الأربعاء، فبراير 23، 2011

احنا الشعب

* من زماااااااااان ييجي من 25 يوم كده فيه ناس قالت يلا بينا نحصل تونس على طريق الحرية وناس قالت ده عشم ابليس في الجنة ( اختلاف عادي ومبرر ) , شوية والموضوع قلب جد والناس التانيين حسوا انهم ممكن يعملوا حاجة فعلا فقالوا يلا بينا نساعد بعض قامت ناس تانية قالت كفاية كده انتو بتخربوا مصر ( على اعتبار انها كانت عمرانة وخيرها لاهلها ) الشباب سدوا ودانهم عن حملات التثبيط وكملوا قام الرئيس المخلوع عمل حكومة جديدة وعين نائب رئيس , قاموا الناس التانيين قالوا كفاية كده ! كملوا الاولانيين قام الرئيس قال اخر مرة اعملها واترشح  ,قالوا كفاية كده ! قاموا الشباب كملوا الرئيس ركن على جنب وقال مش لاعب , قام الناس التانيين برده قالوا كفاية كده !, قاموا الشباب كملوا قام عز والعادلي اتسجنوا , قالوا كفاية كده قاموا الشباب كملوا قاموا حاجزين على فلوس  رئيس العصابة قالوا كفاية كده قام الشباب كملوا  طالبوا بازالة رئيس مباحث امن الدولة  قام الجيش استجاب  ( مصدر عسكري في الشروق وان كان الخبر محتاج تاكيد ) قالوا كفاية كده قام الشباب كملوا قام الجيش عمل حكومة شبه جديدة ( احتفظ الحزب الوطني بالوزارات السيادية بنفس الوجوه ) على كل الشباب ناويين يكملوا وده طبيعي لاي انسان حر لقي ان الجيش بيتفهم موقفه يعني احنا الشعب بيطلب والجيش باعتباره امين على الثورة  :) بينفذ طلباتها لانه شايفها مشروعة انتوا مين بقى انا نفسي افهم  يعني ادي الجيش وادي الشعب انتوا مين ؟؟وسؤال تاني هوه انتو مزهقتوش من قولة كفاية بقى علشان خاطري ولا بلاش خاطري انا شوفوا خاطر اي حد يعز عليكم انتوا اللي كفاية بقى واتفرجوا وكلوا ثمرة كفاح المكافحين هنيئا مريئا واوعدكم مش حابصلكم فيها  واذا حصلهم حاجة مفيش مشكلة هما اللي حصلهم مش انتوا .


* ما شاء الله بقى في زيارات للمدونة بتوصل لحوالي 70 زيارة في اليوم ( ممكن يكون من كترة ما انا بفتح المدونة واقفلها ) , ومع كترة  عدد الزيارات ممكن يكون فيه تعليق او اتنين او خمسة في المتوسط انا فعلا مش عارف هل هوه اعتراض على المضمون , طيب لو معترض ليه تبخل بالنصيحة مش ممكن اكون غلطان ومش عارف او مش شايف اللي انت شايفه ونصيحة ليك اذا مكنتش مقتنع انا بكرر الافكار في اكتر من تدوينة متتالية لو مش عاجباك المدونة نصيحة متقراش لان الافكار حتترسب في اللاوعي لديك خصوصا بسبب طريق ترتيبها وتسلسلها المنطقي يعني ممكن تلاقي نفسك بعد كام مرة بتسمع التدوينة لنفسك في الحمام , طبعا الكلام للي بيدخل يقرا ويلاقي الكلام مش عاجبه فبدل ما يرد يمشي لكن المدونين اصدقائنا المؤيدين لحكمنا قصدي يعني سكان الولاية الطيبين اللي معانا ومش من الاعداء ( بهزر محدش ياخد الكلام بجد , ممكن تعتبروني في مرحلة الافاقة والتفاؤل المشوب بالحذر الشديد ) , على كل انا شعاري اما ممات يسر الصديق واما حياة تغيظ العدا بالاضافة اني فيه حاجات كنت بكتبها وانا علي يقين ان ربنا حيوصلها للمستفيد منها والحمد لله كتير من الاحلام بقت واقع .( واذن في الناس بالحج يأتوك رجالا و على كل ضامر يأتين من كل فج عميق ) الاماكن البعيدة مسمعوش الاذان لكن ربنا وصله ليهم .




