الأحد، يناير 23، 2011

25/1

ممكن حقيقة ,ممكن ثورة , بميعاد ؟ اه بميعاد قوة تحدي حد عنده مانع ؟
ممكن سراب في خيال واحد عطشان تايه في الصحرا ؟ ممكن
مين حيصنع الفرق ؟ الشخص اللي يقرر المشاركة باي شكل
انت مش عايز تنزل وخايف على مصر من الحرامية ؟!!!!!!! قديما قالوا في روسيا السارقون الصغار في السجن والكبار في الدوما
طيب وامتى حنقول لا اذا كان دلوقتي مش مناسب ؟ , طيب واذا كنا مش اهل لان احنا نكون زي تونس , طيب ليه احنا كنا بنتكلم ليه بنعترض طالما عارفين ان المشكلة فينا
السلفيين قالوا مش نازلين ,طيب ومن امتى كانوا بينزلوا ولا من امتى انت كنت بتاخد فتواك من السلفيين.
الاخوان قالوا مش حننزل : طيب مشكلتهم ورؤيتهم وهما احرار ومع ذلك ممنعوش حد من افرادهم من النزول.
الكنيسة دعت الاقباط لعدم النزول : طيب يا جماعة حلال عليكم بابا حسني  بس محدش يشتكي من الاضطهاد.
مش فاهم لما واحد شايف ان احنا شعب بلطجي حنهيج على بعض اول ما الشرطة تتشغل بالمظاهرة , طيب وهي من امتى الشرطة كانت مشغولة بينا , ولما احنا شعب بلطجية اكتر من المحترمين اللي فيه يبقى الحكومة محقة في اننا منستهلش اكتر منها وبعدين كنت نازل نصايح في مهاجمة الوهابيين والنقاب والمش عارف ايه وعاملي من الاحرار ولما جه اليوم قعدت تقول احنا صبرنا تلاتين سنة نصبر لغاية الانتخابات الجاية ؟هوه الاخ منين ؟ هيه الانتخابات الجاية عليها اشراف من الامم المتحدة ؟
واللي بيقول الناس متستاهلش ان معاليه يتظاهر علشانهم عاملي اربع مدونات ليه ؟ وبعدين يا روح جوز خالتك انت بتظاهر علشان ناس ولا علشان حق ضايع ؟
اه غريبة انها تكون بميعاد لكن امتى حنتقابل وازاي ؟ متهيألي شرف التجربه كفاية ووسام على صدر اللي يجرب علشان يعذر نفسه قدام ربنا انه قال للظلم مرة لا ولما يبص لنفسه في المراية ويبص للي بيكتبه يقول انا كنت صادق مع نفسي
كتير قالوا حننزل قدام الكنايس نحميها , ودلوقتي لا مش نازلين مش حنتهم نوايا حد بس يا جماعة هوه احنا بنهيج لما الحكومة تسيبنا نهيج ونسكت لما نشم العين الحمرا يعني السلفيين كان بينضرب بيهم المثل انهم اتظاهروا علشان كاميليا والامن بيحرسهم خلاص اتفضينا من السيرة دي واتقطعت فروتهم هه دلوقتي الدور عليكم الحكومة مش حتحرس المظاهرة دي حد ناوي ؟
الحكومة حتحط بلطجية علشان يقولوا القلة المندسة . قديمة وعارفينها والبلطجية دلوقتي هما اللي بيرسموا مستقبل مصر في انتخابات مجلس الشعب خلاص  وهما مرشدين الشرطة والأشراف في المعتقلات  نسيبهم يبقوا هما الحكومة والحكومة هما ونعيش تحت حماية فتوات الحارة .؟الفرق ان الاتاوة حتندفع بالكريدت كارد علشان احنا بتوع بلوجرز وفيس بوك .!
اللي مش عايز ينزل وخايف ينزل يوقف قدام البيت صعبه دي ؟ او مينزلش ده اختياره والخوف احساس طبيعي في البشر مهوش خلل ,
لكن ملوش دعوه باللي نازل يعني لمنك ولا كفاية شرك ؟
اما اللي بيفكروا دايما بمنطق احنا نقعد ونشوف مين اللي حيغلب واحنا كسبانين السلامة لو منزلناش وعيشه احسن لو اللي نزلوا غلبوا فدولة انا بكرههم من اعماقي وهما اشباه المنافقين الذين يقولون في حالة الضرر الحمدلله اذ لم اكن معهم شهيدا وفي حالة الفوز ياليتني كنت معهم فافوز فوزا عظيما دول ميستهلوش الكلام معاهم اصلا .
اه انا بره مصر وعلشان كده مكنتش عايز اتكلم علشان انا بعيد عن الاذى بس حبيت اقول للي نازل فيه حد معاك , فيه ناس بتصدقك , فيه ناس بتؤمن بقدرتك على الفعل بقدرتك على الحركة فيه ناس املهم متعلق بيك واحلامهم امانة في ايديك .
نصيحة للي نازل خلي نيتك لله ولله وحده بانك تقول للظلم لا كفاية فساد كفاية شرطة مشغولة بالنظام وسايبه البلطجية والمتحرشين ماليين البلد علشان الاذى لو لا قدر الله حصلك تاخد اجرك من الله عزوجل
فيه ناس بتقول ان البلد مليانه حرامية ومرتشين والحكومة مضربتش الناس على ايديها علشان يرتشوا ويضايقوا بعض : مش حجادلكم عندكم حق ومليون حق ومليون مليون حق بس لو فيه حكومة بتنفذ قانون على الفاسدين لن يجرؤ واحد فيهم على انه يعمل كده بس علشان هيه مبسوطة بيهم وهما مبسوطين بيها عايشين في تبات ونبات ليه انا وانت منشمش هوا نضيف ليه احنا مضطرين نعايش البشر دي
قول للي بيدخن  والمرتشي اطلع بره هوه اللي مفروض يستحي مش انت
واخيرا : في فتح فارس المسلمين حصلوا غنايم ومجوهرات واموال كتيرة لانها كانت امبراطورية كبيرة والغنايم دي راحت المدينة مع ناس علشان تتوزع على البشر اللي في المدينة , عمر بن الخطاب نظر لكل الخير ده وقال : ان الذين أدوا هذا لامناء ( اللي وصلوا المال ده كله لغاية هنا ناس امينة ان ايديهم متمدتش عليها )
فقال له احد الصحابة : عففت فعفّوا ولو رتعت لرتعوا
(انت تعففت عن ان تمد يديك الى اموالهم فلم تمتد ايديهم ولو جرت يدك في المال العام لجرت ايديهم ونهبوه ) متهيألي المشكلة كده بقى معروف مين سببها الاصلي

