشتكي دلوقت من نقص الغاز ) هنا وما خفي كان اعظم !
*الجيش متورط في اعتقال وتعذيب متظاهرين هنا
* مدير امن البحيرة يهدد قطع ايد اللي يمد ايده على اسياده ( لكل اللي بيحن لزمن الاسياد من الخايفين من مرور التكتك بالزمالك ) هنا
* التحفظ على مكتب عزمي يوم الاربعاء الماضي فقط بعد فرم المستندات المهمة ( مكنوش واخدين بالهم ) هنا
* امن الدولة بجيش من الظباط والمخبرين ينتشرون في ربوع مصر المحروسة والجيش يمتنع عن اتخاذ اي اجراء ضدهم .
* مين اللي هرب المساجين هنا
لكل اللي لسه مش شايف الصورة لان معدش فيه وقت للكلام , الناس اللي انت شفتهم في العاشرة مساء معاك قلبا وقالبا ونفسهم يخدموك ويخدموا مصر لكن واضح ان فيه حد تاني بيحكم مصر فوقهم وفوق ارادتهم وهما كانوا السبب هما وامثالهم ان جيش مصر ميتورطش في اطلاق النار على المتظاهرين . او حد يفهمني ازاي كل ده بيحصل ومين اللواء الي فوق في الفيديو وليه سيادة المشير مبيتكلمش ( 20 سنة خدمة مبارك كوزير دفاع وفجأتن سبحاااااااااااااان الله بقى ممثل ارادة الشعب ) .
* مبارك بيعمل ايه في شرم ؟ وليه ميتحاكمش ؟ ولا هوه اعلى من القانون ؟ وفين زكريا عزمي وصفوت الشريف وسرور وجمال وعمر سليمان وليه العادلي بيتحاكم في جرائم مالية مش في اطلاق النار على المتظاهرين .
* لماذا لا يستعين الجيش بمدنيين في المجلس الحاكم اذا كانوا رافضين مجلس رئاسي مدني في وجودهم , حتقلي مين اللي ممكن يكون المجلس الرئاسي , فيه اشخاص مجمع عليهم ثلثى الشعب احمد زويل , فاروق الباز , البرادعي , عمرو موسى وبغض النظر عن رايك فيهم كافراد الا ان مجموعهم مرضي للاغلبية .
* ليه التلفزيون المصري تجاهل مظاهرات الجمة امس ولم ينقل منها صور الا متاخرا جدا ؟
لو انا بدعي بدون دليل حد يرد عليا ولو انا مش فاهم حد يفهمني , لكن الكلام بعواطف وتهاني وخديجة وعديلة عن الثقة والكلام ده مش حينفع اللي يتكلم يرد على اسئلتي باجوبة منطقية وانا اصدقه .
* طيب والعمل نهاجم الجيش يعني ؟؟ مهو علشان انت ............................,
الحل هو اننا ننزل الميدان تاني لغاية ما الجيش يفهمنا طالما مش بيردوا في التلفزيون وطالما كل ما العدد بيبقى قليل يضربوا المعتصمينهنا
ننزل ومنحتكش بالجيش لانه جيشنا احنا مش جيش مبارك ومع وجود عدد كبير حيفهموا زي مبيفهموا كل مرة متأخر .
* انتو مش بتشبعوا طلبات : لا مبنشبعش طالما طلبات مشروعة .
* هوه انتو مبطغلطوش : لا بنغلط ولو غلطنا حندخل السجن . اشمعنى مبارك ؟ هوه انسان وانا لا , هوه نهبني وسجني وقتل بشر بشر بشر يا بشرررررررررررررررررررر. انتو فاهمين يعني اه قتل !يعني ايه حياة انسان تنتهي! يعني ايه اسرة تفقد شخص فيها ! يعني ايه روح .
* ماهو كده فيه ارواح زيادة ممكن تروح : ولو مرحتش دلوقتي حتروح وانت نايم او تحت ايد مخبر من اسيادك او تحت ايد عربية طايشة من بتاعة البهوات ( اينما تكونوا يدرككم الموت ولو كنتم في بروج مشيدة ) يعني روحك تروح في سبيل الله ورفع الظلم عن المظلومين افضل من انها ترروح في شرقة ميه .
