الأربعاء، ديسمبر 22، 2010

البربراري 1


اينعم الرواية المسرحية الشكسيبرية  بتاعتي(عندما تملك النساء ) لسه دمها منشفش ومع  ان مفيش ناس كتير علقوا عليها ممكن لانها بايخة , ممكن علشان اصلامفيش ناس كتير متابعة المدونة دي على اساس ان عنوانها ديني وبما انهم مش محتاجين يعرفوا حاجة عن الدين على اساس انهم عارفين كل حاجة عنه وعن المتشددين مبيفتحوهاش اصلا لما يشوفوا اسمها ,وممكن حاجات تانية انا معرفهاش .المهم ده مش موضوعنا انا بس لفت نظري اثناء اللف والدوران في المدونات حاجة كده مكنتش بستغربها لما اسمعها من واحد زي مثقفين الحكومة المناضلين على صفحات الجرائد  لما يجيبوهم في التلفزيون ولا في الجريدة  قصاد واحد لازم تعرف من شكله انه متشدد واول ميقول ممثل الافكار الدينية اي كلمةمجتش على هوى ودين الامم المتحدة الجديد الدين في الجامع , يمسك المتثقف من دولة عنيه ويقول : ااااااااااااااااااه اه يا عيني ضربني في عيني المجرم اللي مبيفهمش في ادب الحوار بيقول عليا بربراري  والبربراريين عندهم كفرة يبقى بيكفرني , حاجة كده زي (تلقيح الجتت بتاع بلطجية الانتخابات رفاق الصحوة التنويرية الحزبية) بس غالبا بينتهي عند الحد ده مبيكملش لان البربراري المتثقف ثقافة عالية (البرجوازي يعني ) مبيحبش يضيع وقته مع البروليتاريا( طبقة الشعب المكافحة ) الفكرية الممثله في افكار العوام المتدينيين , ساعتها فهمت مين اللي حاطط الناس في قوالب جاهزه مش بتصنف بالكلمة دي بتصنف بالشكل .(اكتشفت مره ان واحد فيهم مقراش الكلام اصلا هوه شافه من بره كده قالك بس مادام طلعت زيهم......معا السلاا~ااامة )
انا تخيلت الحوار ده لما شفت اني كل ما اكلم حد واجيب سيرة الليبراليين على اساس انهم جزء من المنظومة الفكرية الموجودة كامر واقع سواء كرهتها انا واللي زيي  او حبيناها- سواء كان معناها الحرفي هوه المقصود او معناها الاجتماعي المتمحور حول مجموعة قيم حرية الفرد واحترام حقوقة الشخصية بدون التعرض لمبدأ الفصل التعسفي بين الدين والحياة(ودي علمانية secularism موضوع تاني يعني ) - المهم كل ما تيجي السيرة دي في رد  يمسك المخالف عينه ويقول انت قولبتني خلتني ليبرالي وانت المسلم الوحيد واظن لو كنا في الشارع كان صوّت ولمّ علينا الناس ,ارجع لكلامي اللي بيبقى مكتوب يعني معرفشي اقول مقلتوش الاقي اني مجبتش سيرته اصلا انا كنت بتكلم عن مجموعة المبادىء العامة الل ممكن اي حد يعتنقها او حتى يتأثر بيها من غير ايمان بالمبادىء الفرعية بتاعتها ولوازمها الفكرية, حاجة كده زي حوار الطرشان كل واحد قافل ودانه وبيتكلم بس مش عايز يسمع غير ( كله يصقف ويقول هيه ......هييييييييييييييه), وساعتها ايقنت تماما انه كتير من اللي بيتكلم عن حرية الرأي والراي الاخر بينطق الليبرالي بربراري .
طبعا ممكن واحد ناصح يقولي وانت بتنطقها ازاي يا علاّمة زمانك؟
البوست الجاي ان شاء الله 



هناك 11 تعليقًا:

غير معرف يقول...

الاستمرار هو النجاح الحقيقى ولاكننا ابدا لا ننسى روعة البدايات,
استمر بانتظار المذيد

ستيتة يقول...

اولا احيك فرغم ان البوست طويل لكن مفيد جدا
ولي اقتراح ان كنت تقبله
ياريت دايما بوست زي ده تخليه نقاط بيكون اسهل للعوام في القراءة واغلبنا عوام
وياقلبك يا جدع
محتفظ بقاموس اولى ثانوي :)
تحياتي وشكرا للمعلومة والطرح

Unknown يقول...

غير معروف ( د. تامر ) شكرا على متابعتك واستحمالك قراءة كل ده ودعواتك

Unknown يقول...