هناك 17 تعليقًا:

ماجد القاضي يقول...

السلام عليكم

للسف مش هقدر اقول رأيي.. لأني جربت اقوله واجهت الجماهير الغاضبة.. وأنا تعلمت كثيرا ألا أواجه الجماهير المتحمسة...

لهذا اسجل مرورا.. واحتراما لما قلت.. وإعجابا بطريقة عرض الأفكار ونقدها.. رغم إنها برضه عنيفة حبتين..
يا ريت اقول للي غلطان (في رأيي) إنت غلطان علشان كذا وكذا.. دون إبداء رأيي فيه شخصيا..

بافكر ألغي هذا التعليق........ لكن مش هلغيه. :)

تحياتي يا دكتور.

Haytham Alsayes يقول...

تسلم يادكتور علي كلامك بجد

طيب في ناس بتقول الثورة هتضر الناس والشعب
ياسلام
هي هو احنا كدة ما شاء الله كويسين وزى الفل
واحد تاني يقول المظاهرات حرام والثورة علي ولي الامر مكروهة
لا رد عليه انت بقي عشان ان دمي محروق من العالم دى
طيب ما الشيخ العلامة يوسف القرضاوى حرض الناس علنا علي الثورة
يعني الراجل لا سمح الله مبيفهمش
طيب الثورة هتكسر الدنيا والسيارات والبلد هتولع
علي فكرة تعالي اتفرج علي علي البلد اللي فيها بلطجية يتحكمون في البلاد والعباد وبيخدوا اتاوة

بصراحة كنت بفضفض معاك
ميعتبرش تعليق
بس عجبتني الحتة بتاعة سيدنا عمر
فعلا الناس علي دين ملوكهم
ولو مبارك تقي هتلاقي الناس اولياء الله علي ارضه

تحياتي

بت خيخة وأي كلام يقول...