* حتدمروا البلد : انا قاعد في ميدان التحرير ايه علاقتي بالبلد ولما انتوا خايفين على البلد سيبتوها ليه في ايد عصابة 30 سنة .
* الاخوان حيمسكوا البلد : احنا بنتكلم عن انتخابات تختار فيها اللي انت عايزه ولا انت عايزها انتخابات على مقاسك اذا جت على هواك تبقى حلوه واذا جت مش على هواك يبقى علي وعلى اعدائي .
* دي ثورة مش ثورة الا ربع , واللي بيحكموا دلوقتي مش احنا دول اعوان مبارك وعليك تختار بين انك تحكم نفسك او يحكمك اللي مش حيرحمك لان مش انت اللي جبته ده جه بعد ما ضحك عليك واستغفلك .
* يارب انها لك فان كانت خطأ فردني الى الصواب وان كانت صحيحة فاحفظني من كل من اراد بي سوءا .
اللهم بلغت اللهم فاشهد .
هناك 16 تعليقًا:
عارف ان كلامي مش هيعجبك ولا هيعجب اي حد هيدخل يقرا التعليقات بس اللي اكتشفته اخي العزيز اننا فاهمين الحرية غلط
فهمنا ان الحرية فوق القانون وده غلط علشان هيوصلنا للفوضى
خلاص الجيش قالنا امشوا دلوقت وتعالوا الصبح ليه مسمعناش كلامهم
انا بتكلم عن قبل الاشتباك الجيش طلب انهم يمشوا ويرجعوا الصبح المتظاهرون مرضيوش يسمعوا الكلام ورفضوا ليه؟
كان قدامهم حاجة من اتنين اما يثقوا في الجيش وده معناه انهم كان يجب ان يروحوا ويسمعوا كلامه او لا نثق في الجيش وده معناه انهم برضه يروحوا علشان يستعدوا باعداد كبيرة ويرجعوا تاني لكن انهم يفضلوا بعدد صغير مايعديش الالف شخص ده اسمه تعريض الحياة للخطر ونشر الفوضى
احنا ليه زعلنا من الجيش بالرغم اننا اللي ابتدينا
احنا عاملنا الجيش انه زيه زي مبارك لما بنقول كلام مش بنسمعه يقولنا احترموا حظر التجول نقوله طظ يبقى هو لما يعاملنا كأنه مبارك يبقى معاه حق
حضرتك في مدارس الصبح وفي شغل في المجمع وفي حركة تنظيم مرور ومع ذلك في ناس قررت المبيت من نفسها ومن دماغها بدون ما تكون عاملة احتياطاتها من الاعداد النتيجة ان الجيش اعتبرهمشرذمة قليلة وان الشعب نايم في البيوت
السبب في اللي حصل امبارح مش الجيش لا السبب فوضى المتظاهرين وكل واحد ماشي بدماغه وبيعمل قرارات مع نفسه بدون قيادة يا راجل احنا اصلا مش عارفين نتفق على قيادة داخلية بيننا ومش عاجبنا حد يتكلم باسمنا مننا هيعجبنا الجيش
طبعا قبل ما تفهم كلامي غلط انا ضد اللي حصل امبارح وشايف الجيش تجاوز الحدود في القمع واعتذاره النهارده غير مقبول من غير ما يفرج عن المعتقلين وتنفيذ المطالب واقالة شفيق
بس اللي شايفه ان الغلط الاكبر كان من المتظاهرين اللي فهموا معنى الحرية غلط البلد من غير قانون فوضى
ولو مش هنثق في الجيش هتبقى حرب اهلية
علشان كده يا ريت نهدأ شوية ونفكر بالعقل وبلاش العصبية حلل الموقف كويس
الجيش طلب من الساعة 9 ان الساعة 12 يتم احلاء الميدان ويرجعوا 6 الصبح كان ايه الرد؟
طيب والتنظيم مسئولية مين؟
لو عايزينها فوضى ومش عاجبنا حد يبقى احنا ليه زعلانين؟
لو عايزين الجيش معانا وايد واحدة يبقى ليه مش بنثق فيه؟
لو عايزين الجيش محترم في تعاملاته معانا ليه بنعامله زي ما كنا بنعامل النظام الفاسد؟
