الاثنين، ديسمبر 13، 2010

خيال *حقيقة محاولة للفرح

بناء على طلب أ.ماجد القاضي بمحاولة البحث عن اشياء نحبها او تدخل البهجة علينا , كان الامر صعبا الا اني وجدت وقعا لذيذا لكلمة البهجة خصوصا عندما تشعر انك افتقدتها منذ زمان ليس بالقليل شعرت بها في قلبي كشعور احدنا بالطعام يحتك بجدار معدته بعد يوم طويل بدون أكل فوجدت اشياء من قبيل بسمة طفلتي ذات السبعة اشهر ومناغاتها ,وجدت ايضا مكالمة من صديق لا يذكرنا الا قليلا عندما تضىء شاشة الهاتف باسمه الكريم وجدت ايضا عندما تشعر بفرحة من تحب او تدخل السعادة على شخص ما , رائع ايضا عندما يتوقف مريض عن الالم بسبب دوائك اما ان يعود للحياة بعد ان تعطيه صدمة كهربية اثناء توقف قلبه عن العمل فهو انجاز خرافي تشعر وقتها ان الارض لا تحملك بل كأن نشوة الفرح جناحاك ويوم الراتب ايضا يوم لذيذ الطعم والرائحة .ايضا كنت اشعر بالراحة عندما اركب وسيلة مواصلات يقودها سائق من فصيلة البشر لا الفصيلة المستعان بها في الانتخابات (اسف على هذه الذكرى الغير سعيدة) ,تجمع سعيد للاقارب او الاصدقاء ومن الاشياء التي تبعث على الراحة ايضا صلاة ركعتين بقلب حاضر . ماجد اسف لم استطع تذكر اكثر من ذلك نظرا لان حضرة البيه الظابط يطرق الباب اي باب ممكن يكون باب البيت اذا كنت من الاسلاميين او باب السيارة طلبا للرخصة واحيانا البطاقة اذا كنت من المسلمين وانت لن تخرج عن واحد من الاثنين  .صدقني عندما يتوقف طرق البيه الظابط على الابواب اعدك الا اتوقف عن الضحك .

هناك 23 تعليقًا:

ويكا يقول...

انا مش قلتلك هتتمسك ؟!!
افتح بقى يا باشا

Unknown يقول...

تاني ؟
ان شاء الله مش حتمسك تاني
بالمناسبة انت اللي بتشجعني على الكتابة في البتاعة دي لغاية دلوقتي

مدونه ما كفايه بقى يقول...

اخى قد ترك اليه الظاط بانا منذ يومين فقط

فلا استطيع ان ابحث الان عن شىء يبهجنى فدموعى لاى تفارق عينى والبسمه ضاعت ولا اريد حتى ان ابحث عنها

دعواتك اخى

Unknown يقول...

فرج الله كربك وازال همك وفك اسر اسيرك وانتقم من الظالمين انتقام الجبار اذا غضب

الـسـيـدة نـون يقول...

السلام عليكم

ممممممممممممممممم
انا كنت مندمجة فى القراءة وإذ فجأتن الاقى ضابط بيخبط على الباب والاقى البوست خلص بسرعة

وانا مش عارفة ايه حكاية البيه الضابط ده
بس واضح ان فيه حاجة قديمة تخص سيادتك ليها علاقة بالضباط


ما علينا


هو انا ممكن اشترك انا كمان واقول ايه الحاجات اللى ممكن تفرحنى؟


انا متفقة معاك فى حاجتين
وهى ضحكة ابناؤنا ويوم قبض الراتب
اى نعم انا مش بشتغل بس برضه اليوم اللى بقبض فيه مصروف الشهر من ابو ابني
واليوم اللى بروح اقبض فيه معاش والدى
بيكونوا ايام حلوة ومنغنغة ومليانين شكولاتة وحاجات مبهجة



صلاة ركعتين بقلب حاضر
ممممممممممممممممم

والله مافكرتش فيها قبل كدة

بس عموما انا بكون فرحانة اخر اليوم لما اصلى صلاة العشا
ساعتها بحس ان مش ورايا حاجة وانى اديت الفروض الواجبة عليا فى اليوم ده
وساعتها بقدر استمتع باليوم وانا مرتاحة