السلام عليكم

ازيك يا إسلام

الله عليك

لو كان جوايا ذرة خوف واحدة او ذرة تكاسل
فانا لما قريت تدوينتك زال من جوايا اي خوف واي كسل


اه انا ناوية انزل يوميها ان شاء الله واشارك الناس اللحظة دي
ويارب نزولنا يجي بفايدة ونقدر نعمل حاجة


بس عارف ساعات كدة الشيطان يجيلي ويلعب فى دماغي
ويقولى بإستنكار كريه
هاتنزلي؟
هاتبهدلى نفسك وتنزلى؟
مش خايفة؟


او اقابل حد او اتكلم مع حد مش متحمس كفاية
فايضعف حماستى بشكل غير مباشر

لكن لما قريت تدوينتك بقيت عايزة ماقراش بعديها اى حاجة تانية لحد ما يجى اليوم المنتظر

عايزة افضل على حماستي
عايزة كل الظروف تتيسر علشان انزل

مش عايزة يحصل اى ظرف طارئ يمنعنى من النزول


اه انت يمكن بعيد عن البلد
لكن عليك دور مهم اوي وهو انك تدعيلنا
وان شاء الله ربنا يستجيب لدعواتكم



عجبنى اوى اخر كوبليه فى تدوينتك

حكاية سيدنا عمر بن الخطاب
وعجبتنى الجملة
اللي هي
عففت فعفوا ولو رتعت لو رتعوا

حلوة اوى الجملة دى

تسلم ايدك


سلام
اختك خيخة

واحد من الناس يقول...

ماجد
وعليكم السلام
طيب كنت جربني مش ممكن اكون مختلف حتى في حالة الغضب خصوصا اني على يقين من اننا مش مختلفين في الغاية
شكرا على مرورك وثنائك وده شرف , عنيفة ؟مممممم احنا بنتكلم على مظاهرة :) ومع ذلك فيه الفاظ فيه عايز اغيرها !
كنت متخيل اننا عدينا مرحلة انك تقول ان انا غلطان من غير منا ازعل , كنت عارف ان انت حتعترض على شىء ما في البوست ده لاني قريت رايك عند المدفعجي بس مكنتش اعرف انك معترض على الفكرة نفسها
لا متلغيش حاجة مجرد مرورك بيديني رغبة في اني اكمل
تحياتي اخي الكريم

واحد من الناس يقول...

هيثم
الله يسلمك , ماجد قلل حماسي شوية لا مش من الفكرة من الرد علشان لا تصيبة نيران رد صديقة وانا صداقته مهمة بالنسبة ليا.
الرد على اللي بتتكلم عنهم باختصار حاجة واحدة الانتصار والثبات , ساعتها حيتكلموا عن الدروس المستفادة من الثورة ووجوب طاعة اللي بعده !
الرد بردك في الشارع لما نمنع حد مننا من انه يخرب الشارع لانه بتاعنا مش بتاع الحكومة
تحياتي وبعدين لازم نقول حاجة تودي في داهية علشان تكتب تعليق مؤيد :)

واحد من الناس يقول...

خيخة
وعليكم السلام
مفيش تعليق
نتمنى ليكم السلامة والامان قد ما كنت اتمنى ان فيه رجالة يكفوكم النزول والتعرض لجيش الرعاع المركزي
سلامي وخالص دعواتي

فاروق بن النيل يقول...