للاسف احنا في مرحلة عدم توازن وتوهان والحل الوحيد اللي شايفه اننا نرشح مجلس يمثل المتظاهرين هو اللي يتخذ القرارات وكلنا نوافق عليه ده حتي المستشار محمود الخضيري امبارح قال للجيش معاكم لحد الجمعة الجاية لو لم يتم اقالة حكومة شفيق هنعمل اعتصام مفتوح قدام مجلس الوزراء
طيب ليه مسمعناش كلامه وكبرنا الراجل وصبرنا اسبوع ليه في ناس اشتغلت بدماغها وعملت اعتصام وبيات غير متفق عليه
فكر في اجابات الاسئلة دي اللي منومتنيش الليل كله وانا بتفرج على المآساة اللي وصلنالها قبل ماتتعدى الاجابات دي ونوصل لنتايج كبيرة
زي ما نفكر في اللي لينا لازم نشوف اللي علينا
تحياتي وآسف للاطالة
ليه تخيلت ان كلامك مش حيعجبني , امال ليه انا طلبت رايك , بس احنا مش عايزينها فوضى , احنا عايزين حد يجاوب اسئلتنا , بالاضافة ان الفيديو اعلاه كان السعة 9 :30 الصبح قبل كل الل انت قلته محصل
الجيش ميتصرفش بطريقة تبعث على القلق وعدين يطالبني بالثقة .
وميجاوبش على اسئلة مشروعة ومصمم ان احنا نثق فيه
ترشيح مجلس انا اقترحته في اكتر من بوست وفعلا اتعمل مجلس وبطريقة هرمية كمان يعني ليه فروع في المحافظات
الناس حنعتبرها غلطت لان فعلا مكنش فيه عدد كافي , بس هل معنى عدم وجود عدد كافي ان الجيش يضربهم ؟؟؟؟؟؟؟؟!!!!!!! معنى كده ان الجيش مش معانا كل ما في الامر ان الجيش بيخاف من العدد مش بيحترم حريتنا !!!!
هل انا مطالب بالثقة لمجرد انه الجيش من غير ميجاوب على الاسئلة اعلاه
مصطفى اا عرضت نقط كتير وتقارير للجارديان وفيديو قبل الاحداث انت بتثق في الجيش ده شىء طبيعي بعد كل الخطوات الايجابية اللي عملها بس بما انك شايف انه مش من حقنا نقلق ممكن تجاوب على اسئلتي علشان اخد الثقة اللي عندك
تحياتي اخي الكريم الجميع يعمل من اجل ما يظنه مصلحة بالتالي تعدد الاراء والنقاش يزيد الصورة وضوحا ولا يفسد للود قضية طالما صلحت النوايا واظنها لدى الكثيرين صالحة
اخي الفاضل انا ماقلتش ان الجيش مغلطش اقرا كلامي كويس انا برضه قلت ان الجيش اخطا بس احنا برضه غلطنا
وانا ماقلتش اننا منضغطش على الجيش انا بقول نضغط على الجيش بس بطريقة الكل يتفق عليها متبقاش باعتصامات ارتجالية وقرارات فورية
لكن تبقى بدعوات باعتصامات مليونية ومصمم على وجود قيادة للثورة الكل يلتف حولها وينفذ اوامرها من المتظاهرين وتبقي القيادة دي معروفة للتمانين مليون مصري علشان يلتفوا حولها
اللي حصل امبارح غلط من المتظاهرين وغلط من الجيش
شكرا اخي
ما يحدث الآن هو بالفعل الطريق إلى الفوضى
والعمليه أصلها بالعقل، كيف نطلب حل مشاكل 30 سنه في اسبوع؟
وكيف تكون الوزاره التي عينها الجيش لا نرضى عنها وفي الوقت نفسه راضيين عن الجيش؟
وإن كان كل واحد وقف يتصور مع مبارك سنقوم بمحاربته، ماذا عن نطاوي وقادة القوات الذين قام مبارك بتعيينهم ؟
كده العمليه بقت كتيره اوي اوي بصراحه
وبعدين تحقيق المطالب السابقه ليس معناها ان من طلبها على صواب
لأن الحديث عن الصح والخطأ يستلزم 5 سنين من الآن ولنرى النتيجه
واحد من الناس.......
