الخميس، فبراير 17، 2011

هام 2

بداية اعتذر اني لن اكمل حديثي الذي بدأته عن المادة الثانية من الدستور وذلك لسببين الاول اني اطمأننت الى حد كبير بعدما اختار الجيش المستشار طارق البشري لهذا الغرض وانا اثق فيه انه ليس ممن يبيعون هوية الوطن من اجل ارضاء اصحاب الصوت العالي , كما ان الازهر قد اوضح موقفه من الرغبة في الدولة المدنية مع عدم المساس بالمادة الثانية والثاني هو رؤيتي لشبه الاجماع الوطني على الحفاظ على المادة الثانية من الدستور وعدم المساس بها في ظل دولة مدنية وهذا ما قامت الثورة من اجله الا وهو الدولة المدنية , وعليه نؤجل الكلام عن محاسن التشريع الاسلامي وعدالته ومعنى اسلامية الدولة وكيف ان احكام الله افضل من اي قوانين وضعية ,وهذا التأجيل نابع من احساس صادق بأننا في مرحلة خطرة تحتاج الىى كل الجهود لاظهار الحق وطمس الباطل والقضاء على ذيول الثعبان واذرع الاخطبوط التي لا تزال حية ولا أجد تفسيرا لهذه الحياة الا أحد أمرين اما انهم واثقون بأن الرأس حي ولا يزال مسيطرا من وراء ستار أو انه هيجان النزع الاخير وفي كلتا الحالتين فواجبنا ان ننتبه حتى لا تضيع مصر من بين ايدينا بعدما فرحنا جميعا واحس الكثيرون بالفخر لأول مرة أنهم مصريون و ان كل هذه الفرحة وهذه الاحاسيس النبيلة الى جوار الدماء الزكية الطاهرة التي ارتفعت الى الجنة -كما ندعو ونامل من الله الكريم- تقول لكم وتناديكم ان تحافظوا على مكاسب ثورتكم و المضي قدما في تحقيق الباقي وعدم التعلق بالاماني والاشخاص والجهات بل التعلق بالله عزوجل ثم من بعده التعلق بذواتنا فليحدد كل شخص فينا ماذا يريد ولعله اصبح واضحا الان انه لا خيانة ولا عمالة ولا كنتاكي بعدما تبرأ المتلونون من كل ما قالوه عنهم واتضح ايضا أن مصر لازالت مصر ولم تصبح شيئا اخر عندما رحل البائد المخلوع ولم تنشطر السماء ولم تقع على الارض حزنا على فراقه  ولم تتوقف الزهور عن نشر عطورها ولا السماء عن ارسال قطرها كما أوهمونا انه لا حياة لمصر بدون الزعيم  , وعليه فيجب السعي وبجدية واجتهاد من أجل مصر افضل فلنصمم على مطالبنا كاملة من جدول زمني محدد وواضح لانتقال السلطة لادارة مدنية منتخبة , الضغط في اتجاه ابلاغ الجميع اننا لازلنا مصرين على مطالبنا وانها لم تكن هوجة او نشوة مؤقته بل هي ثورة لن تسمح لأحد باجهاضها ايا كان .
* حملة الرئيس تعبان -مش عارف ينام - زهقان ومضايق - مبيخدش علاجه - عياله بيضربوا بعض - ابنه السبب - مكنش يعرف , أحب اقلكم فيه الاف المصابين بالسرطان تعبانين وبياخدوا مورفين وكيماوي ده غير بتوع الفشل الكلوي بسبب المواد المسرطنة اللي كان بيجيبها وزيره يوسف والي من اخته التوأم اسرائيل ممكن تروحوا تشوفوا الاطفال في معهد السرطان اللي اتبنى بعرق المصريين بينما الرئيس الرمز وحاشيته كانوا بيخزنوا دولاراتهم في سويسرا وبيفرلي هيلز , وفيه الاف المعتقلين بدون محاكمة في السجون مش عارفين يناموا من كتر التعذيب النفسي والجسدي , وفيه ملايين من الشعب المصري معندهمش رفاهية انهم يرفضوا العلاج لانهم مش لاقيينه وانزل روح اي مستشفى حكومي جنب بيتك , ابنه السبب وانا مالي هوه انا اللي كنت انتخبت ابنه ولا هوه اللي جابه علشان يساعده , مكنش يعرف يبقى مينفعش رئيس جمهورية ممكن نشوفله شغلانه تناسب سنه بعد محاكمته .
* حملة بابا الرمز , الاب اللي بيقتل ولاده وينام في حضن اسرائيل ويشتيكلها همه يبقى مش بابا والرمز اللي يسجن رئيس اركان حرب القوات المسلحة في حرب الكرامة (سعدالدين الشاذلي ) اللي كان رئيسه يستاهل ان يتعمل فيه زي معمل في رئيسه الرمز اللي بجد مش رمزي فهمي نظمي.
*حملة براءة ضباط الشرطة اللي بيخدموا الوطن الطيبين الطاهرين اللي السبحة مبتقعش من ايديهم ولا سجادة الصلاة بتفارق كراسيهم ,
هيه كلمة واحدة الظباط المحترمين ينزلوا يكملو شغلهم باحترام ومحدش حيكلمهم واللي يتفرعن على ظابط شرطة استغلالا للموقف  يتحاكم بتهمة التعدي على موظف عام , اما ظباط الشرطة اللي كلنا عارفينهم والداخلية عارفاهم والحكومة اللي لازم تمشي في اقرب وقت عرفاهم يتحاكموا ويتسجنوا زي حبيب العدلي يونسوه يمكن يخلصوا على بعض في السجن ونرتاح من اشكالهم كلهم , تقلي المجند الشهيد والظابط الشهيد هوه راح عند ربنا خلاص احنا مش حنحاكم الجثث زعلان عليه حصله وحل عن سمانا , لما بنقول الظابط المجرم بنتكلم عن اللي كان بيضرب الناس في المظاهرة بالرصاص الحي واللي بينفجر في الجسم واللي كان بيطفي السجاير في جسم المتهم ويعلقه في السقف  وياخد ابرياء رهاين علشان المشتبه فيه يسلم نفسه واذا كنتوا عندكم الزهايمر احنا الحمد لله بشر سليم معافى .
* حملة المسامح كريم : ليك حق او فلوس او اعتقلت مره ظلم واتاخدت اشتباه او اتقتل اخوك او ابنك او ابن اختك وعايز تسامح انت حر انت راجل كريم ونصحتني كتر خيرك لكن تمنعني او تقف في وشي وانا بطالب بحقي من اللي عذبني او شردني او قتل ليه قتيل او دهس بعربية المطافي ولا مدرعات الامن حد اعرفه ! حشوطك وحاعتبرك مساهم في الجريمة وبدافع عن المجرم , بتتكلم عن شرع يبقى تكمل قراية المصحف لغاية متوصل لحاجة اسمها القصاص (لكم في القصاص حياة ) لسه منتش فاهم وبتقول النبي عفا عن اهل مكة , اقرا عن الناس اللي النبي استثناهم من العفو اصحاب الجرايم المشهورة زي عبدالله بن ابي السرح وعكرمة وعبدالله بن خطل اللي اتقتل وهوه متعلق باستار الكعبة  بتتكلم عن شرع يبقى متنقيش يبقى تقول شرع ربنا القصاص والتسامح ده تقدر انت تتسامح في حقك لكن انا مش مسامح في حقي علشان ميجيش واحد غبي بعده يقول اموتلي منهم مليون واديه شعب حلو وطيب ولما يقدر عليا حفكره بانه شعب حضاري يقوم يسيبني اعيش اليومين اللي فاضلين في منتجع بفلوس الشعب الطيب الحبيب المهاود .