الحاجة اللى ممكن تفرحنى انى احفظ ابنى آية من كتاب الله
ويا سلام بقى لو حفظ سورة كاملة
ويا سلام بقى على اليوم اللى حفظته فيه سورة البينة
كان يوم فرح بالنسبالى
لان السورة دة صعبة فى حفظها

الحاجة اللى ممكن تفرحنى جدا كمان
ان حبيبى يقولى
انا بحبك يا نورا فى الوقت اللى انا اكون محتاجة انى اسمعها منه


بس هو انا عندى سؤال بايخ حبتين


هى الحاجات اللى بتفرحك كلها حاجات مشروعة؟

يعنى انت ما بتفرحش لما بتعمل شئ غير مشروع رغم انه ممكن يدخل على قلبك البهججة والسرور؟

اصل ساعات الحاجات الغير مشروعةو الحاجات الحرام
بتدينا احساس بالفرح برضه

حتى لو حسينا بالذنب بعدها علطول
ده ما يمنعش اننا بنفرح بيها

اصل انا من انصار
" وبالتضاد تتميز الاشياء"

علشان تحس بطعم الأبيض
لازم تكون جربت طعم الاسود


وعلشان تحس بحلاوة الايمان والتقوى والورع
لازم تضيف لحياتك لمحة من الفُجر



المهم
البوست فى مجمله بسيط وخفيف
واتمنى لك دوام الاستمرار


آسفة على الإطالة
وأرجو انى ماكونش أزعجت حضرتك



سلام
اختك خيخة

Unknown يقول...

بداية تشرفنا بمروركم
اعتبري الظابط هو رمز السلطة اللي بتعتبر ان كرها عداوة للوطن
خلص بسرعة لاني مقدرتش اعد حاجات كتير تفرحني
نتمنالكم السعادة الدايمة
ركعتين بقلب حاضر ده امل ومتعة الاحساس بيها بيخلي الانسان مهما اتالم او بعد يعرف اني فيه حاجه هنا تستاهل يرجع علشانها حاجة مادية محسوسة غير النعيم الغيبي
قعدت افتكر حاجة مش مشروعة تفرحني مش متذكر حاليا مش علشان انا ملاك مليش اخطاء لأ ده علشان الاخطاء اللي بعملها بتالمني في الحال
اما النظرية العظيمة بتاعة بضدها تتميز الاشياء فدي حقيقة الاخطاء بتيجي سواء اختارناها او اجبرنا على اختيارها لكن اني اتعمد اضافتها علشان احس بحلاوة الايمان دي نظرية جديدة علمي موصلش ليها لسه
شكرا

Unknown يقول...

السلام عليكم

أشكرك جزيلا أخي الكريم على استجابتك للدعوة والكتابة عن حاجات بتحبها..

كلها حاجت جميلة وأدت المطلوب من البوست :)

على فكرة: أنا بالفعل قرأت معظم مدونتك.. أصل في عادة كده، لما بتعجبني مدونة بقعد أمزمز فيها شوية..

لكن فعلا كنت مقصر في العليقات.. طبعا أنا عرفتك من ساعة بوست الدكتورة ستيتة إياه...

عامة اعتبر دي صفحة جديدة :)

بمناسبة الظابط.. واضح فعلا إن لك تجربة غير محببة (استشفيت ده من أول بوست قرأتهولك)

أنا طبعا راجل ملتزم ما بستناش لما يجولي.. الحقيقة أنا رحتلهم بنفسي لما طلبوني.. أصل بعيد عنك لي ملف عندهم!!!

تحياتي أخي الكريم مع وعد بمزيد من التواصل البناء بيننا.

الـسـيـدة نـون يقول...

السلام عليكم

انا جيت تانى

لا يا راجل !!!!

بقى علمك لسة ما توصلش لنظرية
اضف لحياتك لمحة من الفُجر؟
!!!!!!!!!!!!!!!!!!