* كل المؤشرات بتقول ان الجيش والشعب ايد واحدة فعلا وان الجيش بينفذ معظم طلبات الشعب ممكن ببطء شوية لكنه بينفذها في النهاية  بس ده ميمنعش من تساؤلات مشروعة لا تنتقص من المجلس العسكري في شىء لكنها بعض من حقوقنا في المعرفة 
     - لماذا لا يضم المجلس العسكري افراد مدنيين الي المجلس الرئاسي اذا كان يرفض ان يتكون مجلس رئاسي مدني به فرد عسكري , حيث ان طريقة الاستعانة بخبراء والجلوس معهم والاستماع اليهم ثم شكرهم ولير الجيش ما يراه لا تختلف كثيرا عن طريقة اتكلموا براحتكم والحكومة تعمل اللي هيه عايزاه ( واضح في الردود على طلب اقالة شفيق وابوالغيط ووزير الداخلية اللي كان موجود يوم معركة الجمل )
    - عدم الغاء قانون الطوارىء والاصرار على انه من اجل الارهاب والمخدرات رغم انه لا وجود لتعريف محدد للارهاب لا في الدستور ولا في القانون ؟؟ وهي نفس طريقة الرئيس السابق .
    - حل امن الدولة ( العمود الرئيسي لدولة الفساد واثارة الاضطرابات )
    - صفوت الشريف ., زكريا عزمي , فتحي شرور , عمر سليمان بتاع الصوابع والاجندات . انتو فين ومش بتتحاكموا ليه على تزوير ارادة الامة ولا دي مش جريمة ؟ 
   - حكومة انتقالية اخرى ستشرف على الانتخابات فلماذا ليس الان ؟ وما المشكلة ان يصعد يحي الجمل وهو شخصية مقبولة من المعارضة واكيد من الجيش طالما اختاره لماذا لا يصعد من منصب نائب رئيس الوزراء الى رئيس الوزراء وينتهي الامر 
  - لماذا الاصرار على الاحتفاظ بنفس الوجوه القديمة في الوزارات السيادية ( الدفاع - الخارجية - الداخلية - الغاء الاعلام ) وما هو موقف المشير وزير دفاع في حكومة يرأسها شفيق ام رئيس المجلس العسكري ؟؟!! الذي يرأس شفيق 
  - لماذا يختار الجيش الوزراء  ولا يفاوض ممثلي الثوار او القوى السياسية ؟  
- هل الجيش ينفذ ما اجتمعت عليه مطالبات القوى السياسية والثوار ام ما  يراه هو صالحا ؟ 
  - وزير الداخلية في اليوم الساقع بينفي ان الشرطة ضربت نار على المتظاهرين ؟؟؟؟؟؟؟؟؟؟؟؟؟؟؟؟؟؟!!!!!!!!
http://www.youm7.com/News.asp?NewsID=356756 طيب ده نسميه ايه ؟ 
  - يعني ايه الجيش يطلب من رؤساء تحرير الصحف القومية انهم يستقيلوا ( في العاشرة مساء في مكالمة تليفونية ) ولا يقوم باقالتهم بعد الادوار المشبوهه اللي بيقوموا بيها ( كتير بيدّعوا انهم مع الثورة وانهم كانوا من اول يوم والكلام الفاضي ده وفي النهاية يطرح اشياء هدفها الوحيد هو تقسيم صف الثوار )
  - ليه الرئيس في شرم ومش بيتحاكم على اطلاق النار على المتظاهرين وليه العادلي اتحول للجنايات بتهم مالية مش بتهم التعذيب والقتل واختفاء مواطنين ؟
 - يعني ايه الافراج عن معتقليين جنائيين بالرغم من ان المطالبات بالافراج عن معتقلي الرأي ؟ 




** اتعودنا نطالب والجيش بيفتكر !!! الحاجات اللي بنطالبه بيها  وغالبا بيعملها , انا راضي واخويا راضي مالك انت ومالنا يا قاضي ؟


** باختصار كل اللي تم تم تحت ضغط المظاهرات المليونية مش منحة من حد  , الا ربنا وحده , وحقنا نفهم ونطمئن على مستقبل البلد اللي اندفع فيه دم مش مية .