*حملة اصحاب المطالب الفئوية : حد يروح يتفاهم معاهم لقى مطالبهم عادلة ومنطقية يلبيها او يوعد بتلبية ما يمكن تلبيته في وقته , لقى انهم بيستعبطوا وطالعين في الهوجة لاسباب تانية وحد زاققهم علشان يقول شفتوا البلد حصل فيها ايه من غير كبير , فهموهم , مفهموش فهموهم تاني , مفهموش  , ده موضوع تاني ممكن ساعتها نقول للجيش اتصرف انت معاهم  دول مش معانا دول باقي البلطجية التايهين في معركة الجمل  .
* انا مش سلفي بس حبيت اوضح ان المشايخ اللي في اسكندرية مش تبع امن الدولة وان مطالبهم جت علشان خوفهم على المادة التانية في الدستور فحبوا يقولوا احنا هنا محدش ينسانا وبالمرة حبوا يفكروا الناس بتطبيق الشريعة من باب معذرة الى ربكم لانهم عارفين كويس ان ده مش حيحصل فياريت مش كل واحد موقفه  مش معانا يبقى خاين للقضية .
 بس بالنسبة ليه مش معايا وواقف على جنب تتفرج , اتفرج براحتك  لكن مش معايا وبتحاول تمنعني يبقى انت ضدي يارب تكون مفهومة .
* باختصار المشير طنطاوي تعيين مبارك , وشفيق تعيين مبارك , 18 وزير من الوزارة بقوا 17 تعيين مبارك يعني لسه بدري ,الجيش على راسي من فوق وحعمل نفسي ناسي الطيران اللي حلق فوق المتظاهرين ومحاولات تضييق مساحة المتظاهرين في ميدان التحرير ولا الظابط اللي كان بيعيط علشان معندوش اوامر يحمي المتظاهرين يوم موقعة الجمل 2011 ولا القناصة الي كانوا بيصطادوا المتظاهرين بالليل على عينك يا تاجر , وحفتكر انه مضربش الشعب وحل مجلس الشعب والشورى وعمل بداية جدول زمني , بس كل ده ميمنعش ان الجيش يفهم ان احنا نقدر ننزل الشارع في اي  وقت علشان نكمل , محدش ينام لسه قانون الطوارىء متلغاش ولسه حكومة مبارك هي اللي في السلطة , ولسه السلطة مبقتش في ايدك , كمل لغاية انتخابات نزيهه بجد واشراف قضائي على الصناديق ورئيس انت اللي انتخبته مش جدك الله يرحمه . ساعتها كل واحد يروح ينام في بيته  , حتقولي اكمل ازاي فيه مظاهرة بكرة انزل بكل ذوق وادب واحترام ولو معاك وردة اديها لاي حد تشوفه  عسكري , احنا نازلين كرنفال الاحتفال بالنصر  علشان اي حد حاطط في باله انه خلاص  شعبي الحبيب المهاود خلص اللي عنده نرجع بقى الناس مكانها ونغير شوية كروت محروقة  وبيتك بيتك بيتك انت وياه ويبقى كل اللي عملناه ان احنا شلنا الدوا وجبنا شاهين!! , كل واحد ياخد باله من حلمه علشان ميتبخرش ويضحي علشان الحلم يبقى حقيقه اذا مكنش علشان دينه يبقى علشان بلده واذا مكنش علشان بلده يبقى علشان يعيش عيشه كريمة واذا مكنش علشان يعيش عيشه كريمة يبقى علشان ولاده واذا مكنش يفرق معاه كل ده يبقى .......
بعتذر عن الطريقة الانفعالية اللي بتكلم بيها مع اني مغلطتش في حد بس برده بعتذر لان فعلا احنا في وقت محتاجين فيه نفوق لغاية ما كل شىء يبقى طبيعي وترجع مصر تاني لينا بجد مش زي سينا ترجع على الورق .