ده انت على كدة متأخر جدا


بص يا سيدى الفاضل
واضح من ردك وطريقة كتابتك واختيارك للمواضيع اللى انت بتكتبها انك متدين
وده شئ عظيم فى حد ذاته

بس الاعظم منه
انك تكون جربت فى وقت ما من حياتك قلة الادب والاباحة والفُجر
وبعد كدة قدرت انك تختار تدينك

اصل انك تكون متدين كدة علطول
مافيهاش متعة ولا حتى فيها اجتهاد


لكن لما تجرب لذة انك تكون فاجر بأي شكل من الاشكال
وتستمتع بالفُجر ده
وترجع بعد كدة تجاهد نفسك علشان تبطل الغلط
ده فى حد ذاته قوة

انك تجاهد نفسك
وانك تمنع نفسك من الوقوع فى اى حاجة حرام او غلط
دى قوة جبارة
ولما بتنجح بتحس اد ايه انت قوى ومتدين

عارف ليه؟
لان الحرام او الغلط غالبا بيكون طعمه احلى من الحلال والصح
او بلاش نقول احلى
خلينا نقول بيكون
متعة اثارة تشويق


فبالتالى اللى يدوق طعم الحاجة الغلط مرة ويقدر بعد كدة انه يستغنى عنه ويجاهد نفسه
ده فى نظرى انا بيكون اقوى من الانسان اللى ما دقش فى حياته غير الصح والحلال
فبالتالى مش قادر يحس بعذاب اللى داق الغلط وبيجاهد نفسه علشان ما يدقهوش تانى

بس خلاص

شكرا ليك
و سعدت بالنقاش معاك

سلام
اختك خيخة

ويكا يقول...

هههههههههههههههه

النظريه الجديده الموصى بيها دى يا دكتره ، عايزين نجربوها مره كده نشوف هيحصل ايه....
ههههههههههههههههههههههه

بص احنا ممكن مره نروح الشراع ، وبدل ما نشرب لمون بالنعناع ، نشرب نعناع بالمون ونشوف لما عملنا الضد هيحصل ايه.

كلمات من نور يقول...

البوست كان ماشي حلو وكله مشاعر فياضة بالحب حتى طرق الظابط الباب باظت عليا

ههههههههههههه

تسلم إيك و اسأل الله لنا دوام التواصل وتكون بداية خير عليك يارب

Unknown يقول...

ماجد وعليكم السلام
بجد هعتبر زيارتك وتعليقك من ضمن الحاجات اللي تفرح اللي ممكن نضيفها للبوست ده انا بردك كنت ملتزم بس يبدو ان التزامي مكنش كفاية لاثبات البراءة
شكرا مرة تانية

Unknown يقول...

خيخة شرفتمونا مرة اخرى
طبيعي اني اكون متاخر اذا قارنا اي حاجة بسرعة الضوء حتكون متأخرة
انا اصدق ان من لا يعرف الجاهلية لا يعرف الاسلام ولكن اذ كان فيه حاجة افتكرتها فهي مسلسلات التلفزيون ودخول السينما رغم ان ده مكنش كتير اصلا ومع ذلك لما بفتكر مبشوفش ان دي كانت من الضخامة اني اعتبرها جهاد او اجتهاد
اذا قارنا الاستمتاع بركعتين او دمعة عين عند الشعور بمعنى ايه فدي لذه مستحيل يتبعها الم لكن اللذه الفاجرة المها اشد على النفس لدرجة ان شدة المها ينسي لذتها تماما
متفق اني لما منع نفسي عن الغلط دي قوة بس صدقي ن الغلط انواع اقلها شأنا واضعفها قوة هي اخطاء الجوارح اللي بيدخل تحتها كل اللي انتي قلتيه
لكن خطايا الروح والقلب والعقل هي الخطايا الحقيقية وجهادها هو الجهاد الاكبر .اتمنى اكون اضفت شىء

Unknown يقول...

اسف كلمات من نور مكنش قصدي بس الكتابة تعبير عن الشعور وخصوصا لما تكون مش مدفوعة الاجر ومش وراها مصلحة
نسألكم الدعاء

Unknown يقول...

ويكا نعناع باللمون مرة واحدة انت عارف بالتغيير ده ممكن يحصل ايه ؟
انت اللي حتدفع مرتين ورا بعض
ههههههههههههه

الـسـيـدة نـون يقول...

السلام عليكم
ازيك يا اسلام؟

مممممممممممم

هو واضح من كلامك انك اضفت شيئ
بس انا لسة مش قادرة استوعب الاضافة
فأرجو انك تعذرني على بطئ ادراكي لاضافتك

عموما انا هاقرا كلامك تانى وتالت ورابع لحد ما استوعب ولو لاقيت حاجة محتاجة مناقشة هارجعلك تانى




بس انا عندى ملحوظتين مالهومش علاقة بالموضوع خااااالص
بس بسببهم انا متنرفزة

اولا
انت بتوقع باسم واحد من لناس
وفيه حرف الف ناقص فى كلمة الناس
فارجوك صلحها

ثانيا النهاردة اربعتاشر ديسمبر والتاريخ عندك متلغبط وبيقول ان النهاردة 13 ديسمبر والتوقيت كمان فيه حاجة غلط
فارجوك ظبط تواريخك ومواقيتك


شكرا ليك على سعة صدرك


سلام

اختك خيخة

Unknown يقول...