لقد علمت أن لك رأيا وضعته بأدلة دامغة لفساد النظام السابق وذيوله المتواجده الآن والظاهرة عيانا والباطنة خفية وقال مصطفى رأيا مخالفا
لك وقلت ردا عليه لماذا غيرت رأيك فهو إذن صديقك وكان معك ثم غير رأيه وتريد رأيا محايدا لكى تطمئن على أحوال مصر وهذا حقك برغم عدم سماعك لما قال صديقك وتحليله فربما يكون فيه جانب من الصواب كما أنت لك جانب من الصواب فى عرض بوستك وشكوكك فى محلها........ لكن لو رجعنا ياأخى لصلح الحديبية والذى أبرمه محمد بن عبد الله ( صلى الله عليه وسلم ) :
واستدعى رسول الله- صلى الله عليه وسلم- عليًّا بن أبي طالب- رضي الله عنه- ليحرر بنود الاتفاقية، وفيها: "باسمك اللهم، هذا ما صلُح عليه محمد بن عبد الله سهيل بن عمرو، واصطلحا على وضع الحرب بين الناس عشر سنين يأمن فيها الناس، ويكف بعضهم عن بعض، وعلى أنه مَن قدم مكة من أصحاب محمد حاجًّا أو معتمرًا أو يبتغي من فضل الله فهو آمن على دمه وماله، ومَن قدم المدينةَ من قريش مجتازًا إلى مصر أو إلى الشام يبتغي من فضل الله فهو آمن على دمه وماله، وعلى أنه مَن أتى محمدًا من قريش بغيرِ إذن وليه ردَّه عليهم، ومَن جاء قريش ممن مع محمدٍ لم يردوه عليه، وأن بيننا عيبة مكفوفة، وأنه لا إسلال ولا إغلال، وأنه من أحبَّ أن يدخل في عقدِ محمدٍ وعهده دخله، ومَن أحب أن يدخل في عقد قريش وعهدهم دخل فيه، وأنك ترجع عنَّا عامك هذا، فلا تدخل علينا مكة، وأنه إذا كان عام قابل خرجنا عنك فدخلتها بأصحابك فأقمت بها ثلاثًا، معك سلاح الراكب السيوف في القرب ولا تدخلها بغيرها، وعلى أن الهدي حيث ما جئناه ومحله فلا تُقدمه علينا".
ورأى بعض المسلمين هذا الصلح إجحاف بالمسلمين لكن رسول الله علم أنه يكفى أن المشركين إعترفوا بهم كقوة وكان النصر والفتح حليفهم بعد أن إستتب لهم الأمر وأعادوا ترتيب أمرهم
وأرى أن نرتب أمورنا وننتظر فقد تغيرت مصر كلها قام الشباب باجذوة الأولى وإنطلق معهم 95% من المصريين فلم العجلة والخوف فقد كان الله ولايزال معنا ويكفى رموز النظام ( 80% ) بالسجون وخارج اللعبة حسنى مبارك قد قرر الشعب تنحيته وأجبرته القوات المسلحة ( بإجتماع المجلس الأعلى له وإستمراره بدون المشير طنطاوى ) يؤكد أنه لارجعة فى حكم مبارك وأنا أثق بالقوات المسلحة لأنى كنت ضابطا نقيب بحرب أكتوبر 1973 م وأعرفهم جيدا معظمهم كانت مطالبهم كما طالب الشباب وشعب مصر ويكفى أنهم نحوا عمر سليمان يعنى الكثير أما شفيق فهو رئيس وزارة مؤقت والدليل هو نائبه د/ يحي الجمل وكذا رأى المجلس الأعلى للقوات المسلحة التى هى فى حيرة من إدارة شئون البلاد ومن كثرة الفساد والقضايا المعروضة على النائب العام ( فيه واحد فقط من رموز النظام السابق مقدم فيه ألف شكوى تجاوزات ونهب وسرقة وخلافه )........