** الاخوان عفريت الزمان وبعبع الشجعان نعمل فيهم ايه علشان الناس تنام وترتاح وتسمع شهرزاد حتى الصباح  , مصريين والله العظيم مصريين يعني ليهم حق يترشحوا في انتخابات الرئاسة والبرطمان والمحليات زي باقي المصريين ومع ذلك قالوا مش مترشحين للرئاسة ومش حنسعى لاغلبية برطمانية , والقرضاوي اللي قالوا خميني ساب البلد ورجع قطر وقال مفيش مشايخ ولا ملالي حيحكموا  , انا عندي قناعة ان اعداء الاخوان والسلفيين مش شرط انهم يكونوا اعداء الدين ممكن يكون اتعرض لمواقف شخصية سابت اثر سلبي  عليه وممكن يكون مش مقتنع بان الاراء المطروحة اسلامية فعلا وان فيه خيارات تانية اسلامية برده ممكن تبنيها  وممكن يكون خوف من مجهول ميعرفهوش لكن فعلا فيه ناس يتهاجم الاسلام عن طريق مهاجمة الاسلاميين لانهم ميقدروش يهاجموا الاسلام نفسه في مجتمع مسلم ودول احب اقولهم شايفك وعارفك وحاجيبك وحنفضحك كمان بس مش وقتك علشان احنا مش فاضيين .
في النهاية شكرا لكل اللي بيقرالي المختلف قبل المتفق ورحم الله رجلا اهدى اليّ عيوبي . 


الثقة لا تمنع من الحذر , مظاهرات يوم الجمعة مش حتوقف مصالح ولا حتعطل تك تك الانتاج ولا حتمنع الصعود الاقتصادي الصاروخي لمصر , دي مجرد رسالة ان فيه حد لسه بيحمي الثورة وصاحي لباقي مطالبها ومنصحش باي مظاهرات في ايام العمل وحتى اصحاب المطالب الاجتماعية مع احسان الظن  ,بامكانهم يقوموا بوقفاتهم الاحتجاجية بعد ساعات العمل الرسمية .

** معدتش بسمع عن حملات انا اسف ياريس وحقك علي ياعادلي وابوس راسك يا عز , ده معناه ان التحذير بيجيب نتيجة , محدش يسكت اللي فاهم يفهم اللي مش فاهم واللي مش فاهم يسأل واللي كل وظيفته في الدنيا انه يقول يا لهوي يا لهوي ممكن تعمله بلوك علشان متحتاجش لاسبرين للصداع , انا بقول الكلام ده وانا مطمن ان المدونات مش بيتعملها بلوك :)  يعني محدش حيعمل لمدونتي بلوك .
* زمان كنت بتكلم بانفعال ممكن ييجي اليوم اللي اشرح فيه السبب لكن خلاص الدنيا اتغيرت ودلوقتي ممكن نتكلم عن الرأي و الرأي الاخر علشان فيه وقت للكلام , خلال الشهر اللي فات مكنش فيه وقت غير للفعل واظهار الحجة واللي عايز ييجي ييجي واللي مش عايز يخليه في البيت لكن دلوقتي ممكن نتناقش براحتنا .
ادعوا لاخوانكم في ليبيا محتاجين دعاكم , ممكن يكون دي بداية حاجة اكبر. 

هناك 14 تعليقًا:

الميكروباص يقول...

احنا نطلب والجيش ينفذ أنتم مين؟
انت تسأل احنا مين
أقولك
انا واحد لي وجهة نظر مختلفه عن وجهة نظرك
وصحيح ممكن تكون المطالب التي تنادي بها الآن يتم تنفيذها حرفيا، لكن هذا ليس معناه أن كلها صحيحه
أنا شايف مثلا ان حل مباحث امن الدوله خطأ قاتل- من وجهة نظري التي لا قيمة لها بالنسبه لكثيرين- لأن حلها سوف يؤدي إلى كارثه
ستقول لي "ما قلتم كده على مبارك ولم يحدث شيء" أقول لك انتظر النتائج بعد فتره وليس الآن
وعلى الرغم من ها انا لا اتمنى ابدا أن يسوء الحال لكي اثبت ان وجهة نظري صحيحه، فهذا تفكير شيطان
وكما قلت لك هي وجهات نظر في الامور لأن بالفعل الامور معقده
وكمان فيه شيء بالنسبه لموضوع المتظاهرين
تقابل طرفان- حدث عمليات قتل للمتظاهرين، فمن قتل عساكر الامن المركزي؟ ومن حرق عربات الامن المركزي؟ ومن حرق الحزب الوطني؟ طبعا قول ان من فعل هذا هو الحزب الوطني لكي يلصقها في المتظاهرين كلام لا يدخل العقل
والدليل، انه علىا لرغم من هروب كل اعضاء الحزب الوطني منه وسقوط الرئيس إلا انه عندما تحدث مصيبه الآن نتيجه للإخلال بالامن يقول الناس ان الرئيس هو اللي وراها حتى يبعدوا عن انفسهم شبهة انه حدث فوى بسبب الثوره، ولا يعلم احد ان من اساسيات اي ثوره ان تحدث فوضى قريبه بعدها وهذا امر طبيعي، لكن في الحقيقه الناس لا ينظرون إلى أي شيء نظره موضوعيه وتجد حرب فقط من أجل تأييد وجهة النظر

بنجاواتى يقول...