شكرا على الاضافات وتم التعديل بس لسمي مش موجود على المدونة ولا فيه لينك بين المدونة وصفحة الفيس بوك بتاعتي ؟؟؟

ويكا يقول...

هههههههههههه

البت دى هتهبلك ما تركزشى معاها

هههههههههههههه

ويكا يقول...

خيخه

واحد من الناس يقصد والله اعلم زى ما فهمت

ان خطايا الجوارح اخف الماً من خطايا القلوب والارواح والعقول

فالكفر مثلاً خطيئة عقل وقلب ، لكن الزنا وشرب الخمر خطيئة جارحه

نعم الزنا شديد وكبيره هو وشرب الخمر ، وقد يدخل النار ، اعاذنا الله منها ، الا ان الكفر اشد جرماً ، بل هو الجرم كله ولو لم يعاقر الكافر الخمر او النساء

فهمااان ولا لسه؟؟

الـسـيـدة نـون يقول...

السلام عليكم

ازيك يا اسلام

وازيك يا ويكا انت كمان
باعتبار انك دخلت فى الحوار اللى بينى وبين اسلام


اولا عايزة اقول لاسلام انى جبت لينك مدونته من على الاكونت بتاعه على الفيس بوك
لان بعض اصدقائى الفيسين بوكيين ضايفينك يا اسلام
فانا كنت بدعبس فى اصحابهم ولاقيتك ولاقيت لينك مدونتك واللى شدنى فى اسمك وخلانى ابص على الاكونت بتاعك
هو اسم والدك
لان اسمه طه
وانا بحب سورة طه



المهم نرجع لموضوعنا

اولا برضه احب اشكرك انك ظبطت الغلاطات اللى كانت عندك


ثانيا

انت معتقد ان دخول السينما والفرجة على التلفزيونات دى حاجة فاجرة؟
!!!!!!!!!!!!!!!!!!!

يا نهار ابيض

ده انت فى الضياع خالص يا بنى

عموما هو انا هنا مش بصدد انى احكم على مقدار تدينك او كيفية تدينك

بس هى الفكرة

هى الفكرة ايه ؟
استنى بقى لانى نسيت

اه بص

ويكا كاتب مثال خلانى افهم تعليقك اللى ما كونتش مستوعباه

بس برضه ويكا كان حاد اوى فى المثال اللى هو ذكره

زنا ايه وشرب خمر ايه وهباب ايه

كدة الموضوع بقى فاجر فاجر يعنى

الفجر مش لازم يكون فى ارتكاب فاحشة زى الزنا او شرب الخمر او القتل او اى مصيبة سودا من الحاجات الكبيرة اوى دى


الفجر ممكن يكون فى شرب سيجارة

ده من وجهة نظرى فجر

يمكن من وجهة نظر ناس تانية انه صياعة خفيفة ما تضرش

عموما مش هانختلف على المسميات
صياعة او فجر او اباحة او قلة ادب كل ده بالنسبالى يقع تحت بند واحد وهو الغلط والحرام

انت مثلا لو بتشرب سجاير وجربتها وادمنتها لفترة واستمتعت بطعمها المقرف
واستمتعت بريحتها الوسخة

انت بتعمل حاجة غلط وعارف انك بتعمل حاجة غلط لكن مستمتع بيه


طيب لو واحد عمره ما جرب شرب السجاير
و واحد تانى جرب السجاير وبطلها

لو الاتنين اتحطوا فى مكان فيه مدخنين والدخان مالى الجو
مين هنا اقوى؟

الاقوى هو اللى جرب السجاير وعارف اد ايه هى ممتعة
وبيجاهد نفسه انه ما يضعفش ويروح يشرب سيجارة

اما اللى عمره ما جربها
مش هايكون متضرر اوى
لانه ماجربش دماغ السجاير


هو ده اساسا مش موضوعنا

انا كنت عايزة اقول يعنى من البداية

ان مش كل الحاجات المشروعة ممتعة
فيه كمان حاجات غير مشروعة بتكون ممتعة
زى شرب السجاير عند البعض
وزى الزنا والعياذ بالله عند البعض برضه
وزى الخمرة عند البعض برضه