أخى إنتظر فالصبر لن يثنينا عما بدأناه وخلال شهور قليلة سيظهر كل شيئ وسوف نعرفهم فقط من هو شعب مصر لن يستطيعوا حتى ولو كان الجيش كله ضدنا أن ثنونا عما بدأناه
أقول لك كلمة أخيرة لست معك فى العجلة لكنى لاأخاف من ثورة مضادة كما يقول البعض فالقلة الباقية المؤيدة لاتنال هذا الشرف لاتنسى أن الداخلية حوالى 1700 واحد منهم 40% لم يعودوا ( حوالى 500 ) إضافة إلى الحرس الجمهورى الذين قد قبضوا على شباب وحبسوهم وسوف نفك أسرهم بإذن الله وهم فعلوا ذلك تحت لباس الجيش ( خديعة ) ليلة 2 فبراير
أربعاء الجمل رأيت عربة حمراء بها قادة من الجيش لواءات تدخل ميدان التحرير وتأمر الدبابات بالإبتعاد وأبلغت الشباب بشكى فيهم ولبسهم فأكدوا أنه فعلا هناك بعض من رجال أمن الدولة والحزب الوطنى طلبوا منهم أن يفضوا الإعتصامات حقنا للدماء وكنا ليلتها 2.5 مليون مواطن ليلة خطاب أبونا الحرامى وطلبه أن يدفن فى مصر وهو يهودى تعلم من أسياده الأمريكان واليهود كيف يتمسكن حتى يتمكن وكان خلالها يعد العدة لتهريب أمواله والبقية من الشعب الخايب ( إتحاد كرة القدم وأكثرية الفنانين والصحفيين والإعلاميين ) بكت وقالت : آسف ياريس
وهم الآن فى بيوتهم لايعرفون حتى أنهم يملكون لسانا يتكلمون به وبعضهم غير جلده وتكلم بلسان آخر ....
إن النصر مع الصبر فإصبر ياأخى ولن يضيع الله أجر من أحسن عملا
المرة القادمة ستكون ستون مليونا يأكلهم ويدوسهم بالأقدام وليس عشرون مليونا بصر كلها كما كان....
انا دماغي وجعتني من كتر التحليلات ..
الفوضى دي كلها المتسبب الاساسي فيها هو الحزب الوطني
30 سنة فساد .. و اكتر من مليون منتفع !!
تفتكروا المنتفعين دول هيسكتوا يعني و همة شايفين انهم واحد ورا التاني بيتحاسبوا ؟؟
أكيد لأ ..!!
و اكيد كل واحد فيهم مستعد يصرف على قتل الثورة كل فلوسه لحد آخر جنيه عشان محدش يضر مصالحه .
كمان فين التنظيم ؟؟
ليه الثورة ماشية بهمجية كدة ؟؟؟
ايه ناس تعمل اعتصام و ناس تنقسم عليهم و ناس مش عارفة تروح فين ..!!
امال ايه مجالس الثورة اللي طلعت مرة واحدة ... راحت فين دلوقتي ؟؟
يا خوفي لا يكون كل واحد من دول بيدور على طول بطولة و قيادة و أكلة حلوة و هدمة نضيفة !!
انا اتلخبطت اصلا
مش فاهمة في ايه ..!
مصطفى
اذا كنت تقصد ان احنا غلطنا في التواجد بعد حظر التجول فالمتظاهرين لو كانوا التزموا بحظر التجول من اول يوم كان زمان مبارك دلوقتي في قصر العروبة بيعد في جماجم الثوار
معاك في موضوع الارتجال ده وبيقلقني اكتر من شفيق نفسه
فرصة سعيدة يا افندم :)
لورنس
بالقل برده محدش من الثوار طلب من الجيش يحل مشاكل 30 سنة , شفيق بقاله 30 يوم بس وهي دي المشكلة يعني مهوش خبير استراتيجي ولا هوه احسن من مبارك علشان الجيش يتمسك بيه !!!!!!!!!!