أنا قريت وهبقى اعلق بعدين بعد ما يستقر الكلام فى اللاوعى عندى واسمعه فى الحمام :))

عموما انا حاسس بألفة شديدة وانا بقرا موضوعاتك وبفرح اوى لما الاقيك كتبت كلام كنت هكتبه عندى فى المدونة علشان بتوفر عليا الكتابة ووجع الصوابع :))))

ربنا ينصر اخوانا فى ليبيا ويصرف عنهم شرور القذافى

انا رأيى المبدئى فى المجلس الاعلى للقوات المسلحة انه محتاج واحد بحنكة يوسف بطرس غالى او محمود محيى الدين بقدرتهم الغريبة على التثبيت وتصدير الوهم

هبقى اقرا تانى على روقان كده واقولك رايى

تحياتى

Unknown يقول...

لورنس
يا مرحبا يا مرحبا , شرفت المدونة بتعليقك قبل اي كلام .
احنا الشعب :)
حاليا ممكن اسمعها واناقشها قبل كده لا
الصواب والخطأ مسائل نسبية يعني اللي اشوفه انا صح ممكن تشوفه خطأ حسب زاوية الرؤية وده حق كل انسان في الحياة وربنا حيحاسبنا كلنا على مواقفنا هل كانت لله ولا كانت لنفسنا ولا كانت بسبب جهلنا ولا بسبب اي حاجة تانية .
حل مباحث امن الدولة هوه السبيل الوحيد لان الناس تعيش في مصر حياة طبيعية ولو جربت تتاخد ظلم في امن الدولة واهلك ميعرفوش انت فين وعنيك متغمية وتتعذب احيانا وتتهدد بالسجن والتغييب تحت الارض كل ده بدون محاكمة ولا محامي ولا حق قانوني مش حتقول اللي انت بتقوله .
ننتظر النتائج ايه المشكلة مورناش حاجة غير اللي الانتظار بس ساعتها حتقولي شكرا على مصر الجديدة ولا حتستنى اسرائيل تهاجم مصر علشان تقول ان اسرائيل هاجمت مصر بسبب الثورة علشان خاطر مبارك كان معيشنا في بيس وامان :)
الامور معقدة دي حقيقة بس دورنا نفك العقدة مش نتفرج عليها وهي بتلف حوالين رقبتنا ولو حصل شىء مش بنتمناه يبقى دي ارادة ربنا واحنا عملنا اللي نقدر عليه والراجي ربنا مش بيحزن على شىء فات ولا يبفرح بغنيمه ولا ما هو ات .
بص بالنسبة لحرق مباني الحزب وعربات الامن المركزي فاعتقادي ان ده فعل بعض المتظاهرين بسبب كرههم لاي علامة تدل على الدولة وسيارات الامن اللي كانت بتحاول تدهسهم اكيد شفت الافلام ولا معتقد ان الجزيرة فبركتها , اما بالنسبة لقتل عساكر الامن اللي صعبانين عليك ممكن تقولي اتقتلوا ازاي ؟ بالرصاص الحي ولا المطاطي ولا قنابل الغاز اللي معى المتظاهرين ولا بسبب التدافع ؟ هل المتظاهرين راحوا يضربوا عساكر الامن ولا كانوا بيدافعوا عن نفسهم ضد عساكر بمدرعات وسلاح , حرام نسوي بين الجاني والضحية !
المصيبة اللي بتحصل الان من انع\ام وجود الامن وبالرغم من تواجده في بعض الاماكن الا انه سلبي وممكن تقرا الجرايد النهاردة مين اللي حرق وزارة الداخلية ( امناء شرطة )
ثورة يعني فترة عدم استقرار دي من ابجديات المعرفة ودي لا تقارن بحرب اهلية كاملة في امريكا علشان تبقى امريكا , تقدر تقولي لو اسرائيل احتلتنا المفروض نقاومها ولا نسكت علشان الفوضى , احنا كنا تحت الاحتلال ودي مش حتاخد وقت كتير علشان تظهر الادلة , ادعي لمصر بالخير , الحمد لله انا موضوعي بما يكفي لعدم المكابرة والاعتراف بالخطأ .
شرفت المدونة ونتمنى زياراتك متتقطعش
تحياتي , يمكنني تقبل النقد بصدر رحب الان بما انه موسم فرحه :)

Unknown يقول...