يعنى اللى بيفرح البنى ادم مش لازم يكون شئ مشروع


ولانك بنى ادم مش ملاك
كنت انا كقارئة كنت هاستمتع اكتر بالبوست بتاعك لو كان واقعي وبشري اكتر من كدة

انت البوست بتاعك ملائكي اوى

مش معقول بنى ادم كل اللى بيفرحه حاجات مشروعة؟

ازاى يعنى؟
لييييه؟

انت عمرك ما بصيت فى الخباثة على بت جسمها حلو واستمتعت بشكل جسمها؟

مادى حاجة حرام لكن فيها متعة

اوعى تقولى انك ما بصيتش؟
ساعتها مش هاصدقك فعلا



عموما
ارجو ان وجهة نظرى تكون وصلت



سلام

اختك خيخة

والف شكر يا ويكا على شرحك

Unknown يقول...

وعليكم السلام
انا كنت عايز اللي يدخل المدونة يناقش فكرة بقبول او رفض من غير ما يشغله مين صاحبه بس جاخد بالي بعد كده
*العفو
*الافكار الناتجة عن المسلسلات اخطر بكتير من سرطان الرئه بتاع السجاير
*مكنتش ناوي انشر ردك لاني اتصدمت بطريقة الكلام جايز علشان متعودتش ان حد يكلمني كده بس قررت اني مكنش سلطوي في المنع خصوصا انه تعرض لشخصي مش لمسلمات +اني كنت حعتبره ضعف في حجتي عن تبني ارائي
*مثال ويكا مجرد مثال كنت مستني انتي تستنجي المعنى باختصار اذا كانت ذنوب الجوارح بتاعتي مش من النوع الظاهر الا ان خطايا الروح اكبر ومش شرط توصل للكفر ,طريقة التفكير مثلا
*فهمت قصدك من بدري بس للاسف انتي اللي مفهمتنيش في ان بعض الناس المعصية بتألمهم مش بتمتعهم بتعذب نفوسهم مش بتثيرهم بتتسبب لهم الاحباط مش الأمل
*المتعه من عدمها نسبية بتختلف باختلاف الاشخاص
*نفسك ان لم تشغلها بالحق شغلتك بالباطل
*فيه فرق بين الفرح والمتعة وانا كنت بتكلم عن اللي يفرحني
*جاء في الاثر انه اذا ابتليتم بالمعاصي فاستتروا ( مش اكتبوها في بوست وانشروه )
وجاء ايضا (كل امتي معافى الا المجاهرين ) والمجاهر هو من بات يعصي الله يصبح يهتك ستر الله يفضح نفسه وقد ستره الله.
واذا قلتلك اني في ال15 سنة اللي هما عمر ادراكي وتكليفي الشرعي معملتش فعلا اللي انتي بتسألي عليه ايه دليلك على اني كذاب .يكفيني اني عارف اني صادق.
اذا كنت بتعتبري ان بوستي ملائكي ايه يمنعني من ان اقول ان افكارك شيطانية عفوا مقصدش فكرة لذة المعصية لان ربنا سبحانه لما حرم حاجة زي الزنا حلل الزواج لتعويض اللذه ولما حرم الربا حلل التجارة لتعويض حب المال الطبيعي في البشر انا اقصد اختيارك لكلماتك فيها جرأة زايدة اتمنى تراعي ناس متعودتشي عليها اذا مكنش فيه امكانية لان تكون اختيارك الشخصي متوافق مع قول النبي (ليس المؤمن بطعان ولا لعان ولا فاحش ولا بذىء)ومتهيألي بعض الالفاظ تدخل تحت باب فحش القول.
رجاء اخير فيه بوستات تانيه بشريه في مدونتي محتاجة راي حضرتك غير البوست ده فرجاء البوست مش عاجبك ده حقك لكن في النهايه انا كنت بتكلم عن مشاعري

الـسـيـدة نـون يقول...