سؤالك ده عين العقل , لان دي اسمها لعبة المستهبلة , الجيش بيستعبط واحنا بنسوق العبط عليه لان الجيش عارف ان دي حكومة حزب وطني اللي الورة قامت ضده واحنا عارفين ان الجيش اللي حاططها فاحنا الاتنين بنقف في النص من غير منتصادم ونضرب الحكومة بالقلم والجيش يضربها بالقلم برده بانه يغير فيها :)
لا لو انت ليك صورة مع مبارك اوعدك الثوار مش حيقفوا ضدك
العملية بقت كتير دي هوه اللي عاوزه الجيش من التغييرات الشكلية اللي بيعملها واصراره على وجوه بعينه علشان الناس تقول للثوار كفاية كده الجيش غيرلكم الحكومة انتوا عايزين ايه تاني علما ان الجيش مغيرش حاجة شفيق وابو الغيط ووجدي ومرعي وسيد مشعل وفايزة ابو النجا ده غير الوزرا الجداد اللي همه حزب وطني برده اللي رئيسه المخلوع
قلنا ان الصواب من عدمه شىء نسبي , نسيب للزمن يحكم بينا بس ياريت تحدد مقاييس الصواب قبل تحديد الصواب نفسه
الايام بيننا لما تلاقي انه من حقك ترشح نفسك رئيس جمهورية ابقى ادعيلي وعيني مكان شفيق :)
الوالد الفاضل
المهندس فاروق
صلح الحديبية اراه قياس مع الفارق لانه لا يوجد حتى الان من اتفق الثوار على ان يتحدث باسمهم فضلا عن ان يعقد اتفاقا باسمهم اضف الى ان النبي صلى الله عليه وسلم رجع وهو قوي الى ارض محددة ولم يحدث ان تفككت جبهة المسلمين مثلما يحدث الان ولا يوجد احد يريد ان يصعد على المنصة واذا مطلعش يتقمص يعني الثورة مش حتقدر تكمل بالوضع ده لان الناس حتفقد ثقتها باي شخص بيطلع يتكلم , يعني احنا في عرض الوقت منعا لتفكك جبهة الثوار وضياع دم الثورة بين الثائرين فلا يوجد محل للقياس بيننا وبين النبي صلى الله عليه وسلم
* الرموز التي تقبع في السجن يمكن استبدالها بمليون شخص يعشقون لعق الاحذية وخصوصا احذية السادة
حضرتك تثق بالقوات المسلحة وانا لااثق الا بقوة الثوار وعددهم واجتماعهم بعد الله سبحانه وهي التي اجبرت الجميع بما فيها الجيشش على احترام الثورة ولن انسى تحليق الطائرات لاخافة المتظاهرين بميدان التحرير ولا محاولات دخول الدبابات الى الميدان لولا ان منعهم الثوار باجسادهم ونومهم داخل جنزير الدبابة ولا سكوت ظباط الجيش يوم الاربعاء الدامي وكانهم يشاهدون مباراة لمصارعة الثيران والقناصة تحلق فوق الاسطح وفي الصباح بعد فشل مهمة كلاب وجدي وجماله وحميره ( وزير الداخلية الحالي ) قام الجيش نفسه بتفريق البلطجية من فوق الكوبري المطل على الميدان !!!!!
اثق في القاعدة العريضة من الجيش كثقتي بالثوار ولكني لا اثق فيمن غذي من خير مبارك وفلله وعلاواته وصداقته
اذا كانت القوات المسلحة في حيرة من ادارة شئون البلاد فلماذا لا تتركها الى مجلس رئاسي مدني ؟؟؟
ياليت لي ثقتكم بقدرتكم على تجميع الناس في اي وقت فلو لدي هذه الثقة لسكت ولكن كيف اسكت وانا اعرف انا كل يوم يمر هو تثبيت واعادة تدوير لوجوه قديمة جديدة فيرحل مبارك ويبقى نظامه ونضيع نحن قبل ضياع دم من مات .