دكتور إسلام..............
السلام عليكم ورحمة الله وبركاته........
أحييك على هذه الروح.........
جضرتك بره البلد لكن كلامك يدل على شخصيتك وإحنا عازرينك.........
كلامك مثل الرصاص مشارك معانا بقلبك وإحساسك ومشاعرك وعقلك المستنير الذى ضرب مثلا للمنافقين كما كانوا يقولون لرسول الله صلى الله عليه وسلم ...
بيوتنا عورة .....
تسلم يادكتور وتحياتى لك وأشكرك على الزيارة وسعيد أنى عضوا بمدونتك " لاإله إلا الله " محمد رسول الله صلى الله عليه وسلم

sal يقول...

احييك على هذا البوست اللى فى الصميم

الحركة بركة
وفعل التحرر عمل تراكمى
وان شاء الله كل خطوة تتبعها خطوات
حتى يتحقق الامل

تحياتى وتقديرى

هبة فاروق يقول...

والله كلنا عندنا حماس للتغيير واصلاح بلدنا وانا معاك فى ما طرحتة يجب ان ننتزع الخوف من صدورنا
تحياتى يسلم قلمك الواعى

محمد الجرايحى يقول...

أخى الفاضل
السلام عليكم ورحمة الله وبركاته
فى تجارب سابقة كثيرة كانت تبدأ بصوت عال ثم تخبوا...
وهناك من يشكك فأن هذه المرة مثل سابقيها صوت عجيج ومافى طحين.
لكن لدى احساس خاص قد يكون صادقاً وقد يكون لا..
أن ماحدث فى تونس أجج نيران الثورة فى النفوس .
لذلك قد تكون هذه المرة مختلفة ولكن عندما تشتعل النيران مع رياح الغضب العاتية لاتستطيع أن تتوقع النتائج.

ماجد القاضي يقول...

السلام عليكم

طبعا إنت عرفت رأيي التفصيلي على الإيميل..

لكن مرة أخرى حبيت أحييك على هذا البوست.. واضح من التعليقات أنك أجدت فيه..
وأرى أن أكبر جائزة لك على الإجادة رد أختنا (خــيــخــة) اللي بجد يعتبر وسام لهذا البوست..

تحياتي لك ولكل المعلقين..

واحد من الناس يقول...

الوالد الفاضل ا . فاروق
وعليكم السلام ورحمة الله وبركاته
اشكر حضرتك على كل كلمة ثناء واتمنى اكون دايما عند حسن ظن حضرتك واتمنى ايضا ان لو في يوم لقيت حاجة في المدونة مختلف معاها تراجعني ولا تبخل علي بالنصيحة
شرفت مدونتي باسمكم الكريم

واحد من الناس يقول...

سال
شكرا على مرورك
كلامك صحيح
العمل والايمان هما جناحي طائر الامل

نتمنى دوام تعليقاتك ,لان الولاية هنا بابها اوسع مما تتخيل :)وبتؤمن ان الحوار هو الوسيلة الوحيدة للتقارب
تحياتي وتقديري وشكري

واحد من الناس يقول...

الاستاذة هبه
شكرا على المرور واعذريني في التوجس من كلمة القلم الواعي لانها بتكون صورة في الخيال عن صاحب القلم ممكن تتغير مع اول خطأ غير مقصود او سوء تفّهم فاتمنى انك تاخدي وقتك في الحكم على المدونة وصاحبها قبل الشهادة المشكورة عليها
شكرا مرة تانية للمرور وتمنياتنا بالتوفيق دائما

واحد من الناس يقول...

اخونا الكريم أ .محمد الجرايحي
وعليكم السلام ورحمة الله وبركاته
انت محق وقديما قالوا ( ستعلم بعد ان ينجلي الغبار افرس تحتك ام حمار )
نعم وقد قلت ذلك في مقالي ولكنه دورنا ان نصنع الامل ونتحكم في النتائج والله المستعان اولا واخرا

واحد من الناس يقول...

ماجد
:)
ابتسامة ودودة من القلب

واحد من الناس يقول...

الملاك
انا اقل من ان استحق هذه التحية فاعذرني في عدم نشرها ولكم جزيل الشكر