دكتورة اولا شكرا على قراءة البوست , ثانيا انا كنت بحسب اني عملت النقاط دي بس حاخد بالي اكتر المرة الجاية باذن الله , اما عن القاموس فانا حافظ التعريف ده من فترة يعني استحضار من الذاكرة وان كان القاموس لسه عندي فعلا

-_- يقول...

انا اسف جدا ..
بجد و بكرر اعتذاري , انا متعودتش اكلم حد بالطريقة اللي كلمتك بيها و رغم اني فعلا متضايق من طريقة كلامك معايا و نشرك اني بنشر القباحات و انك بتتنزل في كلامك معايا الى اخره من الكلام الجارح في حقي .
الا انني راجعت نفسي بأن الرد على الخطأ بالخطأ شئ سئ للغاية ..

Unknown يقول...

شارم ولا يهمك اعتبره سوء تفاهم ,انا كنت زمان بقول متتكلمش في حاجة مهمة في التليفون علشان مبينقلش مشاعر واضح ان الكيبورد مش بس مبينقلش مشاعر ده بينقلها عكس المقصود ممكن يكون ده بسبب سوء الظن المتوفر بكثرة وفرة الفساد(الله يكرمك متخدش الكلام على نفسك) , وعلشان مفيش تواصل مع الوجه (facial expressions ),ويكا كان بيقول ده 70% لوحده , فرصة سعيدة انك جيت برجليك لمدونتي ونتمنى التواصل

Unknown يقول...

السلام عليكم ورحمة الله وبركاته..

جيب كرسي واقعد علشان القعدة هتطول شوية...!

أولا: أنا فاتح الصفحة دي من يومين، وقرأتها كلها، ولكن التعليق كان صعب بدون قراءة ثانية!! وأنا كنت نايم تقريبا!!! وصدقا لم تأت الفرصة الثانية إلا بعد يومين (وكل

ده والصفحة مفتوحة.. أصلي لا أغلق الكمبيوتر أبدا)..

ثانيا: كما علقت سريعا في الجزء الأول.. أنا فعلا أُعدُّ بوستا في نفس المحتوى منذ فترة قريبة جدا بعد أن ساءتني محتويات موضوع في مدونة أحد ضيوفي الدائمين.. كان فيه

تجرؤا على نص ثابت في السنة النبوية تحت مسمى (حرية الفكر) وإن كان ذلك بحسن نية..
ورغم أن معظم ردود القراء كانت تؤكد على فهمهم الصحيح للنص النبوي، وبعضهم (وأنا منهم) نبهوا إلى خطورة التعامل مع السنة الثابتة بإعمال العقل فقط، إلا أن

ردود صاحب الموضوع كانت - في رأيي - مطاطة للغاية وتدور حول عدم حبه للجدال وأنه يكتفي - كما يقول - بدور من يلقي حجرا في المياه الراكدة (أي الأفكار

المتحجرة المتبلدة).. ربما لأنه - أشهد - يتميز بالأدب في الحوار، ولا يحب اكتساب عداء أحد من ضيوفه.
...........
أنا باشرب نسكافيه على فكرة..!
...........

يتبع...

Unknown يقول...

خامسا: أستأذنك في الاستفادة من موضوعك والإشارة إليه في موضوعي؛ لأني أعتقد أن موضوع يكمل الفكرة عندي.

سادسا: نأتي لما قلتَه في الجزء الأول من الموضوع:
"...ومع ان مفيش ناس كتير علقوا عليها ممكن لانها بايخة , ممكن علشان اصلا مفيش ناس كتير متابعة المدونة دي على اساس ان ....... إلخ"..
لهذا سأقدم لك بعض النصائح التي قد تعينك في مزيد من انتشار مدونتك وزيادة عدد قرائك؛ وإنما أقوم بهذا لاستشعاري لأهمية أفكارك، ومن قبيل التعاون على البر.. وأنا