ربنا يوفقنا ويجمعنا للي فيه الخير لمصر ولاهلنا ويهدينا ويحمينا
شيماء علي
ادعي ربنا يحمي الثورة , ولو تعرفي حد من اللي بيتكلموا كتير ويطلعوا في التلفزيون كتير قليله يجتمعوا مع بعض وكفاية كده فرقة وان كان معلوماتي انهم فعلا عاملين مجالس هرمية وموجود ليها افرع في المحافظات كمان
انا مش عارف اصلا تعليقك على البوست معاه ولا مش موافقه عليه !!!
أنا بس عاوز أعرف ايه آخرتها لأني فعلا تعبت
لورنس
انت متخيل اني متعبتش واني مش خايف واني كل ما بسمع عن بيت اتسرق من ملثمين ببقى مبسوط وبقول ده شىء طبيعي وانا نافخ صدري , لا الشىء الوحيد اللي بيخليني اكمل كلام هوه قناعتي التامة ان احنا كنا تحت احتلال اسرائيلي امريكي بوجوه مصريه زي افغانستان وكرزاي , وخوغي ان الاحتلال ده يرجع تاني بوجوه جديدة , علشان كده بكمل يننتصر ويتحقق منى الشعب في حاكم يختاروه بنفسهم من غير امن دولة وقانون وطوارىء وبتوزيع عادل للثروة , يا اما نموت ونروح عند رنا عسانا نستريح في جنته .
ادعي ان اخرتها تكون خير , خلاص كده لا الجيش ولا اللي بيلعبوا بينا باقي عندهم كروت يحرقوها فيه اسماء وطنية معروضة الجييش يختار منها ميختارلناش هوه بس وبعدين كل حاجة تمشي في مجراها الطبيعي ونبدا نشتغل من غير ما كل واحد يتحجج بمرتبه وان كل الناس بتسرق وعالم الرشوة والفساد اللي كنا عايشين فيه , احنا مش حنعيش في المدينة الفاضلة بس غالبا حنعيش في بلد طبيعي الفساد موجود فيه بس استثنا مش القاعدة
بصراحه بصراحه
انا بقول ان الغتره اللى حايه دى تعدى بحلوها ومرها ولما يجة محمد البرادعى هنتق معاه على الخطه اللى ينفذها فى فتره حكمه
ده رأيى انا عارفه انى متخاذله شويه بس ده احسن من مفيش
ما كفاية
الفترة الجاية مش حتعدي الا لما احنا نعديها محدش بيعمل لحد حاجة , والبرادعي هوه الشخصية الوحيدة التي لم يستضفها التلفزيون المصري او يتحاور معها الجيش ؟؟؟؟؟؟؟؟!!!!!!!! اسالي نفسك اشمعنى هوه , لانهم عارفين انه الشخصية الوطنية الاكثر شعبية بين الشباب , وانه مش من النوع اللي الحنجوري بل الاكثر عقلانية وترتيبا فاذا مخدناش بالنا وجبناه بنفسنا الجيش مش حيجيبه
يارب تكون وضحت الصورة
الصوره وضحت بس فيه حاجه
الجيش مش هو اللى هيجيب الرئيس احنا اللى هنحتاره ولا انا فاهمه غلط؟
بس كلامك صحيح طبعا فى التلفزيون المصرى
وعلى فكره البرادعى طالع قريب على الجزيره ( اللى الشعب بيعتبرها مصدر ثقته)
الله المستعان
ما كفاية
هوه ده السؤال مين اللي حيجيب الرئيس الجاي مش هوه مين الرئيس الجي ؟
كل اللي بنقوله ده علشان نحافظ على ار ادتنا في ان احنا اللي نختار مش حد يختارلنا رئيس وزراء كان بيتفرج علينا واحنا بنموت في التحرير ووزير عدل ييختار قضاة يشرفوا على الانتخابات بالطريقة اياها , حيقولوا وزير العدل مش هوه اللي بيختار اساليهم مين اللي حارب تيار الاستقلال في القضاء
إرسال تعليق