رئيس بنجا العظمى
لا هوه اصلا مستقر عندك في الوعي واللاوعي , مش محتاج يعني :)
وانا فرحت اوي لما شفت مدونتك علشان بحس بالالفة لما الاقي اني مش لوحدي وان احنا كتير وممكن نساعد بعض
تحياتي

الميكروباص يقول...

ولله شوف
فيه دلوقت أزمه كبيره موجوده
حالة الفوضى من الناس العاديين
انتهزوا الفرص لفعل امور غريبه
لأول مرة في التاريخ اسير في المعادي واجد فيها توك توك واجد سيارات النقل تسير بالنهار وسير الميكروباصات يتغير لأن مفيش عسكري واقف
والناس كمان تجرأت على البوليس زي ما حصل في حلوان من كام يوم

Unknown يقول...

السلام عليكم يا إسلام

والله ما تعرفش سعادتي واستمتاعي بتدويناتك الأخيرة قد إيه؟!!! :)

فعلا حاسس فيها بالهدوء والثقة الشديدة فيما تحمله من حق..

وقد إيه الأفكار مرتبة وواضحة... فاضل بس شوية تلوين على تكبير خط وحتة صورة(كلها شكليات يعني) ويبقى تمام قوي.. :)

طبعا إنت عارف.. إحنا على موجة واحدة، وزي ما قال بنجاواتي إنت مريحني قوي الأيام دي من كتابة حاجات كتييييير...

فقط ألوم نفسي على الكسل أو النسيان أو كلاهما لأني لا أضع روابط مواضيعك عندي.. :(

GOOOOOOOO ONNNNN

أخوك ماجد

ابن الإيمان يقول...


بسم الله والصلاة والسلام على رسول الله:
السلام عليكم:
مش بالضروره اللي ما بيعلقش يكون مش مقتنع...بالعكس يمكن يكون مبسوط من الكلام وانك ريحته وقلت اللي بنفسه...
عندي برضه بشوف كده..
كمان لا ننسى ان ليس الكل عنده موهبة التعبير الصح عن رايه فبتلاقييه بيكتفي بالقراءه والانصراف مسرورا ربما..
على كل حال مجهوداتك مشكوره اخي الكريم...
وانت بتتكلم بحس الوطن والمواطن...
نعم انا مش مع اللي خايفين من نتائج الثوره...أكيد (وبإذن الله رايحين للخير)..

كمان انا معك في ان في ناس بتهاجم الدين من خلال مهاجمة الاسلاميين..هذه واضحه..
هؤلاء نخاف منهم على الشعب وعلى الثوره..

وأخيرا:
نسال الله تعالى الخير للشعب الليبي الحبيب , وأن يخلصه ربنا سبحانه من قيد هذا المجنون وعصابته..
آميين

أدعوك لقراءة موضوعي الاخير عن مجنون ليبيا المضحك المبكي..
على رايك:
اليوم موسم فرحه,أعدك انك ستضحك وتفرح على المجنون في مدونتي..شكرا
أخوك

ابن الايمان

Unknown يقول...

لورانس تاني
لا كده كتير عليا :)
اقولك حاجة ومتؤلقهاشش لحد
انت صدقت ان المصريين اتغيروا في شهر ؟ ده مش ممكن , اللي خلى نظام مبارك يستمر 30 سنة هو تورط عدد كبير من المصريين في الفساد والناس اللي بتستغل الوضع لمطالب فئوية مش وقتها والناس اللي بتبني على الاراضي الزراعية والناس اللي بتسرق بالاكراه في الشوارع والبيوت حاليا كلهم مصريين بالظبط زي اللي كانوا في الميدان مصريين مع الفارق الشاسع بينهم كادميين , وجود النماذج اللي بتتكلم عنها لا ينكرها الا اعمى او احول ومع ذلك معظم الامور دي كانت بتحصل زمان ( مش في المعادي بصراحة :) ) بس كانت بتحصل وده اللي بنتكلم عليه بداية الحصول على الحرية م بناء وطن بثقافة وتحضر وقانون يلزم اللي مبيفهمش غير بالسجن والغرامة
تجرأ الناس على الشرطة انا مش ممكن ابرره عارف ليه ؟ لاني متوقع ان فيه ناس حتستغل الوضع لاظهر ضعفهم المكبوت ضد الشرطة علشان يحسوا بقوة مزيفة نظرا لضعف الشرطة الحالي وغالبا اللي حيدفع تمنه ظباط الشرطة من الفئة المحترمة , ودي حاجات حتاخد وقت بمجرد عودة سيادة القانون حيعرف المرضى النفسيين من الساديين من ظباط الشرطة وافراد المجتمع العاديين ان القانون ساري على الطرفين ومش حيسمح لحد انه يتجاوزه لا من اليمين ولا من الشمال فقط السعي في اتجاه سيادة القانون فوق الشعب وفوق الحكومة مشش فوق الحكومة بس , وصلت ولا لسه :)