السلام عليكم

انا ماقولتش ان البوست مش عاجبنى
انا قلت انه مش واقعى

اول مرة اعرف ان فيه فرق بين الفرح والمتعة

مالفرح فى حد ذاته متعة

ضحكة بنتك بتفرحك لانك بتستمتع بيها

عندك حق
ماكنش يصح انى احكم عليك و اقول عنك كذاب

بس يكفيني انك عارف حقيقتك _ وانك صادق زى ما بتقول _


مش ذنبى انك ماقبلتش واحدة بتتكلم بجراءة قبل كدة

عموما اعتبرها خبرة تضاف الى رصيد خبراتك فى الحياة
اصل علشان تقدر تتعامل مع كل الناس لازم تكون قابلت انماط مختلفة من البشر
واديك يا سيدى قابلت واحدة بجحة


ولنفترض ان حد ابتلى بمعصية وحولها بشكل ادبي الى بوست او مقالة او قصة قصيرة او رواية
فيها ايه دى؟
ما ده نوع من انواع الادب يا سيدى الفاضل

ولا انت عمرك ما قريت ادب واقعى؟


ممكن اللى بيحكى عن ذنب ارتكبه ما يكونش الهدف من الحكي انه يجاهر او يفتخر بما ارتكبه
على اد ما هو يكون نوع من الاعتراف بما اقترفه حتى يتخلص من الاحساس بالذنب

على حظك او على حظى ان ده اول بوست اقراه عندك
عاجبنى علقت عليه والتعليق اتحول لمناقشة بينى وبينك
وانا مش شايفة ان النقاش حاجة وحشة
لان عن طريق النقاش الناس بتقدر تفهم بعض وكل شخص بيقدر يوصل وجهة نظره للاخر

عاجبنى فى تعليقك الجملة دى
نفسك ان لم تشغلها بالحق شغلتك بالباطل
بجد جملة رائعة
واقدر اقول عنها ان هى دى الدرس اللى انا استفدته النهاردة

شوفت بقى ازاى النقاش جه بفايدة وخلاني استفيد
لذا وجب الشكر


انك تقول على افكاري شيطانية ده لا يعيبنى فى شيء
وانا معترفة من زمان ان بداخلى نصف ملاك ونصف شيطان
فبالتالى طبيعى ان بعض افكارى تكون شيطانية


لو معترض على كلمة فجر او فاجر
احب اقولك ان كلمة فجورها مذكورة فى القران الكريم
وتفسيرها عند الطبري وتفاسير اخرى بمعنى الشر

اما لو تقصد اى كلمة تانية وردت بتعليقى
فانا مش شايفة انى قلت كلمة غريبة او جريئة عمرك ما سمعتها من بنى ادم عادى

تنشر تعليقى او ما تنشرهوش دى حاجة ترجعلك
لانى مقتنعة ان كل واحد حر
انا حرة اكتب اللى انا عايزاه
وانت حر تنشر التعليق او ماتنشرهوش

عموما انا بعتذرلك على كثرة تعليقاتي والتطويل فيها
بس عشمى انك تكون استمتعت_ ولو بقدر ضئيل_ من ممارسة فعل النقاش
مع شخص اخر يختلف عنك فى اتجاهاتك واسلوبك


الف شكر ليك على سعة صدرك وصبرك على امثالي


سلام
اختك خيخة

زينب علي حبيب يقول...

الموضوع جميل ... و أعجبتني الأمور التي اخترتها ... ولو إنني لم أجدها كثيرة ...


و قرأت النقاش الذي دار ..

لي عدة نقاط أود طرحها - لو سمحت لي - ... وهتكلم بالمصري للسهولة

1. مش الأفضل هو اللي بيعمل الخطأ و بعد كدا يبطل عنو ... والدليل على دا رسولنا محمد صلى الله عليه واله ... مش ساجد لصنم قط ... الأفضل هو اننا نمنع نفسنا من الوقوع من المعاصي أصلا ... لأنه الشيطان بيبتدي بالطريقة دي يستدرج الإنسان ... كل مرة يخليه عمل مش كويس بحجة تجربة و من باب التغيير ...

طب افرضي مثلاً ... انا جربت اعمل معصية و باللحظة دي ربنا عز وجل اخد روحي ... حقولو ايه ؟ ... كنت بستمتعلي شوية ؟ استغفر الله طبعاً ... ويمكن المعصية دي هي اللي تدخلني نار جهنم !

على فكرة المعصية مش بكبرها او صغرها ... في حديث ناسية نصو بس بما معناه ... ان المعصية الشديدة هي معصية صغيرة بس بنعملها باصرار ... ودي بقا اللي يمكن ربنا عز وجل مش بيسامحنا عليها !