هناك 11 تعليقًا:

fialka012 يقول...

Zajimave...

ستيتة يقول...

حلو الكلام جدا
أه بس لو توضب البوستات شوية علشان اكبر عدد من الناس دائما تقرأه
مفيش شيء اسمه معندكش وقت لأنه مش محتاج وقت
اكتب فقرة ودوس انتر مرتين تنزل فقرتين مسافتين نقرأبراحة عين يا باشا

نرجع للبوست
كل الإنذرات بتسمعني اغنية خلي السلاح صاحي صاحي صاحي

Unknown يقول...

السلام عليكم يا إسلام...

والله البوست ده مش ممكن!! اتفوقت على نفسك... أنا آسف مش قاصد أمدحك المدح الذي ذمه الشرع، لكن بصدق أحاول إعطاء البوست حقه...

فقد قدم ردودا قوية ومنطقية للغاية على عدد من المحاور والادعاءات والحملات مما يدرجه البعض الآن تحت مسمى عام (الثورة المضادة)...

تحياتي أخي الحبيب.

فاروق سحير ( فاروق بن النيل ) يقول...

واحد من الناس................
الحقيقة اللى قولتها كل الناس عارفاها بعضهم مطنش وبعضهم ماتفرقش عندة والأكثرية موش حايسبوا حقوقهم تضيع تانى والمرة الجاية مصر عن بكرة أبيها حاتطلع ونولعها فوق دماغهم ودماغنا موش حانخسر أكتر من اللى خسرناة لكن كرامتنا وحريتنا وشرفنا ومبادئنا لن نتنازل عنها بعد اليوم ولو قد حبة الرمل مافيش تسامح أبدا مع ظالم مفترى كاذب مجرم منافق
شكرا لك صديقة وأنا شخصيا بالبيت منفعل جدا لدرجة إن أم الأولاد بتقولى هدى نفسك شوية ...........

Unknown يقول...

fialka012
طيب عربي واهو بتاعنا , انجليزي وبنفهموه كويس , فرنساوي اخدته في ثانوي , الماني ممكن اسأل واحد صاحبي
لكن تشيكي الله يسامحك
على كل شكرا لمرورك ونتمنى نكون افدناك بشىء

Unknown يقول...

الدكتورة
ايه ده , تعليق على بوستين ورا بعض , بجد ده شىء يشرفني
لما حضرتك تقولي اني كلامي صح يبقى صح ميبقاش اي حاجة تانية
حاضر حدوس على انتر مرتين يا افندم

Unknown يقول...

ماجد
شكرا كتير

Unknown يقول...

الوالد الفاضل
فاروق بن النيل
من باب الذكرى التي تنفع المؤمنين , ولما نكون كتير بنتكلم بنفس الطريقة بنشجع بعض وبننسى المثبطين والمثبطات


بل ابن من ابنائك يستضىء بنصيحتكم الغالية وانا كمان بستأذن حضرتك تهدى شوية علشان نفكر صح و احنا في موضع قوة مش ضعف وده سلاح من الاسلحة الرعب الموجود في قلوبهم .

Emtiaz Zourob يقول...

ربنا يديم عليكم روح الوحدة والاخوة يارب ، وتقدروا تعدوا بمصر لبر الامان ، مصر دي امانة في اعناقكم .. فحافظوا عليها بارواحكم ودمائكم

بنجاواتى يقول...

تمام تمام تمام

كلام جه فى وقته

تسلم ايديك
تحياتى

هبة فاروق يقول...

كل اللى قولتة جميل ومية مية
وسردك فى هذا البوست وضح كل شىء ممكن يبقى سبب فى ضياع ثورتنا اللى مات فيها ابطال ضحو علشان مصر تبقى احسن
اكثر شىء خانقنى بجد المطالب الفئوية يعنى دة وقتة ولا دى ناس بتصطاد فى المية العكرة وعايزة توقف حال البلد
انا سمعت النهاردة ان القوات المسلحة حتاخذ اجراءات قانونية ضد هؤلاء وبصراحة دة شىء اسعدنى
تحياتى على هذا البوست اللى وضح مدى خطورة ما يحدث والذى قد يؤدى الى ثورة مضادة