Unknown يقول...

ماجد
شكرااااااااااااااااااااااااااااااااااااااااااااااااااااااااااااااااااااااااااا

Unknown يقول...

ابن الايمان
رحت المدونة بس اعذرني لاني لما بشوف القذافي بتعب واشعر بالغثيان والعجز عن الوصول للليبيا او حتى لاي ليبي شىء بيألمني

ENG./ELSAYED,PMP يقول...

ازى حضرتك
بص انا قريت البوست بس النهاردة بس ... وللأسف ... انا مش مركز اوووى اليومين دوول ... لأنى مش حاسس اوى بنتائج الثورة اللى انا متخيلها .

فمعلش انا مش هعلق قدر طرحى لمثال ما .

عارف لما تشترى شقة من واحد بيع وشراء ... وتسجل عقد البيع ف الشهر العقارى كمان .

وتدفع للبايع فلوسه كاش .

وبعد اسبوعين تلاتة - وبكل قلة ادب وسفاقة - يجيى البايع وكانه اهبل او بيستهبل او عبيط او بيستعبط ... ويقولك انا مش عارف ايه اللى خلاك شلت الكتف ده ... يا راجل حرام عليك كده هيبوظ المنظر ... وبعدين ايه التند اللى انت ركبتها دى ... انت محدش جارحك ... انت مش معايا ان الوان الدهانات اللى انت مستخدمها دى اولد فاشون .

انا بقى حضرتك حاسس الاحساس ده ... اعذرنى لو مش مجمع اووى ... بس هوه ده احساسى ... عدم إحكام السيطرة على مجريات الامور ... زى اى مخاليق ربنا قاموا بصورة ... بيأمروا .... مش بيطلبوا ... ركز ف الكلمتين الاخرانين دوول اوى ... احنا بنطلب مش بنأمر .

انا احساسى هيتناما جداً بالثورة لما نأمر ... وبقصد اى أتلاف حقيقى من قوى الشعب - او مجلس رأسى كما ذكرت ف البوست ( ده لو مخانتنيش الذاكرة ) - هوه اللى يأمر .

الشعب بدأ بشعار مكنش عاجبنى اوى ايام الثورة بس الحمد لله على كل حال .

الشعب يريد أسقاط النظام .

الحرية مش ارادة فقط
الحرية قوة ... مريدة ... أمرة ... فاعلة ... أخذة وبقوة .

وصدق الله العظيم إذ وصف نفسه ب " فعال لما يريد "

م الاخر ... انا مش هرتاح الا لما احس بقوة الثورة ... بل وبغشوميتها ... يا سيدى انا عايزها قوة غاشمة ولو شهرين تلاتة ... قوة ظالمة ولو اسبوعين تلاتة ... ما احنا شربنا من كعانا 30 سنه واكتر .

اسف ع الاطالة

وتحياتى اخى العزيز

BNT ELISLAM يقول...

هو انا اكيد فهمت حضرتك عاوز توصل ايه



بس عندى احساس عميق جدا انى لازم افحص البوست والموضوع تانى


تسلم على افكارك
وكتابتك الى دائما بتخلنى افهم اشياء كثيره

Unknown يقول...

المهندس سيد
الدكتورة زمان قالت مثال ابسط
احنا موظفين بعقد ومستنيين التثبيت ,
انت عنك حق وانا فاهمك بس ربنا ينقل الاحساس ده لعدد اكبر علشان نكمل
الجيش على راسي بس مبيجوبش على اسئلتي , الجيش قائم على حماية الثورة واخذ شرعيته منها مش بقوته الذاتية
شكرا لمرورك

Unknown يقول...

وعليكم السلام
رسالتك وصلت ونشرتها بس اختفت
فشكرا لمرورك واسف على هذا الخطأ الفني الغير مقصود