مش لازم نشوف صغر المعصية ... لازم نبص لعظمة ربنا عز وجل و نحس بالخزي انو عمال بيشوفنا بلحظة عمل المعصية و اننا تجرأنا بمملكتو اننا نعصيه !
2. على فكرة المعصية دي صح فيها لذة زي مقولتي بس بطنها ناااار ... يبقى ايه هو اساس اللذة دي ؟
وايه اللذة دي اللي هستمتع بيها دقيقة و هندم بعدين عمر كامل ( لو ندمت طبعاً ! )
و ليه هعذب نفسي سنة عشان اتبسطلي دقيقة او دقيقتين او حتى ساعة ؟
بصراحة ... مش شايفة العمل دا عملي خااالص
لأن لو فكرنا بيها ... ساعة لذة = سنة حزن
لا تعمل هذه اللذة = عدم الحزن لسنة + اجر كبير و فخر بأنك استطعت غلبة شيطانك
يبقى أي النقطتين أختار ؟
3. انا من رأي الأخ واحد من الناس ... بجد المسلسلات والأفلام ليها تأثير أكبر بكتير ... لأن التدخين مثلاً – على فكرة في ناس مش محرماه – بيأثر على الصحة بس لما نبطلو ولو كان هيبقى اثر قليل بس هيروح ... انما الأفكار الفاسدة الموجودة بأغلب المسلسلات دي بقا بتثبت بالعقل الباطن !
يعني تغييرها و مسحها عايزلو اضعاف مضاعفة ... ودا لو نجح ولو مقتنعناش بأغلب الأفكار الفاسدة الموجودة بالمسلسلات
4 . على فكرة حياة العفة والقرب من الله عز وجل أجمل بكتيـــــــــــــــــــــــــر من الحياة اللي فيها عمل سيء و عمل كويس ... ودا شيء مش بيحسو أي إنسان ... مش بيحسّوا إلا اللي قريب من ربنا عز وجل ... ودا الموضوع فيه لذة ما بعدها لذة ... وكفاية الفرحات اللي بتجينا بعد الامتناع عن معصية ... تجي الانسان احيانا بعد الامتناع عن معصية بشرى من ربنا عز وجل ... حاجات مش متخيلين انها ممكن تحصل في يوم من الأيام بتحصل بكل بساطة ... و تخلينا نفرح اكتر و أكتر ... مش بدعي إني عايشة دا ... لأ انا بعترف إني عاصية ربنا عز وجل كتيييير ... مش بالمعنى اللي فهمتيه ... في حاجات بسيطة تخلينا عصاة ... مش شرط الأغاني و الشرب و و و ...

5 . دعيتي واحد من الناس إنو يجرب اللي طلبتيه منو ...

طب أنا بدعوكِ تجربي شهر مثلاً ... أو لو حتى إسبوع متفكريش و لا تعملي أي حرام ... تحافظي على الصلاة بأوقاتها ... تقرأي ولو صفحة قران واحدة باليوم ... ممكن تحسي إللي كان يقصدو واللي أنا قصداه ... و انتي قلتي انك الأجرأ ... فأكيد عندك الجرأة والشجاعة إنك تتحكمي بنفسك الفترة القليلة دي وتجربي ... صح ؟ ... وبعدين إنتي مش خسرانة ... مستنية ردك .. :)

6 . بعتذر على تدخلي بالنص بس حبيت أشارك بالنقاش ...

زينب علي حبيب يقول...

7. مش شرط كل إنسان مش بيعمل معاصي يعني معقد و طول اليوم صلاة و قران و كدا ... لا في كتير حاجات تخلي الواحد يسلي نفسو بس بالحلال... وفي كتير متع بالحلال ... ربنا عز وجل مش حرم حاجة عننا الا لأنو عارف انو الحاجة دي بتضرنا حتى لو احنا محسيناش بدا ... لأنها لو حاجة مفيدة هيمنعها ليه بس ؟
ولو كان من المفيد إلنا اننا نعمل المعصية و بعد كدا نبطل عنها ... كان رب العرش العظيم سن قانون يخلينا نعمل كل معصية مرة واحدة ... صح؟
8. شكراً لويكا على الشرح ... انا برضو مكنتش فاهمة و بعد كدا فهمت :)