واثق - إن شاء الله - أن صدرك سيتسع لي:
1- عنوان المدونة الديني (كما ذكرتَ) ربما يجعل عددا لا بأس به من القراء يعرضون عنها؛ ليس شرطا لعدم حب المواضيع الدينية، ولكن لأن كثيرا منهم يبحث عن التنوع في المحتوى، وعنوانك يوحي - بصورة أو بأخرى - بعدم وجود التنوع!!
إذن لا بأس أبدا من تغييره بعنوان رصين مناسب.. وربما إنشاء مدونة جديدة حتى.
2- عند زيارتك لمدون آخر، ادعه إلى مدونتك، أو إلى موضوع لديك يناسب اتجاهه الفكري..
3- اشترك في المدونات الأخرى، فعندما يبادلك الآخرين الاشتراك في مدونتك تكون فرصة للتعرف عليها.
4- وهذه مهمة ومجربة: اجعل مواضيعك قصيرة نسبيا ومركزة (ولو في المراحل الأولى)؛ فالزائر الجديد ياقي نظرة سريعة على المدونة.. والموضوع القصير سيشجعه على القراءة الكاملة، وسيجذبه للعودة بعد ذلك.. وإن كان طول الموضوع يفرض نفسه، فقسمه إلى جزئين أو حتى عدة أجزاء.
5- أعتقد أن كتابتك بالعامية المختلطة بالعربية تصعب الأمر على القارئ، خاصة في موضوع يحتاج إلى التركيز (مثل موضوعنا هنا)؛ فلا تزيد الأمر صعوبة على القارئ
بمحاولة فهم بعض الألفاظ العامية (التي يكتبها كل منا بطريقة نطقه!). [وعلى رأي بوحة: إحنا ناقصين لبخة في الكلام يا عم الحج؟!!!]
6- ضع صورة على القل لكل بوست؛ فهي تعطي رونقا للموضوع وبهجة وتخفف من جموده، كما أنها كثيرا ما تجذب القارئ خاصة إن تعرف على الموضوع من رابط جانبي لدى مدون آخر.

سابعا: أستأذن أنا بقى... وسُك ع النسكافيه..!

تحياتي أخي الكريم... وبجد آسف على الإطالة المملة..!!!

Unknown يقول...

وعليكم السلام ماجد
عرضك للنقاط اظنه افضل من البوست نفسه ,ممكن يسهل البوست نفسه لاي حد عايز يقراه بسرعه
*المدونات :من عندما تملك النساء 1 حتى البربراري 2 هي رد على نفس المدون المحترم اللي بتتكلم عليه ووجود بعض العبارات العامية كان لاسباب فنية احيانا واحيانا تانية كان من الخنقة من حوار الملقي للمستقبل اللي بيمارسة بعض زملاء التدوين(اتجاه واحد يعني)
*بالنسبة لعنوان المدونة فانا فكرت زي مبتقول بالظبط بس لاسباب نفسية مقدرتش اغيرها اعتبره تعلق باسمها ,
*دعوة مدون لزيارة مدونتي حصل مرة او اتنين بس كنت بحس احيانا بخوف من انه يكون نوع من فرض الرغبة او حتى الاستجداء
* اشتركت زي مبتقول بس لسه مجبتش نتيجة
*المواضيع لازم تكون قصيرة معاك حق مليون في الميه وححاول ان شاء الله
*وضع صورة ممممممممممم متهيألي فكره جذابة
شكرا جزيلا على متابعتك , وبالنسبة للمدونة اعتبرها بتاعتك ممكن تاخد منها اي حاجة وبدون التقيد بالاشارة للمصدر والنسكافيه معلش المرة دي بس ان شاء الله تتعوض

Unknown يقول...

التعليقات قبل تقسيم البوستات حيث تخص الحلقة الاخيرة

ابن الإيمان يقول...



بسم الله والصلاة والسلام على رسول الله.:
السلام عليكم..
شكرا على زيارتك لنا..
سعيد بالتعرف على مواضيعك..
ساتابعها بإذن الله تعالى...
الاخ ماجد القاضي..ضيفك الكريم ..فعلا شخص فهمان...وكلامه مضبوط..انا أتفق معه فيما يتعلق (بهندسة المدونات.).هه
شكرا أخي الكريم ولنا عودات بإذن الله تعالى..
ملاحظه..:
فعلا أنا معك من الصعب عليك تغيير كلمة لا إله الا الله ..عنوان مدونتك..لكنني ساحاول البحث لك عن مخرج مشرف وجميل بإذن الله تعالى بعد التمعن في محتويات مدونتك ...
مرة أخرى
شكرا لك..
لي اضافه أخرى.:
هل من الضروري عندك ابقاء الاشراف على التعليقات؟؟؟
هل هناك من ضايقك أو قل الادب معك؟؟؟
وهذه نقطة اضيفها لنقاط اخونا ماجد
وهو ان المعلق بيحب يشوف تعليقه مباشرة على الصفحه.
لذلك انصحك بالغاء الاشراف على التعليقات الا إذا كان هناك أمر ضروري جدا يفرض عليك ذلك الاشراف..
شكرا مرة ثالثه
والسلام عليكم ورحمة الله وبركاته
أخوك
ابن الايمان